Mơ̆ng akŏ wưng păn bruă truh kơ ară anei, Bruă Kƀĭn Ala ba mdah 99 hdră bhiăn, 165 hdră mtrŭn, kluôm dhuôm mơ̆ng bruă duh mkra, ala ƀuôn, bruă lĭng kahan, klei êđăp ênang, bruă hŏng tač êngao, gang mkhư̆ klei ƀơ̆ng ngăn, luč mang, klei amâo mâo jăk, mdưm tur knơ̆ng kơ bruă mkŏ mjing bruă kđi čar khuăt, ktang, tŭ dưn, jĕ giăm hŏng mnuih ƀuôn sang leh anăn ngă bruă kyua mnuih ƀuôn sang, knơ̆ng bruă. Khua bruă kƀĭn ala Trần Thanh Mẫn mñă ktang:

Boh nik, Bruă Kƀĭn Ala bi klă hdră mtrŭn mkra mlih, bi mbŏ đa đa mta mơ̆ng hdră bhiăn phŭn, mkra mlih hdră bhiăn mkŏ mjing Bruă Kƀĭn Ala, Hdră bhiăng bruă sang čư̆ êa alŭ wăl, Bruă Kƀĭn Ala, dhar bruă Bruă Kƀĭn Ala ba mdah leh hluê si klei dưi dŭm hdră mtrŭn kơ bruă mkŏ dăp anôk bruă knŭk kna gưl čar, gưl ƀuôn hgŭm. Anei jing dŭm klei bi klă yuôm bhăn, mâo boh tŭ dưn yuôm bhăn, hmăi truh hŏng grăp čô mnuih ƀuôn sang, kluôm yang ƀuôn.

Bruă Kƀĭn Ala ăt kñăm ruh mgaih dŭm klei kpăk kơ klei kiă kriê čiăng mkŏ mjing klei kdlưn hĭn mđĭ kyar bruă duh mkra ala ƀuôn hlăm wưng mrâo, boh nik hluê ngă 4 hdră mtrŭn hdră êlan: Hdră mtrŭn 57 kơ klei kreh knhâo mrâo mang, mlih mrâo mbruă, mlih mrô ala čar, hdră mtrŭn 59 kơ ñŭ kma tar rŏng lăn, hdră mtrŭn 66 kơ mkŏ mjing leh anăn ngă hdră bhiăn, hdră mtrŭn 68 kơ mđĭ kyar bruă duh mkra êngao knŭk kna.

Bruă Kƀĭn Ala dưi mlih mrâo klei mĭn mkŏ mjing hdră bhiăn hŏng êlan rơ̆ng kơ klei kiă kriê mơ̆ng knŭk kna, mtrŭt mđĭ klei mbruă, bi lar ai dưi mkra mjing, bi luh grăp ai dưi đĭ kyar. Mơ̆ng anăn lui hĕ klei mĭn “Amâo dưi kiă kriê srăng kăm”, dŭm boh klei hlăm boh sĭt mâo klei mlih jêñ jêñ srăng jao kơ knŭk kna, alŭ wăl bi klă čiăng rơ̆ng klei mbruă hlăm klei gĭt gai. Anei jing mbha gưl, mbha klei dưi hŏng hdră, alŭ wăl bi klă, alŭ wăl ngă, alŭ wăl đua klam, mlih mrâo jih hnơ̆ng čiăng kơ hră mơar, ênoh bi liê hrŏ, mkŏ mjing klei găl kơ mnuih ƀuôn sang leh anăn knơ̆ng bruă, ngă klei mbha gưl găl guôp hŏng ai dưi ngă bruă.

Bruă Kƀĭn Ala dưi ngă ênŭm, mbruă leh anăn tŭ dưn bruă bi klă dŭm boh klei yuôm bhăn kơ bruă duh mkra, ala ƀuôn, bruă lĭng kahan, bruă hŏng tač êngao, rơ̆ng kơ klei kluôm, mâo klei bi mguôp kjăp plah wah bruă klam leh anăn ai dưi ngă bruă. Lu hdră mtrŭn mâo knhuah kdlưn hĭn, ka tuôm mâo, mñă klă mă anak mnuih jing mta kñăm, grăp hdră mtrŭn, hdră êlan jing kyua mnuih ƀuôn sang.

Lu hdră mtrŭn yuôm bhăn msĕ si: Hdră mtrŭn kơ hdră êlan mđĭ kyar sang dôk yang ƀuôn, hdră mtrŭn lui prăk hriăm kơ hđeh điêt, hđeh sang hră gưl 3, phung hriăm gưl 3 ti dŭm anôk bi hriăm mnuih ƀuôn sang, hdră mtrŭn sang hră gưl hđeh kơ hđeh mơ̆ng 3 – 5 thŭn…

Bruă Kƀĭn Ala ăt bi lar bruă klam ai ktang êdu mơ̆ng bruă hŏng tač êngao Bruă Kƀĭn Ala, dưi đru mguôp tŭ dưn hlăm bruă hluê ngă bruă hŏng tač êngao êngiê, čŏng pô, bi hgŭm, lu jơr, lu tĭng, mđĭ hĭn kơhưm mơ̆ng Việt Nam hlăm tar tŏng lăn mơ̆ng Đảng leh anăn knŭk kna. Čiăng lŏ dơ̆ng bi lar 80 thŭn mơ̆ng Bruă Kƀĭn Ala Việt Nam, Khua bruă kƀĭn ala Trần Thanh Mẫn:

Bruă Kƀĭn Ala lŏ dơ̆ng mlih mrâo kluôm dhuôm, mđĭ ai dưi mkŏ mjing hdră bhiăn, ktuê dlăng leh anăn bi klă dŭm boh klei yuôm bhăn mơ̆ng lăn čar, nao klă hŏng klei gĭt gai mơ̆ng Đảng, Bruă Kƀĭn Ala srăng lŏ hrăm mbĭt hŏng knŭk kna, mặt trận čar kwar, dŭm anôk bruă hdră bhiăn leh anăn bruă kđi čar čiăng ngă tŭ dưn hdră bhiăn phŭn leh anăn dŭm hdră bhiăn, hdră mtrŭn ba mdah leh. Gĭr jih hnơ̆ng čiăng ngă jăk hdră mtrŭn mrô 66 hruê 30/4/2025 mơ̆ng phŭn bruă kđi čar kơ klei mlih mrâo bruă mkŏ mjing leh anăn ngă hdră bhiăn bi mâo djăp klei čiăng mđĭ kyar lăn čar hlăm ênuk mrâo.

Khua Bruă Kƀĭn Ala brei thâo, Bruă Kƀĭn Ala bi mguôp mkŏ mjing tŭ dưn Klei kƀĭn kluôm bruă Đảng dŭm gưl, anăp truh kơ klei kƀĭn kluôm bruă Đảng tal 14, gĭt gai mkŏ mjing klei ruah khua Bruă Kƀĭn Ala gưl 16 leh anăn Êpul gơ̆ng bruă ƀuôn sang dŭm gưl wưng thŭn 2026 – 2031.

Bruă Kƀĭn Ala srăng bi leh jăk dŭm mta phŭn mơ̆ng wưng păn bruă gưl 15, hdră klei kƀĭn tal 10 hŏng lu mta phŭn yuôm bhăn, hlăm anăn, knŭk kna mĭn tĭng ba mdah êbeh 90 mta phŭn, mâo 47 hdră bhiăn. Ngă bruă ksiêm wĭt wưng păn bruă Bruă Kƀĭn Ala gưl 15. Mkŏ mjing hdră êlan ngă hdră biăn wưng Bruă Kƀĭn Ala gưl 16.

Khua bruă kƀĭn ala Trần Thanh Mẫn mñă ktang, Bruă Kƀĭn Ala lŏ dơ̆ng bi klă kơhưm, bruă klam jing anôk bruă bi ala gưl dlông hĭn mơ̆ng mnuih ƀuôn sang, anôk bruă klei dưi knŭk kna gưl dlông hĭn mơ̆ng ala čar Việt Nam, bi mâo djăp dŭm bruă klam hdră êlan mơ̆ng lăn čar hlăm wưng mrâo.