Hluê Phŭn bruă Lŏ hma, kahan êka êkeh lehanăn ala ƀuôn, lu mta kñăm Anôk bruă kƀĭn ala jao hlăm Hdră kčah mđĭ kyar bruă duh mkra – ala ƀuôn 2024 đăo tĭng dưi hluê ngă msĕ si: Ênoh luič bruă mă krĭng ƀuôn prŏng mkă tĭng ti gŭ 4%, hnơ̆ng mnuih mă bruă dưi mjuăt bi hriăm hlăm brô 70%; Hnơ̆ng mnuih mă bruă dưi mjuăt bi hriăm mâo hră mơar bi mklă mâo hlăm brô 28-28,5%. Tui si tĭng ênoh gŏ êsei ƀun hluê hnơ̆ng čuăn ƀun lu tĭng knhal jih thŭn 2024 hrŏ êbeh 1% mkă hŏng knhal jih thŭn 2023. Khă snăn, Kơiăng khua Dhar bruă ala ƀuôn Lâm Văn Đoan mtă brei ksiêm dlăng jih lehanăn hưn mthâo dŭm klei hmăi amâo mâo jăk mơ̆ng angĭn êbŭ mrô 3, mơ̆ng anăn mkă tĭng dŭm mta kñăm rơ̆ng klei djŏ klă:

 "Brei ksiêm bi mklă hnơ̆ng luič liê mơ̆ng angĭn êbŭ mrô 3 ngă, brei bi mklă wĭt mta kñăm dưi ngă mơ̆ amâodah hơaĭ. Hdră kơ sang dôk, mkăp leh ngăn prăk gưl dlông 8.000 êklai prăk đru kơ hlăm brô 100.000 gŏ sang ƀun, giăm ƀun hlăm kluôm ala, ƀiădah klei luič liê mơ̆ng angĭn êbŭ Yagi ngă mâo 257 boh sang, snăn brei drei lŏ wĭt bi tĭng klei anei.

Hưn mdah ti anôk bi kƀĭn brei ƀuh, thŭn 2024, mbĭt hŏng hdră krŭ wĭt lehanăn mđĭ kyar dŭm hdră ngă bruă, hdră duh mkra, wăl anôk mnuih mă bruă mâo mđing mđĭ kyar; mđĭ hdră bi hgŭm hlăm bruă anei, đru kơ mnuih mă bruă dưi duah bruă mă lehanăn gưl tal êlâo pŏk hdră hưn mthâo bruă mă hlăm kluôm ala hluê hdră online; pral đru kơ mnuih ƀuôn sang, mnuih luič bruă mă, bi hrŏ mmông mă bruă; bruă mă lehanăn hnư hrui wĭt mnuih mă bruă đĭ mkă hŏng thŭn 2023. Hdră mă bruă ti dŭm anôk bruă duh mkra krơ̆ng klei hơĭt kjăp, hdră ba mnuih nao mă bruă ti ala tač êngao mâo klei bi knăl jăk. Dŭm alŭ wăl hluê ngă ênŭm, pral, hdră mtrŭn jăk găl hŏng mnuih mâo bruă hŏng cách mạng, đru kơ yang ƀuôn, Ênua yang ƀuôn, Ênua luič bruă mă, bi hrŏ ƀun, dlăng kriê mnuih khua thŭn, phung hđeh mâo klei hdĭp dleh dlan… bruă tĭng tla amâo yua prăk hŏng mnuih dưn hdră mtrŭn đru kơ yang ƀuôn dưi mtrŭt mđĭ.

Hluê phung bi ala, Phŭn bruă Mnuih ngă bruă, kahan êka êkeh lehanăn yang ƀuôn, hdră mkăp prăk duh bi liê mơ̆ng knŭk kna dôk êmưt, hlăm anăn mâo prăk mkăp kơ hdră bi hrŏ ƀun hơĭt kjăp thŭn 2024. Kơiăng khua Dhar bruă ala ƀuôn Đỗ Thị Lan mtă:

“Thŭn 2024 prăk duh bi liê kơ dŭm hdră mă bruă mơ̆ng drei dôk ƀiă, mkăp prăk truh kơ mlan 8 knŏng mâo 47%. Truh kơ jih thŭn tĭng srăng mâo mkăp djăp. Hưn mthâo mă thiăm prăk duh kơ thŭn 2022 – 2023 ba yua kơ thŭn 2024, snăn si srăng hluê ngă, dưi mkăp jih hlăm thŭn 2024 mơ̆ amâo dah hơaĭ?

Hưn mdah bruă hluê ngă Hdră kčah mđĭ kyar bruă duh mkra – ala ƀuôn lehanăn Ngăn prăk knŭk kna thŭn 2024, tĭng hdră kčah lehanăn klei mkă tĭng ngăn prăk knŭk kna thŭn 2025 djŏ tuôm kơ klei mă bruă, mnuih mâo bruă tŭ dưn lehanăn ala ƀuôn, bi ala Phŭn bruă Mnuih ngă bruă, kahan êka êkeh lehanăn ala ƀuôn brei thâo, hŏng klei gĭt gai mơ̆ng Đảng, mơ̆ng Knŭk kna, Khua knŭk kna; hŏng klei gĭr mơ̆ng phung knuă druh, mnuih mă bruă hlăm kluôm anôk bruă lehanăn klei bi hgŭm kjăp mơ̆ng dŭm gưl, dhar bruă, dŭm alŭ wăl, Phŭn bruă Mnuih ngă bruă, kahan êka êkeh lehanăn ala ƀuôn mkŏ mjing leh hdră hluê ngă mđrao mbĭt, pral, tŭ dưn dŭm bruă klam, hdră pral msir mghaih, mâo klei blŭ hŏng dŭm hdră mtrŭn, hluê ngă bruă klam êjai, mđing msir mghaih dŭm klei dôk kpăk đuôm êjai.

Ti anôk bi kƀĭn, Dhar bruă ala ƀuôn mơ̆ng Anôk bruă kƀĭn ala mtă kơ Phŭn bruă Mnuih ngă bruă, kahan êka êkeh lehanăn ala ƀuôn bi mklă dŭm klei kpăk gun djŏ tuôm kơ klei đua klam mkăp prăk duh bi liê ăt msĕ mơh dŭm klei kpăk đuôm hlăm hră mơar ktrâo lač. Mơ̆ng anăn, ba mdah dŭm hdră kñăm mkă tĭng djŏ guôp bruă ngăn prăk, rơ̆ng klei êđăp ênang ala ƀuôn kơ mnuih ƀuôn sang./.