Êpul bi ala bruă kƀĭn ala čar Gia Lai mơ̆ng Châu Ngọc Tuấn, kiăng khua bruă Đảng čar, khua êpul bi ala bruă kƀĭn ala čar ngă Khua êpul mrâo ngă bruă ksiêm dlăng kơ klei kriê dlăng, ba yua ngăn drăp knŭk kna jing anôk mă bruă ti alŭ wăl ƀuôn hgŭm Quy Nhơn.

Ară anei Knơ̆ng bruă sang čư̆ êa ƀuôn hgŭm Quy Nhơn kriê dlăng 5 anôk phŭn ngă bruă, hŏng ênhă lăn êbeh 5.757 m2. Bruă dăp anôk bruă kơ êpul mă bruă leh mkŏ dăp djŏ guôp hŏng klei čiăng sĭt. Mâo 4 hlăm ênoh 5 anôk dôk dưi dăp, ba yua ngă bruă mơ̆ng Knơ̆ng bruă sang čư̆ êa ƀuôn hgŭm leh anăn dŭm anôk bruă, êpul êya, rơ̆ng kơ klei mă bruă amâo mâo kpăk gun. Mơ̆ng klei ksiêm dlăng hră mơar lăn ala, jih 5 anôk mâo leh ƀuôn hgŭm ksiêm dlăng kơ klei bhiăn.

Ƀiădah, bruă kriê dlăng, ba yua ngăn drăp knŭk kna ăt adôk mâo dŭm klei dleh dlan. Dŭm hră mơar klei bhiăn, hră mơar lăn ala, hră mơar hdră mnêč ka djăp ênŭm; klei čih pioh ngăn drăp dưi tŭ mă mơ̆ng lu phŭn, mơ̆ng lu ênuk snăn brei lŏ mkra mlih, tĭng mkă leh anăn hưn mdah. Dŭm anôk bruă yua sui thŭn mâo klei bi knăl jhat rai, brei mkra mđĭ, hlăk êjai prăk bi liê dôk knang kơ klei bi kna ngăn prăk.

Klah čŭn klei ksiêm dlăng, Khua êpul bi ala bruă kƀĭn ala čar Gia Lai Châu Ngọc Tuấn brei thâo, Gia Lai jing sa hlăm 12 čar, ƀuôn prŏng mâo Dhar bruă gĭt gai bruă kƀĭn ala ruah ksiêm dlăng gưl dlông thơ̆ng kơ bruă hluê ngă hdră êlan, hdră bhiăn kriê dlăng, ba yua ngăn drăp knŭk kna jing anôk mă bruă leh mkŏ dăp anôk bruă, anôk bruă knŭk kna.

Êpul bi ala bruă kƀĭn ala čar mtă kơ ƀuôn hgŭm Quy Nhơn lŏ dơ̆ng ksiêm dlăng, bi leh hră mơar hdră bhiăn hŏng dŭm anôk bruă sang, lăn; mđĭ ktang ksiêm dlăng, ktuê dlăng bruă kriê dlăng, ba yua ngăn drăp knŭk kna.

Boh nik, brei ksiêm dlăng kjăp dŭm sang dhar kreh, anôk bi kƀĭn êpul êya ti dŭm êpul mnuih ƀuôn sang êgao hdră mkŏ dăp, rơ̆ng djŏ klei čiăng bi kƀĭn mơ̆ng mnuih ƀuôn sang, ñĕ kơ bruă msir mgaih ngăn drăp hluê hdră ngă hmăi amâo jăk kơ wăl anôk bi kƀĭn mbĭt.

Ti Dak Lak, Êpul bi ala bruă kƀĭn ala čar ăt hluê ngă leh hdră ksiêm dlăng bruă hluê ngă hdră anei ti ƀuôn hgŭm Ƀuôn Ama Thuôt. Leh pŏk ngă gru hmô bruă sang čư̆ êa alŭ wăl dua gưl, Knơ̆ng bruă sang čư̆ êa ƀuôn hgŭm Ƀuôn Ama Thuôt, čar Dak Lak tŭ mă kriê dlăng 64 anôk bruă sang, lăn, hlăm anăn 13 anôk bruă ară anei dôk êbeh, ka dăp ba yua. Bruă msir mghaih dŭm ngăn drăp anei tuôm hŏng lu klei dleh dlan. Trịnh Vũ Quang, Khua anôk bruă mkăp brei hdră bruă knŭk kna kriê dlăng ƀuôn hgŭm Ƀuôn Ama Thuôt brei thâo, ƀuôn hgŭm dôk tuôm hŏng klei kpăk hlăm bruă bi mklă ênoh mưn tơdah dua hră mtrŭn mơ̆ng Phŭn bruă ngăn prăk leh anăn Phŭn bruă rŭ mdơ̆ng amâo mâo sa hnơ̆ng, ktrâo lač mdê mdê:

“Hluê si Hdră mtrŭn mơ̆ng Phŭn bruă rŭ mdơ̆ng kčah mtrŭn thŭn ba yua soh hŏng Hdră mtrŭn 141 mơ̆ng Phŭn bruă ngăn prăk. Sitôhmô ngăn drăp bruă nah gŭ gưl 3 wưng ba yua jing 50 thŭn, ƀiădah tĭng mkă klei luč liê ngăn drăp hluê si Hdră mtrŭn 141 mơ̆ng Phŭn bruă ngăn prăk snăn knŏng mâo 25 thŭn. Kyua anăn, ênoh ngăn drăp adôk ba yua jing yuôm bhăn snăk, ƀiădah tĭng mkă klei luč liê snăn adôk wưng bhiâo snăk. Kyua anăn, dleh dlan hlăm bruă bi klă ênoh mưn yua."

Mơ̆ng boh sĭt ti dlông, êpul ksiêm dlăng mdưm boh phŭn: brei bi mklă ngăn drăp knŭk kna êbeh jing klei ktrŏ kriê dlăng amâo dah ai dưi mđĭ kyar. Hdră ngă bruă ngăn drăp knŭk kna êbeh mơ̆ng dŭm alŭ wăl srăng bi mklă hdră mtrŭn hlăm wưng kơ anăp.

Lê Đào An Xuân, K'iăng khua êpul thơ̆ng kơ bruă mơ̆ng Anôk bruă kƀĭn ala čar Dak Lak čih yap klei hur har leh anăn ktang phĭt mơ̆ng ƀuôn hgŭm Ƀuôn Ama Thuôt. Hŏng dŭm klei dleh dlan, gun kpăk leh anăn klei akâo mơ̆ng ƀuôn hgŭm, Êpul čih yap, bi mklă hlăm hdră ksiêm dlăng ti dŭm să, ƀuôn hgŭm mkăn čiăng hưn hŏng Bruă kƀĭn ala. Bruă kriê dlăng, ba yua ngăn drăp knŭk kna jing anôk bruă nah gŭ leh hluê ngă hdră mkŏ dăp anôk bruă leh anăn anôk bruă knŭk kna jing boh klei mjêč, dôk mâo mnuih ƀuôn sang, mnuih ƀuôn sang kluôm ala mđing dlăng.

"Bruă mă yua ngăn drăp, boh nik jing anôk bruă leh mkŏ dăp snăn brei hluê ngă tŭ dưn, đăm luič liê mang. Bruă kƀĭn ala srăng mkŏ mjing klei ksiêm dlăng gưl dlông hlăm thŭn anei hŏng jih jang dŭm čar ƀuôn prŏng kơ bruă anei".

Mơ̆ng klei ksiêm dlăng boh sĭt ti Gia Lai leh anăn Dak Lak, dŭm klei kpăk hlăm bruă kriê dlăng, ba yua anôk bruă leh anăn ngăn drăp knŭk kna leh mkŏ dăp dưi thâo ƀuh klă hĭn. Anei ăt jing tur knơ̆ng čiăng kơ dŭm êpul bi ala bruă kƀĭn ala bi mklin, akâo bi leh hdră êlan, rơ̆ng ngăn drăp knŭk kna dưi kriê dlăng kjăp, ba yua djŏ mta kñăm, tŭ dưn, ñĕ kơ klei luč liê mang leh anăn mkăp jăk hĭn kơ klei hdĭp mnuih ƀuôn sang.