Hlăm klei ksiêm êmuh, pô bi ala Phan Thị Hà Phước, Khua êpul bruă duh mkra - ngăn prăk Êpul gơ̆ng bruă ƀuôn sang čar Dak Lak lač, lu ênoh čuăn bruă duh mkra msĕ si bruă ti tia mkra mjing, mnia mblei, hiu čhưn ênguê leh anăn ênoh knơ̆ng bruă mkŏ mjing mrâo đĭ sơăi mkă hŏng wưng anei thŭn dih, ƀiădah ênoh knơ̆ng bruă kruh ruh, mdei ngă bruă ăt mâo lu mơh. Wĭt lač klei êmuh mơ̆ng phung bi ala kơ dŭm mta bruă tŭ lu klei dleh dlan leh anăn hdră êlan čiăng bi hơĭt wăl duh bi liê, mnia blei, mkăp kơ mta kñăm đĭ kyar 2 ênoh mrô, Cao Đình Huy, Khua Knơ̆ng bruă ngăn prăk čar Dak Lak brei thâo, 6 mlan akŏ thŭn kluôm čar mâo êbeh 420 anôk bruă duh mkra mnia mblei kruh rai leh anăn êbeh 1.200 knơ̆ng bruă mdei êjai ngă bruă, lu jing knơ̆ng brưa điêt leh anăn man dưn hlăm dŭm mta bruă mnia blei, rŭ mdơ̆ng, sang lăn, dŭ mdiăng, dôk jưh leh anăn huă ƀơ̆ng. Čiăng ruh mgaih klei dleh dlan anei, Cao Đình Huy brei thâo:

“Knơ̆ng bruă ngăn prăk ƀuăn rơ̆ng hlăm wưng ti anăp snăn lŏ dơ̆ng ktuê dlăng kjăp klei ngă bruă mơ̆ng anôk bruă duh mkra ti alŭ wăl c̆ar c̆iăng hmao đru kc̆ĕ kơ Anôk bruă sang c̆ư̆ êa c̆ar dŭm hdră msir ruh mtlaih klei dleh dlan kơ êpul êya knơ̆ng bruă, bi hrŏ ênoh anôk bruă duh mkra kbiă mơ̆ng anôk mnia mblei, mđĭ ênoh knơ̆ng bruă lŏ wĭt ngă bruă lehanăn mđĭ hnơ̆ng tŭ jăk anôk duh mkra mkŏ mjing mrâo. Amâo djŏ knŏng đru pŏk mlar hnơ̆ng mkra mjing, mkŏ mjing thiăm bruă mă leh anăn mđĭ hnư hrui wĭt, ƀiădah lŏ mkŏ mjing boh kdrŭt đĭ kyar kơ bruă duh mkra čar.

Sa hlăm dŭm klei kpăk ti Dak Lak jing knơ̆ng bruă lĭng čan ka mâo ôh klei găl. Nguyễn Kim Cương, Khua knơ̆ng bruă ngăn prăk anôk bruă alŭ wăl 11 brei thâo, truh kơ knhal jih mlan 6, ênoh prăk brei čan ti alŭ wăl čar Dak Lak mâo hlăm brô 281.700 êklai prăk, đĭ êbeh 21.000 êklai prăk mkă hŏng akŏ thŭn. Ƀiădah, ênoh prăk brei kơ knơ̆ng bruă điêt leh anăn man dưn mâo hlăm brô 13% ênoh prăk brei čan. Hluê si ñu, bruă knơ̆ng bruă dleh dlan hlăm klei lĭng čan mâo mơ̆ng klei klă mngač kơ bruă ngăn prăk leh anăn klei thâo kiă kriê.

“Brei bi kah ngăn prăk mơ̆ng knơ̆ng bruă hŏng ngăn prăk gŏ sang, mơ̆ng mnuih ngă khua knơ̆ng čiăng dưi bi mklă jing bruă pô ngă bi êdah kluôm ênŭm hlăm hră mơar. Boh nik hlăm boh klei bi mklă hră mơar tĭng tla ăt msĕ mơh hưn mdah ênoh jia ƀrư̆ hruê ƀrư̆ brei klă mngač hĭn. Anei jing klei găl tal êlâo hĭn hmei čiăng mtă kơ dŭm anôk bruă duh mkra điêt leh anăn man dưn tơdah nao hgŭm hlăm hdră duh mkra mnia mblei ăt msĕ mơh klei bi mjĕ čan prăk dôk hŏng dŭm knơ̆ng prăk".

Tơdah ênoh prăk jing klei găl čiăng rơ̆ng kơ klei ngă bruă, anôk mnia blei jing klei găl brei knơ̆ng bruă đĭ kyar. Kyuanăn, hlăm klei ksiêm êmuh, bruă mtrŭt mđĭ klei mnia mblei, pŏk mlar anôk mnia mblei ăt dưi hưn mdah. Bi kơ bruă anei, Nguyễn Thị Thu An, khua knơ̆ng bruă tuh tia čar Dak Lak brei thâo, 6 mlan akŏ thŭn, dhar bruă đru leh kơ hlăm brô 150 gưl knơ̆ng bruă, êpul hgŭm bruă nao hgŭm mtrŭt mđĭ klei mnia mblei, mkŏ klei ba čhĭ hlăm leh anăn êngai lăn čar, mbĭt anăn mtrŭt mđĭ klei mnia mblei online leh anăn bi mlih mrô. Hlăm wưng kơ anăp, bruă mtrŭt mđĭ klei mnia mblei srăng lŏ dơ̆ng bi mlih hluê si klei čiăng klă sĭt mơ̆ng knơ̆ng bruă, boh nik jing ti dŭm anôk mnia mblei ala tač êngao.

“Kơ anôk mnia mblei hŏng ala tač êngao, hmei srăng mă mơ̆ng klei čiăng mơ̆ng anôk bruă duh mkra. Jing ya mta klei čiăng hlăm anôk anăn, ya mta mnơ̆ng dhơ̆ng srăng đru, si srăng bi hgŭm leh anăn hmei srăng mkŏ mjing hdră mkăp kơ dŭm klei čiăng anăn mbĭt hŏng anôk bruă duh mkra”.

Klei êmuh brei ƀuh klei gĭr mơ̆ng čar Dak Lak hlăm bruă dlăng klă dŭm klei dôk mâo hlăm wăl anôk duh bi liê, mnia mblei. Dŭm hdră êlan dưi ba mdah ăt mđing truh kơ mta kñăm bi hluh ai dưi, krŭ wĭt êpul êya anôk bruă duh mkra, mjing tur knơ̆ng čiăng kơ Dak Lak hluê ngă mta kñă đĭ kyar 2 ênoh mrô hlăm wưng ti anăp.