Ti anôk bi kƀĭn, Trương Văn Đạt, kơiăng khua Êpul gơ̆ng bruă ƀuôn sang čar Gia Lai, hưn mthâo leh dŭm mta djŏ tuôm kơ bruă knuă druh. Hluê si hdră mtrŭn mơ̆ng Dhar bruă gĭt gai anôk bruă kƀĭn ala, čar Gia Lai wưng thŭn 2021-2026 mâo 119 čô bi ala. Mbĭt anăn, dŭm anôk bruă phŭn mơ̆ng Êpul gơ̆ng bruă ƀuôn sang čar Gia Lai ăt dưi hưn mthâo klă klơ̆ng. Rah Lan Chung, Kơiăng khua bruă Đảng čar, dưi ruah ngă Khua Êpul gơ̆ng bruă ƀuôn sang čar Gia Lai.Phung kơiăng khua Êpul gơ̆ng bruă ƀuôn sang lehanăn Khua dŭm anôk thơ̆ng kơ bruă ăt dưi ruah ênŭm. Leh kơnăn, Êpul gơ̆ng bruă ƀuôn sang čar Gia Lai hưn mthâo leh klei bi mklă mơ̆ng Khua knŭk kna kơ bruă knuă druh mơ̆ng Anôk bruă sang čư̆ êa čar Gia Lai wưng thŭn 2021-2026. Hlăm anăn, Phạm Anh Tuấn, Kơiăng khua bruă Đảng čar, dưi ruah ngă Khua Anôk bruă sang čư̆ êa čar Gia Lai, 6 čô kơiăng khua Anôk bruă sang čư̆ êa klam kơ dŭm anôk bruă mâo kah mbha mdê mdê.

Blŭ hrăm ti anăp Êpul gơ̆ng bruă ƀuôn sang, Phạm Anh Tuấn, Khua Anôk bruă sang čư̆ êa čar Gia Lai ƀuăn rơ̆ng snei:

 “Ƀuăn rơ̆ng ngă bruă hŏng ai tiê mĭn mjing mrâo, kpă mngač, đua klam lehanăn tŭ dưn, hlăm anăn mă hdră mtrŭn jing mta phŭn ngă bruă, mjing boh kdrŭt, hdră êlan kluôm dăl hlăm hdră kriê dlăng lehanăn ngă bruă. Hrăm mbĭt hgŭm kngan, ai tiê, sa ai gĭr bi leh mđrăm mbĭt lehanăn tŭ dưn kyua sa êdei anăp đĭ kyar năng hŏng Gia Lai mrâo mđing truh kơ mta kñăm mkŏ mkra Gia Lai jing alŭ wăl đĭ kyar kjăp, bi knar, mrâo mrang, jiă knhuah dhar kreh lehanăn khăp čiăng, krĭng lăn mâo grăp anôk bruă duh mkra, mnuih ƀuôn sang čang hmăng đru mguôp kơ hdră mđĭ kyar krĭng ƀuôn sang pô.

Ti anôk bi kƀĭn, phung bi ala mđing bi trông, ba mdah klei blŭ kơ dŭm klei čih mkra hdră mtrŭn yuôm bhăn, mâo: Mkŏ mjing dŭm anôk bruă hlăm Êpul gơ̆ng bruă ƀuôn sang čar Gia Lai.  

Hdră kčah mkŏ mjing klei bi kƀĭn grăp gưl mơ̆ng Êpul gơ̆ng bruă ƀuôn sang čar. Mkŏ mjing dŭm anôk thơ̆ng kơ bruă lehanăn mkŏ mjing anôk bruă knŭk kna hlăm Anôk bruă sang čư̆ êa čar Gia Lai. Bi mklă anăn phung mă bruă hlăm Knơ̆ng phat kđi yang ƀuôn čar Gia Lai mrâo… Dŭm mta phŭn anei dưi dlăng jing sa knhuang tal êlâo hlăm bruă bi ênŭm anôk bruă knŭk kna mơ̆ng čar, rơ̆ng hdră mă bruă tŭ dưn lehanăn mđrăm mbĭt hlăm wưng păn bruă mrâo.

Blŭ hrăm ti anôk bi kbĭn, Hồ Quốc Dũng, Khua bruă Đảng čar Gia Lai, mñă: 

 “Kâo mtă kơ phung khua kiă kriê alŭ wăl mrâo mkŏ dăp ngă mtam bruă, čih mkra klăklơ̆ng hdră mă bruă čiăng pŏk hluê ngă hŏng klei kreh knhâo, tŭ dưn, bi leh jih bruă klam mâo kčah jao hlăm wưng ti anăp. Đăo knang hŏng klei thâo, hŏng knhuah gru mâo leh, ai tiê hgŭm mguôp lehanăn klei čang hmăng kpưn đĭ mơ̆ng Gia Lai mrâo, hŏng klei gĭr bruă kđi čar mrâo, mđing truh jing sa čar ba akŏ mơ̆ng lăn dap kngư lehanăn ktuê hang ksĭ Dhŭng kwar Krah hrăm mbĭt hŏng ala čar mŭt hlăm wưng mrâo.

Klei bi kƀĭn tal sa Êpul gơ̆ng bruă ƀuôn sang čar Gia Lai gưl XII jing sa knhuang nao yuôm bhăn čiăng ơ Gia Lai mđing truh kơ mta kñăm đĭ kyar hơĭt kjăp jing sa alŭ wăl ba akŏ hlăm krĭng lehanăn kluôm ala čar./.