Khua bruă kƀĭn ala Trần Thanh Mẫn brei thâo, Klei bi kƀĭn amâo kčah hruê mmông tal Sa mơ̆ng Bruă kƀĭn ala gưl XVI mrâo mjưh ruê̆ jăk siam, bi mklă 15 hdră bhiăn, 6 hdră mtrŭn mâo knhuah hdră bhiăn leh anăn 7 hdră mtrŭn kơ hdră mđĭ kyar bruă duh mkra - ala ƀuôn. Khua bruă kƀĭn ala čih yap, bi myuôm ai tiê čŏng pô, bruă klam, klei gĭr prŏng mơ̆ng dŭm anôk bruă. Truh wưng anei, Khua bruă kƀĭn ala bi klă leh lu hdră bhiăn, hdră mtrŭn mơ̆ng Klei bi kƀĭn amâo kčah hruê mmông tal Sa.

Klei bi kƀĭn tal 6 mơ̆ng Dhar bruă gĭt gai Anôk bruă kƀĭn ala dưi mkŏ mjing 2 gưl, sui giăm 6 hruê, ksiêm dlăng êbeh 40 mta bruă. Hluê si Khua Anôk bruă kƀĭn ala, anei jing klei bi kƀĭn kdlưn hĭn kơ klei čih mkra hdră bhiăn, mbĭt anăn jing hdră mprăp klă klơ̆ng, yuôm bhăn êdi kơ Klei bi kƀĭn tal 2 mơ̆ng Anôk bruă kƀĭn ala gưl XVI. Hlăm ai tiê anăn, Khua Anôk bruă kƀĭn ala mtă brei mđing kơ 3 klei čiăng prŏng kơ bruă čih mkra hdră bhiăn: brei mdưm hnơ̆ng tŭ jăk, klei dưi leh anăn klei čiăng mđĭ kyar jing tal êlâo. Klei bi kƀĭn anei, Dhar bruă gĭt gai Anôk bruă kƀĭn ala srăng brei klei blŭ mguôp hŏng 31/41 hŏng hră čih hdră bhiăn, hdră mtrŭn mĭn tĭng ba mdah kơ Anôk bruă kƀĭn ala ti Klei bi kƀĭn tal 2; lu hdră bhiăn mâo hnơ̆ng čoh čuăn prŏng, hmăi prŏng kơ bruă ngă mơ̆ng anôk bruă knŭk kna, mnuih ƀuôn sang, anôk bruă duh mkra leh anăn hdră duh mkra.

Khua bruă kƀĭn ala mtă, hnơ̆ng bruă lu êdi, hruê mmông mjêč, ƀiădah amâo mâo kyua hnơ̆ng kčah ôh bi hrŏ hnơ̆ng tŭ jăk. Dŭm anôk bruă ba mdah brei mprăp hră mơar sĭt êmĭt, rơ̆ng kjăp kơ bruă kđi čar, hdră bhiăn, klei kreh knhâo leh anăn boh sĭt; hdră êlan brei klă, dưi ngă, mgaih msir djŏ boh klei mơ̆ng boh sĭt. Dhar bruă gĭt gai bruă kƀĭn ala mđing bi trông kơ dŭm bruă prŏng, dŭm mta adôk mâo klei blŭ mdê mdê, dŭm mta dưi mjing klei bi mlih klă sĭt.

"Klei mĭn jing: hdră bhiăn brei klă hĭn, hrăm mbĭt hĭn, ênưih hluê ngă hĭn; brei ruh mgaih anôk kpăk, bi hluh ai dưi leh anăn pŏk êlan kơ klei đĭ kyar. Tal dua, brei hyuă kjăp klei bhiăn mkŏ mjing hdră bhiăn leh anăn klei bhiăn mprăp Klei bi kƀĭn. Êjai ksiêm dlăng Hdră mkŏ mjing hdră bhiăn thŭn 2027, kâo mtă brei ruah mâo boh phŭn; mđing kơ dŭm boh klei mjêč, dŭm anôk kpăk hdră bhiăn leh anăn dŭm mta bruă mrâo čiăng bi leh klei bhiăn čiăng mtrŭt mđĭ klei đĭ kyar. Kâo mñă, čih anăn hlăm Hdră jing klei ƀuăn rơ̆ng kơ bruă klam. Hlei anôk bruă akâo kơ hdră bruă, bi mklă wưng ba mdah snăn brei čŏng pô mprăp, rơ̆ng hnơ̆ng leh anăn hnơ̆ng tŭ jăk; msir mghaih klei čih anăn lu, ƀiădah leh anăn akâo mdei, akâo lui, ngă hmăi kơ hdră bruă mbĭt."

Khua bruă kƀĭn ala mtă kơ knŭk kna ksiêm dlăng kjăp dŭm phŭn, dhar bruă čih anăn leh anăn lŏ akâo mdei amâodah lui ngă hmăi truh kơ hdră kluôm. Kyua anăn brei ktang phĭt, gĭr hluê ngă čiăng ruh mgaih klei dleh dlan, gun kpăk, čiăng kơ lăn čar đĭ kyar hlăm boh klei mrâo hŏng mta kñăm đĭ kyar dua ênoh mrô.

Brei thâo Klei bi kƀĭn tal 2 Anôk bruă kƀĭn ala mĭn tĭng ksiêm dlăng giăm 60 mta hŏng lu mta phŭn yuôm bhăn, Khua bruă kƀĭn ala mtă brei mprăp mơ̆ng hnưm, mơ̆ng kbưi, bi hgŭm mơ̆ng akŏ mtam; knŏng ba hlăm hdră dŭm mta phŭn klă sĭt djăp klei găl. Khua Anôk bruă kƀĭn ala mñă bruă ksiêm wĭt Klei bi kƀĭn amâo kčah hruê mmông tal Sa brei klă sĭt, kñăm mă klei hriăm čiăng lŏ dơ̆ng mđĭ lar, bi kjăp; mbĭt anăn lač klă dŭm klei êdu kƀah, mta phŭn leh anăn hdră msir mghaih, brei lač klă, lač sĭt. Ksiêm wĭt jing čiăng ngă jăk hĭn, amâo djŏ knŏng čiăng mjưh ruê̆ sa klei bi kƀĭn ôh./.