Ênuah lehanăn mâo klei đua klam. Anăn jing klei phung bi ala ƀuh mơ̆ng phung bi ala hlăm dua hrue mkrah ngă klei êmuh lehanăn wĭt lač klei êmuh. Phung bi ala bruă kƀĭn ala mâo dŭm klei êmuh khuăt đŭt, klă mngač, djŏ hŏng bruă čiăng êmuh, lač djŏ klă hŏng klei hdĭp, boh nik, amâo mâo mdăp ôh bơ̆k bâo kơ dŭm bruă hlăk mjêč hlăm ƀuôn sang. Hŏng klei klă mngač, bi êdah jih dŭm klei awăt kƀah, phung bi ala čang hmăng kơ knŭk kna, dŭm phŭn dhar bruă lŏ dơ̆ng mghaih msir, hŏng klei tŭ jing, kyua klei čiăng mđĭ kyar pral, kjăp kơ lăn čar:

“Klei êmuh mâo mkŏ mjing hlăm ai êwa klă mngač, ƀuh dơ̆ng mơ̆ng bruă kiă kriê mơ̆ng êpul khua kiă kriê, lehanăn dŭm klei êmuh, lehanăn klei wĭr lač mơ̆ng phung khua prŏng, k’iăng khua knŭk kna ƀuh hlăm klei klă mngač, lehanăn thâo bi mkŏ mjing”.

Băng: - Jih jang klei phung bi ala êmuh ba hriê leh kơ anôk kiă kriê bruă, dŭm mta klei wĭt lač ăt djŏ lehanăn klă mngač mơh. Kâo ƀuh jing jăk êdi hŏng hdră tui si khua phŭn bruă bi êdah”.

4 čô khua knơ̆ng mâo wĭt lač leh klei êmuh, jing phung khua phŭn bruă, khua dharr bruă gưl tal êlâo wĭt lač klei phung bi ala êmuh   ti anôk bi kƀĭn bruă kƀĭn ala gưl 15. Hŏng klei đua klam klă mngač, mâo klei ƀuăn hlăm klei kiă kriê, gĭt gai, phung khua phŭn bruă, khua dharr bruă amâo mâo klei ñĕ đuĕ ôh hŏng jih jang klei êmuh, lehanăn klei phung bi ala bi mgăl, mâo mtam hdră hŏng klei klă mngač wĭt lač jih dŭm klei phung bi ala êmuh. Mâo đa đa phung bi ala lač snei;

 “Kâo ƀuh khua phŭn bruă ngăn dŏ wăl hdĭp mda mâo klei kjăp ai tiê hĭn wĭt lač ti anăp jih jang klei phung bi ala êmuh. Jih jang klei khua phŭn bruă wĭt lač mâo 1 kdrêč 5 kâo ư ai. Kâo yơr mtam mâo klei čiăng mgăl brei bi mngač jih jang bruă ngă dôk bi ksĭng êlah êa ksĭ, kơ klei mă čuah lač, kơ klei jhat hlăm wăl êa ksĭ”.

 “Bruă duh mkra mnia mblei, anôk bruă knŭk kna kiă kriê bi mâo hĕ klei ksiêm duah, tĭng wĭt ya mta boh klei phung duh mkra kdŭn đuĕ mơ̆ng klei bi mnia mblei. Phuing duh mkra anăn ya mta bruă diñu ngă? Dŭm boh sui diñu mă bruă, čiăng bi mâo dŭm hdră êlan mă bruă bi djŏ. Mâo msĕ snăn kơh srăng dưi đru phung duh mkra”.

 Wĭt lač hŏng bruă kƀĭn ala, Khua phŭn bruă ngăn dŏ, wăl hdĭp mda Đặng Quốc Khánh bi êdah klă dŭm mta klei dleh dlan kơ mnơ̆ng rŭ mdơ̆ng pioh ngă dŭm mta bruă prŏng kơ lăn čar, boh nik jing bruă mkra êlan dơ̆ng pral, bi êdah dŭm hdră êlan čiăng kơ bi kơrŭ bruă knuă mơ̆ng dŭm hnoh krông leh tloh ênuê kyua klei čhŏ djhan.

 Mđing kơ klei duh mĭn dlăng kriê dhar kreh djăp djuê ana, Khua phŭn bruă dhar kreh- mjuăt asei mlei lehanăn hiu čhưn ênguê Nguyễn Văn Hùng lač: Mkŏ mjing klei bhiăn kơ dharr kreh nah gŭ jing klei năng brei ngă pioh mkŏ mjing anôk kơ bruă mđĭ kyar dhar kreh. Lehanăn mjing dŭm hdră êlan mrâo pioh kơ phung mbruă, phung bi lông mâo klei găl hlăm bruă pô čiăng ngă.

Wĭt lač ti anăp bruă kƀĭn ala, k’iăng khua knŭk kna Trần Hồng Hà mñă kơ dŭm hdră mkhư̆ klei prăk luič ênoh, lehanăn ngă bruă mđĭ prăk mlan mơ̆ng hrue 01/7 tinăp. Phạm Thị Thanh Mai, êpul mơ̆ng Hà Nội lač:

"K’iăng khua knŭk kna jing mnuih mâo leh klei thâo hlăm bruă wĭt lač klei êmuh ti anăp anôk bruă kƀĭn ala. Hmei ƀuh jih jang klei êmuh ñu, mâo ñu wĭt lač djŏ boh phŭn kơ klei êmuh, lehanăn kơ ya mta klei hmei čiăng ñu mblang brei jih kơ hdră êlan srăng mă bruă, snăn ƀuh ñu wĭt lač hŏng klei klă mngač. Klei anei jing yuôm bhăn êdi hŏng phung bi ala, hŏng mnuih ƀuôn sang, lehanăn bruă kƀĭn ala kăp ksiêm’.

Mbĭt hŏng jih jang hdră mghaih msir, lehanăn jih klei phung khua phŭn bruă, khua dharr bruă ƀuăn ti anôk bi kƀĭn tal anei, čang hmăng mâo klei kăp ksiêm kơ jih bruă hlue ngă klei leh ƀuăn, kñăm mđĭ boh tŭ klei wĭt lač, ba wĭt klei tŭ dưn sĭt hlăm bruă knuă./.