Hluê anăn bruă mđĭ kyar đảng viên ti alŭ wăl mâo klei mlih jăk, đru mđĭ ai dưi gĭt gai mơ̆ng Đảng hlăm bruă mđĭ kyar bruă duh mkra ala ƀuôn, răng mgang klei êđăp ênang ti alŭ wăl.

            Yăl dliê kơ klei ktưn čiăng mâo mŭt hlăm Đảng, đảng viên mda asei H’Lăic Niê, khua bruă Đảng alŭ Tân Thịnh, să Tân Lập, kdriêk Krông Ƀŭk brei thâo, mâo gưl bruă Đảng să, êpul bruă Đảng alŭ, phung êdam êra mâo klei đăo knang jao ngă k’iăng khua alŭ Tân Thịnh, dŭm thŭn êgao, ñu gĭr bi leh jăk bruă jao. Boh nik jih jang bruă êdam êra hđeh êlăk hlăm alŭ. Knhal jih thŭn dih, H’ Lăic Niê mâo klei myun dưi mŭt hlăm Đảng. Anei jing sa klei mđĭ ai prŏng čiăng kơ ñu lŏ dơ̆ng bi êdah bruă klam, duh myơr ai tiê mda asei pô mkŏ mjing Đảng kjăp ktang ƀuôn sang mdrŏng sah.  

         “Leh 1 wưng gĭr ktưn amâo mâo mdei, kâo klă klơ̆ng mâo mŭt hlăm Đảng, kâo bŏ hŏng klei mơak lehanăn ƀuăn gĭr hĭn hriăm mjuăt jih ai tiê čiăng jing sa čô đảng viên thâo bi hmô, mbĭt hŏng êpul bruă Đảng ngă klei hâo hưn, mđĭ ai rŭ mdơ̆ng ƀuôn sang pô đĭ kyar”.

        H’ Lăic Niê jing 1 hlăm 5 čô đảng viên mda asei hlăm alŭ ƀuôn mâo bruă Đảng să Tân Lập, kdriêk Krông Ƀŭk bi mŭt hlăm thŭn 2022. Anei jing sa klei gĭr prŏng êdi mơ̆ng alŭ wăl hlăm klei mjuăt bi hriăm, mđĭ kyar đảng viên mrâo leh lu phung hlăk ai ti dŭm boh alŭ ƀuôn hiu duah ƀơ̆ng kbưi, mnuih hlăm ƀuôn amâo mâo čiăng bi mguôp đei ôh hlăm dŭm bruă êpul êya, kƀah klei thâo gĭr. Siămdah, čiăng mâo mjuăt bi hriăm mnuih lŏ čuê kơ Đảng, Êpul khua kiă kriê bruă Đảng să Tân Lập, kdriêk Krông Ƀŭk bi kiă kriê gĭt gai leh bruă ksiêm dlăng, bi mŭt hlăm Đảng ngă bruă hŏng klei klă mngač, hŏng klei gĭr amâo mâo klei duah ruah tui si klei mĭn bi tiŏ êran klei bi mni ôh. Ƀiădah mđing mjuăt bi hriăm êpul knuă druh êdam êra, ƀĭng hgŭm mâo ai tiê klei gĭr thâo bi ktưn, mâo klei thâo uêñ klam mkŏ mjing êpul, lehanăn ngă djŏ tui si klei dŭm êpul êya, bi hriăm mbŏ nanao čiăng mâo mŭt hlăm đảng. Trần Ngọc Sơn, k’iăng khua bruă êdam êra să Tân Lập brei thâo:

 “Kơ kdrêč bruă êdam êra să ăt mtrŭt mjhar jih jang phung êdam êra mâo klei kdlưn hĭn, bi thâo dưn yua jih ai dưi klei thâo pô pioh bi mŭt hlăm đảng lehanăn mâo lu bruă ngă hŏng êpul êdam êra, čiăng kơ phung êdam êra hgŭm hlăm bruă kđi čar, lehanăn jih jang bruă yang ƀuôn”.

        Bruă Đảng să Tân Lập, kdriêk Krông Ƀŭk čoh čuăn leh bruă bi mŭt đảng viên ti dŭm boh ƀuôn jing bruă tal êlâo kñăm đru mđĭ klei kiă kriê, ai tiê bi blah hlăm đảng. Kdlưn hĭn kơ anăn phung đảng viên lŏ jing kdrông hlăm bruă mđĭ kyar klei duh mkra ala ƀuôn, răng mgang kjăp klei êđăp ênang hlăm alŭ wăl. Kyuanăn, hŏng dŭm alŭ wăl anôk mâo lu mnuih djuê ƀiă hdĭp mda, mâo dŭm êpul bruă Đảng ka tuôm bi mŭt ôh đảng viên mrâo, bruă Đảng să mâo leh hdră bi mŭt đảng viên, jao ênoh čuăn klă mngač kơ dŭm êpul bruă Đảng, dŭm êpul êya yap anei jing dŭm ênoh čuăn tĭng mka klei bi mni hlăm grăp thŭn. Mbĭt hŏng anăn, bruă Đảng să jao kơ dŭm phung khua kiă kriê Đảng nao bi mguôp hŏng dŭm anôk bruă Đảng nah gŭ, kñăm păn kjăp boh klei, pral hmao ruh mgaih jih klei amâo mâo djŏ, klei dleh dlan hlăm bruă bi mŭt đảng viên mrâo, hlăm bruă rŭ mdơ̆ng Đảng ară anei. Cao Thị Thúy Nga, khua bruă Đảng să Tân Lập, kdriêk Krông Ƀŭk brei thâo:

 “Mơ̆ng akŏ thŭn 2023 bruă Đảng mâo jao leh kơ jih jang phung khua hlăm êpul bruă Đảng hlăm bruă iêo mŭt đảng viên, bi mkŏ mjing êpul bruă đảng snăn kăp ksiêm dŭm alŭ wăl hlăm jih jang bruă kơ klei mđĭ kyar bruă duh mkra ala ƀuôn hlăm alŭ wăl lehanăn boh tŭ dưn ti knhal jih thŭn dŭm boh alŭ srăng mjing anôk mkă tĭng kơ knuă druh să jao bruă ti dŭm alŭ wăl”.

        Hlăm wưng kơ anăp, bruă Đảng să Tân Lập, kdriêk Krông Ƀŭk srăng lŏ hyuă kjăp hĭn klei kiă kriê, gĭt gai hlue ngă bruă knuă bi tŭ jing hĭng bruă bi mŭt hlăm   Đảng ti dŭm êpul bruă đảng ti alŭ wăl, rơ̆ng mâo klei lŏ čuê lehanăn đĭ kyar nanao hlăm Đảng. Lehanăn, đru mđĭ klei thâo kiă kriê, lehanăn klei ktang bi blah mơ̆ng êpul bruă Đảng, lehanăn đảng viên djŏ hŏng bruă čuăn hlăm boh klei mrâo./.