Đảng viên Đặng Dậu Quý kkiêng thŭn 1983 ti să Čư̆ Suê, kdriêk Čư̆ Mgar, ruĕ hriăm jih gưl prŏng nao mă bruă ti sa boh knơ̆ng prăk hlăm čar Daklak hŏng ênoh prăk mlan lu mơh. Ƀiădah, leh giăm 10 thŭn, ƀuh bruă knuă ti knơ̆ng prăk amâo mâo lŏ guôp ôh, ñu mdei bruă tui si sa bruă ñu khăp anăn jing ngă lŏ hma. Mâo leh anôk truh 1,6 ha lăn hma mơ̆ng amĭ ama mbha, lŏ mguôp mbĭt hŏng prăk mâo mkuôm pioh mơ̆ng hlăk dôk ngă bruă ti knơ̆ng prăk, ñu jhŏng duh bi liê lŏ wĭt rŭ hĕ jih 800 phŭn kphê leh khua, lŏ dơ̆ng čan prăk ti knơ̆ng prăk lŏ pla pluă truh 300 phŭn tiu, lehanăn giăm 100 phŭn ana boh durian.

       Phŭn tal êlâo, kyua ka thâo lehanăn ka mưng mơh hŏng bruă knuă, snăn lu ana tiu, lehanăn ana boh durian djiê, snăn ñu luič liê prŏng. Kăn êdu ai rei, ñu lŏ dơ̆ng čan prăk mơ̆ng găp djuê, lehanăn mơ̆ng mah jiăng lŏ pla hrô ti phŭn djiê, lŏ tui hriăm hdră dlăng kriê mơ̆ng phung truăn kơ bruă pla mjing, ba yua hdră mă bruă klei hriăm mơ̆ng bruă kruh hĕ êlâo, ƀrư̆ ƀrư̆ ñu dơ̆ng tŭ jing hlăm klei ngă bruă mrâo mrang, pla mjing hlue hdră êlan doh mđĭ kyar hŏng klei kjăp, hlăm đang war pla djăp mta mâo ba wĭt boh mnga đĭ sơăi. Tŭ jing mơ̆ng bruă ngă đang war, ñu lŏ jhŏng duh bi liê pŏk phai prŏng hĭn, lehanăn mkra anôk mjut mjing êđai mjeh mnơ̆ng pla. Knŏng hjăn thŭn 2022 leh êgao, đang war ñu mâo čhĭ leh êđai mjeh êbeh kơ 600 êklăk prăk. Đặng Dậu Quý yăl dliê:    

“Jing đảng viên, snăn kâo thâo bruă klam mơ̆ng kâo jing brei mâo klei thâo bi hmô jăk hlăm bruă mđĭ kyar klei hdĭp mda, lehăn ngă jăk nanao bruă thâo đru mnuih mkăn. Snăn hlăm thŭn êgao, kâo mâo hrui pĕ truh 6 tôn boh durian čhĭ mâo mơh êbeh 300 êklăk prăk; lŏ mâo 2 tôn tiu snăn lŏ mâo thiăm truh 120 êklăk prăk mbĭt hŏng anôk mjut mjing êđai mjeh, lehăn boh kphê lŏ mâo êbeh 100 êklăk prăk mơh. Snăn kah hĕ jih ênoh bi liê, gŏ sang adôk mnga êbeh 300 êklăk prăk”.

        Đảng viên Võ Văn Hoàng 64 thŭn, ti să Ea Tu, ƀuôn prŏng Ƀuôn Ama Thuôt hŏng klei kreh kriăng, thâo gĭr, lehanăn prŏng ai tiê thâo khăp. Amĭ kkiêng ti čar Quảng Ngãi, lehăn hlue amĭ ama hriê hdĭp ti čar Daklak mơ̆ng êlâo kơ thŭn 1975. Hlăm klei duh ƀơ̆ng găn leh lu klei dleh dlan, lehanăn lu mta bruă kruh hĕ, lehanăn lŏ kgŭ snăn truh kơ klei tŭ jing. Ară anei, leh lu thŭn duh ƀơ̆ng, ñu mâo truh 5ha hma pla boh durian, lehanăn lu boh mkăn msĕ si boh măng cụt, boh kruĕ kam, boh kruĕ kuit lehanăn boh kruĕ dŭng... Hŏng ênoh mâo ba wĭt hlăm grăp thŭn hlăm brô 4 êklai prăk, kah hĕ jih kơ ênoh bi liê ñu adôk mnga êbeh 2 êklai prăk. Mâo hĕ klei hdĭp mda hơĭt, snăn ñu mprăp nanao ai tiê kăp đru dŭ gŏ sang dôk hlăm klei dleh dlan čiăng kơ prăk duh kơ bruă knuă, msĕ si mjeh mjiêng, hbâo pruê, lehanăn đru kơ kơ klei hdĭp mda hlăm krĭng ƀuôn sang mkŏ mkra krĭng ƀuôn sang mrâo. Võ Văn Hoàng lač:

        “Jing đảng viên ti alŭ wăl snăn pô ngă klei bi hmô yơh êlâo hlăm klei mđĭ kyar klei hdĭp mda, mơ̆ng anăn mnuih ƀuôn sang srăng tui hlue. Pô thâo hlăm bruă pla mjing, snăn đru mnuih ƀuôn sang, hrăm mbĭt mâo klei đĭ kyar. Dŭm thŭn ngă anôk mjut mjing êđai mjeh, ƀuh dŭm gŏ êsei dôk hlăm klei dleh dlan, snăn pô đru, bi gŏ êsei dưi ƀiă snăn pô brei diñu čan, bi dŭm gŏ êsei knap hĭn snăn pô hlŏng brei mang. Bi dŭm gŏ êsei dleh dlan klei kơ sang dôk tơdah mâo klei bi đru hlăm bruă mdơ̆ng sang snăn kâo dưi đru diñu grăp gŏ sang mơ̆ng 5 – 10 êklăk prăk, tui hluê hŏng klei hdĭp mdê. Lehanăn kâo lŏ đru mkra êlan klông, mtrŭt phung ƀuôn sang mkra bi leh jih jang êlan klông hlăm ƀuôn pô”.

        Lại Thị Loan – KHua êpul hgŭm bruă lŏ hma čar Daklak lač, mâo lu phung đảng viên ngă klei thâo ba êlan êlâo sơăi hlăm klei duh ƀơ̆ng. Msĕ hŏng Đặng Dậu Quý lehanăn Võ Văn Hoàng jing phung “đảng viên thâo ba êlan êlâo sơăi, mâo mnuih ƀuôn sang tui mtuôn”, jing leh phung kdlưn hĭn sơăi mâo ai thâo bi lar klei jăk hlăm bruă đru mđĭ kyar klei hdĭp, msir klei ư̆ êpa bi hrŏ klei ƀun knap ti alŭ wăl. Lại Thị Loan lač, čiăng kơ bruă mđĭ kyar klei hdĭp mda mơ̆ng êpul hgŭm knư̆ dơ̆ng kjăp hĭn, hlăm wưng kơ anăp êpul hgŭm mđing hĭn kơ bruă bi mŭt đảng viên hlăm êpul bi lu hĭn, mjing knơ̆ng kjăp hĭn klei phung đảng viên mâo klei thâo bi hmô hĭn:   

“Hmei mđing hĭn kơ brbuă lŏ bi mŭt đảng viên mrâo. Hlăm jih jang hdră, snăn mbĭt hŏng dŭm êpul êya mkăn, hmei mâo dŭm hdră klă mngač hĭn msĕ si jao kơ phung đảng viên, dŭm êpul đru bi dlăng ba ƀĭng ngă lŏ hma kreh kriăng lŏ mjuăt bi hriăm, đru ba, tơdah ƀuh djăp klei găl brei mŭt hlăm Đảng”.

        Amâo mâo djŏ knŏng thâo hlăm klei duah ƀơ̆ng đuič ôh, phung đảng viên msĕ si Đặng Dậu Quý lehanăn Võ Văn Hoàng lŏ thâo bi đru yuôm bhăn snăk kơ klei duh ƀơ̆ng hŏng dŭm ƀĭng hgŭm dôk hlăm klei dleh dlan, kñăm hrăm mbĭt mđĭ kyar, duah ngăn prăk mâo ba wĭt lu hĭn, bi hơĭt klei hdĭp mda hĭn, jih ai tiê đru kơ bruă mkŏ mkra krĭng ƀuôn sang mrâo./.