Ti să Ia Hiao, čar Gia Lai (dưi mkŏ mjing mơ̆ng bruă bi mŭt mbĭt 3 să Chrôh  Pơnan, să Ia Hiao leh anăn Ia Peng kdriêk Phú Thiệm hđăp) ai êwa mă bruă dŭm hruê knhal jih thŭn jing mtluk mtlak hĭn. Ti dŭm bĭt êlan krĭng ƀuôn sang, knuă druh, đảng viên leh anăn mnuih ƀuôn sang dôk bi ruh mgaih, myơr êlan pŏk phai ƀô̆ êlan čiăng mkra êlan dơ̆ng. Mơ̆ng êlan dơ̆ng phŭn mŭt ti ƀuôn Sômalơng A jing sang Siu Hiếu, khua dhar bruă mặt trận să Ia Hiao. Lăn anăp êlan hŏng grăp met truh kơ dŭm êtuh êklăk prăk mâo ñu myơr kơ hdră pŏk phai êlan. Siu Hiếu brei thâo:

“Srăng bi lar bruă klam mơ̆ng khua bruă mặt trận, jing pô ba anăp hlăm bruă čung ba mnuih ƀuôn sang kơ mkra êlan. Hdră ngă anei amâo djŏ knŏng hjăn ƀuôn ƀiădah wăt kluôm să Ia Hiao. Hmăng hmưi mnuih ƀuôn sang sa ai, mâo êlan prŏng hĭn leh anăn doh hĭn čiăng kơ mnuih ƀuôn sang mâo klei găl êrô êbat.”

Hdră pŏk phai êlan mơ̆ng 3m truh kơ 5,5m dưi ngă hrăm mbĭt. Knŏng hlăm wưng bhiâo, 52 gŏ sang myơr giăm 4.500m2 lăn, ruh êbeh 1.200m mnư̆ B40, mbĭt hŏng lu ana ƀơ̆ng boh, war êmô, sang hjiê, hŏng ênoh dŭm êklai prăk. Kyua klei sa ai anăn, 4 bĭt êlan leh anăn mnuôr êa, mâo boh taih giăm 2,5km dưi rŭ mjing djŏ hdră kčah, mgaih msir klei êa êngăp, klei čhŏ, ngă leh klei dleh dlan kơ mnuih ƀuôn sang hlăm lu thŭn êgao. Mnuih ƀuôn sang Ia Hiao tŭ drông hdră êlan anei hŏng klei đăo knang leh anăn bruă klam. Kpah Nghing, ƀuôn Sômalơng A brei thâo:

“Knŭk kna mkra êlan kâo hơ̆k mơak êdi kyua êlan điêt đei, êdei dih mnuih lu amâo lŏ mâo êlan nao ôh. Tal 2 jing êdeh êdâo kăn bi mmiă êlan lei. Kyuanăn bruă knŭk kna pŏk êlan djŏ hdră mnuih ƀuôn sang srăng myơr lăn.”

Ti alŭ Bình Trang, Nguyễn Văn Nhâm ăt sa ai êdi:

“Mđĭ kyar krĭng ƀuôn sang mrâo srăng pŏk êlan prŏng hmei tŭ ư leh anăn sa ai. Ară anei pŏk êlan si srăng pŏk, mkŏ mjing klei găl kơ mnuih ƀuôn sang pŏk prŏng êlan mđuĕ êa , tal 2 jing mnư̆ ăt pŏk jăk kơ mnuih ƀuôn sang hmei ăt tŭ ư êdi.”

Mtrŭt mjhar mnuih ƀuôn sang myơr lăn, pŏk phai dŭm bĭt êlan dơ̆ng phŭn jing sa hlăm 5 klei kdlưn hĭn mâo bruă Đảng să Ia Hiao bi klă mtam hlăm klei kƀĭn kluôm tal 1. Anei jing bruă klam dưi mkŏ mjing djŏ hŏng boh sĭt alŭ wăl, mjing tur knơ̆ng kơ gưl bruă Đảng nah gŭ, Bruă sang čư̆ êa leh anăn dŭm êpul bruă bi leh hdră êlan ngă bruă kơ jih wưng păn bruă. Hlăm anăn, Êpul bruă phung mniê să mâo bruă klam gĭt gai bruă čung ba mnuih ƀuôn sang – sa bruă dleh čiăng mâo klei mbruă, klei gĭr. Aduôn Trần Thị Minh Hiền, khua êpul bruă phung mniê să Ia Hiao brei thâo:

“Êpul bruă phung mniê să mâo lu mmông bi tuôm hŏng grăp sang, grăp čô čiăng mtrŭt mjhar mnuih ƀuôn sang thâo kơ hdră êlan čiăng pŏk êlan leh anăn mkra mnuôr êa amâo djŏ knŏng bi mlih leh anăn mkŏ mkra krĭng ƀuôn sang ƀiădah lŏ mkŏ mjing klei găl kơ mnuih ƀuôn sang hdĭp ti alŭ wăl êrô êbat, bi hrŏ klei êngăp êa êjai truh yan hjan.”

Klei kƀĭn ăt bi klă hdră êlan: Bruă Đảng kpă ênuah, Bruă sang čư̆ êa kpă ênô – mkŏ ming – ngă bruă, Mặt trận leh anăn dŭm êpul bruă kđi čar – yang ƀuôn jing mta kñăm bi mguôp mnuih ƀuôn sang. Grăp êpul bruă dưi jao bruă klam, đru gui bruă klam mơ̆ng Bruă sang čư̆ êa, mkŏ mjing klei ngă bruă mbruă, đua klam leh anăn sa ai. Khădah sơnăn, klei dleh dlan adôk. Bùi Hữu Tâm, k’iăng khua bruă Đảng să Ia Hiao ktrâo klă:

“Êpul khua bruă Đảng bi klă dŭm klei dleh dlan hlăm klei ngă bruă, wưng ngă bruă leh anăn klei brei čan knŏng ngă truh hruê 31/12 thŭn 2025 kyuanăn hlăm klei ngă bruă srăng ngă lu hdră êlan, thâo klă klei hưn ƀuh mnuih ƀuôn sang sa ai hŏng bruă pŏk phai leh anăn mkra mđĭ êlan, leh anăn bi myơr lăn, mnơ̆ng yua amâo guôn čiu tla.”

Hlăm dŭm bĭt êlan dôk pŏk phai, dŭm hdră bruă dôk rŭ mjing…jing klei bi klă hĭn kơ ai tiê mnuih ƀuôn sang thâo, mnuih ƀuôn sang bi trông, mnuih ƀuôn sang ngă, mnuih ƀuôn sang dưn. Êjai hdră êlan prŏng dưi bi klă hŏng bruă klă klơ̆ng, hŏng klei bi hmô mơ̆ng knuă druh, klei sa ai mơ̆ng mnuih ƀuôn sang srăng jing ai ktang bi lar hlăm klei hdĭp.  Anăn ăt jing mmông hdră mtrŭn mơ̆ng Đảng klă sĭt nao hlăm klei hdĭp, mkŏ mjing tur knơ̆ng mlih mrâo grăp krĭng ƀuôn sang.