Hlăm dŭm hrue knhal jih thŭn 2022, amai Kpă Xê Ra, kkiêng thŭn 1993, ƀuôn Ia Mua, să Bầu Cạn, kdriêk Chư Prông ăt hmao bi leh sa boh sang mrâo pioh drông Tết.  Sang simăng, boh prŏng knŏng 60m2, ƀiădah amai ăt hơ̆k mơak. Kyuadah drông thŭn mrâo 2023, mâo sang mrâo, ăt jing leh klei kruak knăl kơ gŏ sang amai tlaih mơ̆ng klei dleh dlan. Yuôm bhăn hĭn, bruă rŭ mdơ̆ng sang anei mâo bi knăl kơ amai thâo mkiêt mkriêm, lehanăn yua prăk čan hŏng klei tŭ dưn. Amai Xê Ra mơak yăl dliê: “Thŭn anei, jing thŭn tal êlâo gŏ sang dưi tlaih mơ̆ng klei dleh dlan. Anei jing boh mơ̆ng bruă knuă dua ung mô̆ diñu mă, mâo klei đru hdră brei čan prăk hŏng mnga hdjul. Pô ka hlŏng tla mtam ôh nư klei, ƀiădah srăng tla ƀrư̆ ƀrư̆, kyuanăn dưi lŏ duh bi liê dlăng kriê wiê ênăk kphê mđĭ kyar bruă knuă. Kâo bŏ hŏng klei mơak...”

Thâo ba yua prăk čan Rơ Mah Bya, kkiêng thŭn 1972, ti êpul mrô 6 wăl krah Čư̆ Prông, kdriêk Čư̆ Prông ăt mơak kyua mâo tlaih mơ̆ng klei dleh dlan. Ñu brei thâo, gưl tal êlâo ñu jhŏng čan prăk hlăk thŭn 2008, hŏng ênoh prăk knŏng djăp blei mă sa drei êmô. Ƀuh rông êmô jing tŭ dưn, snăn ñu lŏ čan prăk knơ̆ng prăk, Rơmah Bya jhŏng čan truh 30 triệu đồng, rồi 50 êklăk prăk pioh duh bi liê dlăng kriê kphê, lehanăn rông bê. Ară anei lŏ wĭt dlăng leh êbeh pluh thŭn ba yua prăk čan, ƀuh bruă pô ngă anei mâo ba wĭt leh klei tŭ dưn jăk: “Kâo čan prăk mơ̆ng bruă đru ba yang ƀuôn hlăm lu thŭn leh. Phŭn tal êlâo čan ƀiă, êdei kơ anăn dơ̆ng lŏ mđĭ thiăm ƀrư̆ ƀrư̆, kyuadah kâo ƀuh mơ̆ng leh mâo prăk čan anei mă bruă knuă tŭ dưn hĭn, ară anei kâo tloh mdơ̆ng sang, blei êmô, bê lehanăn blei mprăp mnơ̆ng yua hlăm sang”.

Tui si knơ̆ng prăk đru ba bruă yang ƀuôn čar Gialai čih yap, leh 20 thŭn mă bruă, knơ̆ng prăk mâo ngă leh lu anôk brei čan prăk truh êbeh 220 boh să, hlăm jih jang 17 boh kdriêk, wăl krah, ƀuôn prŏng ti čar Gia Lai. Mbĭt hŏng anăn jing êbeh 3.300 êpul mkiêt mkriêm lehanăn brei čan prăk. Hŏng hdră êlan đru bi hâo hưn mtrŭt mjhar jih hnơ̆ng, mjĕ mjuk čung ba jih ai tiê, mâo dŭm êpul mkiêt mkriêm jing leh hdră êlan jăk đru kơ phung dleh dlan mâo ngăn prăk pioh duh ƀơ̆ng. Hŏng 17 hdră brei čan prăk hŏng ênoh prŏng, êpul bruă mâo đru leh kơ 225.000 gưl gŏ sang mâo čan prăk hŏng ênoh êbeh 16.800 tỷ đồng.  Khua kiă kriê knơ̆ng prăk đru ba bruă yang ƀuôn čar Gia Lai Lê Văn Chí brei thâo, ară anei knơ̆ng prăk hlăk ktuh êyuh tal êlâo brei dŭm gŏ sang dleh dlan, gŏ sang knŭk kna dlăng ba mâo čan ngăn prăk mơ̆ng knơ̆ng prăk đru ba bruă yang ƀuôn: “Knơ̆ng prăk đru ba bruă yang ƀuôn čar Gia Lai iêo mkrum jih hnơ̆ng pioh pŏk mlar bruă brei čan prăk, čiăng kơ jih jang phung dôk hlăm klei dleh dlan mâo čan prăk. Êpul bruă ăt hgŭm hŏng djăp knơ̆ng dhar bruă dŭm êpul bruă kđi čar čiăng dưi ba jih ênoh ngăn prăk brei čan truh hŏng mnuih năng dưi čan. Kiă kriê prăk čan, ktrâo atăt, mtrut mjhar dŭm gŏ sang jhŏng bi čan prăk pioh kơ klei duh ƀơ̆ng, mđĭ kyar bruă knuă mă. Ktrâo atăt dŭm gŏ sang čan prăk, thâo yua prăk čan anăn bi djŏ hdră ba wĭt klei tŭ dưn, đru kơ dŭm gŏ sang dleh dlan, lehanăn phung knŭk kna dlăng ba mâo klei găl mđĭ kyar klei hdĭp, bi hơĭt klei hdĭp lehanăn tlaih mơ̆ng ƀun hŏng klei kjăp”.

Dưi lač jing, hlăm dăl dŭm thŭn êgao, ênoh prăk đru ba bruă yang ƀuôn brei čan leh hŏng klei tŭ dưn, mjing leh klei bi mlih jăk hlăm klei duh mkra ala ƀuôn ti Gia Lai, boh nik hŏng krĭng mnuih djuê ƀiă. Hlăm wưng kơ anăp, bruă anei srăng lŏ jing knơ̆ng čiăng kơ alŭ wăl ngă tŭ jing djăp hdră êlan bi hrŏ ƀun, mkŏ mkra krĭng ƀuôn sang mrâo, lehanăn jing phung sa ai mđrăm mbĭt hŏng phung dôk hlăm klei dleh dlan, đru kơ digơ̆ kpưn đĭ hlăm klei hdĭp, mkŏ mjing klei hdĭp kơ êdei anăp trei mđao jăk yâo hĭn./.