Ti anôk bi tuôm hŏng mnuih ƀuôn sang, Êpul bi ala bruă kƀĭn ala čar Lâm Đồng hâo mdah hŏng mnuih ƀuôn sang hlăm čar čoh čuăn hrue mmông, mta klei bi kƀĭn tal 10, bruă kbĭn ala gưl 15. Ti anôk bi kƀĭn srăng mkŏ mjing  mơ̆ng hrue 20/10 - 12/12 bruă kƀĭn ala srăng ksiêm dlăng, bi mklă truh 43 bruă čih mkra hdră bhiăn, hdră mtrŭn dôk hlăm bruă mkŏ mjing klei bhiăn; 12 êpul bruă kơ klei duh mkra ala ƀuôn, ngăn prăk knŭk kna, ksiêm dlăng jih jang bruă yuôm bhăn, mbĭt anăn mâo 134 mta klei mâo dŭm anôk bruă mơĭt klei hâo mdah čiăng kơ phung bi ala bruă kƀĭn ala ksiêm duah.

Mnuih ƀuôn sang čar Lâm Đồng bi êdah klei đăo knang kơ klei Đảng, klei bruă kƀĭn ala ksiêm dlăng, lehanăn klei kiă kriê kjăp mơ̆ng knŭk kna hlăm bruă mđĭ kyar klei duh mkra ala ƀuôn; čih pioh dŭm klei gĭr hgao klei dleh dlan mơ̆ng čar čiăng bi mâo klei đĭ kyar bruă duh mkra 9 mlan akŏ thŭn truh 6,8% lehanăn ênoh hrui ngăn prăk mơ̆ng knŭk kna mâo giăm 23.600 êklai prăk knar 84% ênoh alŭ wăl tĭng, đĭ hĭn  19% mkă hŏng wưng anei thŭn dih, ksiêm wĭt bruă msir klei sang tĭ ƀrôč, lehanăn amâo mâo hrui mă ôh prăk hriăm hră mơar mơ̆ng hđeh hriăm hră tui si Đảng, Knŭk kna mtrŭn leh.

Mđing djŏ kơ bruă sang hră mơar, mnuih ƀuôn sang čar Lâm Đồng lač, ksiêm dlăng bi nik klei amâo mâo mkŏ mjing ôh klei bi lông jih gưl 3, kyua lu boh čar grăp thŭn mâo hnơ̆ng hđeh dưi hlăm klei bi lông lu sơăi. Knŏng hlue ngă dŭm klei gĭt gai mơ̆ng phŭn bruă kđi čar bi ksiêm dlăng bruă sang hră mơar, rơ̆ng bi mâo hdră êlan sa hnơ̆ng kơ hdruôm hră hriăm hlăm kluôm ala, mkă tĭng kơ bruă bi hrŏ klei hđeh hriăm hră djă yua đĭng blŭ hlăm sang hră mơar, klei lu đei phung hđeh hlăm sa boh adŭ ti Đà Lạt; mbĭt hŏng klei mtô bi hriăm dŭm mta klei thâo săng hlăm sang hră, dŭm boh sang hră lŏ mđing mjuăt mtô kơ knhuah dôk dơ̆ng ƀơ̆ng huă hlăm phung hđeh hriăm hră…

Mnuih ƀuôn sang krĭng taih kbưi čar akâo duh bi liê bruă mkra êlan klông čiăng kơ găl ênưih hlăm klei găn êrô, duh ƀơ̆ng lehanăn mnia mblei. Bi kơ klei bruă sang čư̆ êa dua gưl, mnuih ƀuôn sang čar Lâm Đồng, lač, leh giăm 3 mlan mă bruă, dŭm alŭ wăl mâo ngă leh jih jang bruă hŏng klei tŭ dưn kơ mnuih ƀuôn sang. Ƀiădah tui si pô bi ala Lê Văn Thái, ti ƀuôn hgŭm Lâm Viên- Đà Lạt, bi êdah dŭm klei gun kpăk, ka dưi mghaih msir čiăng kơ jih jang bruă dôk dleh ktrŏ:

 “Bruă dăp knuă druh, mnuih mă bruă msĕ si ară anei ka knar ôh hŏng ênoh mnuih, ngă truh kơ klei mă bruă jing ktrŏ. Knuă druh, mnuih mă bruă bi mghaih msir jih jang bruă knuă prŏng hmăi amâo mâo jăk kơ boh tŭ bruă knuă mâo kčah jao hlăm klei mă bruă kơ mnuih ƀuôn sang. Čang hmăng kơ phung bi ala bruă kƀĭn ala, bi mtruh hŏng anôk bruă kƀĭn ala, hŏng knŭk kna lehanăn dŭm phŭn dhar bruă djŏ tuôm lŏ ksiêm dlăng, bi mlih lehanăn mâo dŭm klei bhiăn ruah mdưm knuă druh mă bruă ti gưl ƀuôn hgŭm djăp ênoh čuăn mka tĭng hŏng ênoh mnuih, hŏng ênhă anôk lehanăn klei jing mơ̆ng grăp alŭ wăl”.

Ti anôk bi tuôm hŏng mnuih ƀuôn sang, Y-Thanh Hà Niê Kđăm, Khua bruă Đảng čar, khua êpul bi ala bruă kƀĭn ala čar Lâm Đồng mâo čih pioh leh truh 16 klei blŭ yuôm bhăn mơ̆ng mnuih ƀuôn sang pioh kơ bruă mđĭ kyar čar. Boh nik hlăm klei pŏk mlar klei găl, klei dưi mơ̆ng čar Lâm Đồng mrâo lehanăn bi mŭt mbĭt 3 boh čar Daknông, Bình Thuận lehanăn Lâm Đồng. Phung bi ala bruă kƀĭn ala, knơ̆ng bruă sangh čư̆ êa čar Lâm Đồng mbĭt hŏng dŭm knơ̆ng dhar bruă hlăm čar ăt wĭt lač dŭm klei akâo mơ̆ng mnuih ƀuôn sang, djŏ hlăm bruă pô klam lehanăn klei dưi pô./.