Song Hoành jing sa hlăm dŭm boh alŭ ti hlăm să Lưu Vĩnh Sơn, kdriêk Thạch Hà, čar Hà Tĩnh truh kơ ară anei ka mâo ngă ôh bruă bi mklin lăn ala. Klei jao lăn bruă lŏ hma kah knar grăp čô mnuih tui hlue hŏng ênoh mnuih hlăm krĭng ƀuôn sang, mâo anôk jăk, mâo anôk jhat, mâo anôk giăm lehanăn mâo anôk kbưi, snăn bruă knuă bi klah klap. Ară anei ƀrư̆ ƀrư̆ dơ̆ng mghaih msir. Bi ksŭn bi mklin sa anôk, rŭ mjing anôk ala pla mjing prŏng sa anôk, ƀiădah truh kơ ară anei, klei dôk bi klah anôk ala, klei ngă bruă ka bi sa hnơ̆ng. Ti anăp klei anăn, Ngô Văn Ngụ, Khua bruă Đảng alŭ Song Hoành bi êdah klei mơak leh hdră bhiăn lăn ala thŭn 2024 mâo klei tŭ dưn mơ̆ng hrue 1/8, hlăm anăn čoh cuăn kơ bruă bi mklin anôk, kñăm bi djŏ hŏng hŏng hdră êlan mđĭ kyar bruă lŏ hma pla mjing hlue kdrăp mrâo ară anei:

        "Lăn ala ti alŭ Song Hoành lŏ lăn amâo mâo anôk dap ôh, mâo anôk hlăm krĭng kngư, mâo anôk hlăm tlung, mta lăn msĕ mơh kăn bi knarr msĕ rei. Kyuanăn, klei bi mlih, klei čiăng bi klin ksŭn kơ sa anôk ăt jing sa klei dleh. Kyuadah djŏ tuôm hŏng klei hdĭp mnuih ƀuôn sang. Boh nik, klei bi mlih anei, si čiăng kñăm ba wĭt klei tŭ dưn klă hŏng hdră ba yua klei mă bruă mrâo mrang ară anei bi djŏ hŏng ai tiê mnuih ƀuôn sang mơh”.

            Hà Tĩnh ăt jing sa hlăm dŭm alŭ wăl mâo lu boh să bi mŭt mbĭt hlăm wưng thŭn 2019-2023, leh lŏ dăp wĭt mâo leh 12 boh sang să jing êbeh, ngă luič liê hơăi mung măng. Hlăm anăn mâo lu anôk bruă sang să mrâo duh bi liê leh truh dŭm êklai prăk. Mnuih ƀuôn sang tinei, hlăk dôk čang hmăng kơ hdră bhiăn lăn ala lŏ mlih mrâo, nao hlăm klei hdĭp klă djŏ hĭn, lehanăn mghaih msir hĕ bi jih ya mta bruă yap jing êbeh. Nguyễn Xuân Linh, Khua să Bùi La Nhân, kdriêk Đức Thọ lač:

 "leh mâo bi mŭt jih 3 anôk bruă amâo mâo jing găl guôp ôh kơ hnơ̆ng lehanăn anôk. Kyuanăn lŏ ruah sang hră jing anôk mă bruă mrâo. Ară anei mâo leh 3 anôk bruă lui hĕ kyua êbeh. Mnuih ƀuôn sang mâo klei hmăng hmưi mơ̆ng hrue   1/8 bruă lăn ala mâo klei tŭ dưn snăn lŏ bi ksiêm jih, čiăng bi mâo hdră mă bruă bi djŏ hĭn. Kâo knang sĭt hdră bhiăn lăn ala mâo klei tŭ dưn sĭt nik srăng dưi mghaih msir jih dŭm anôk bruă yap jing êbeh”.

Êlâo anăn, hlăm klei bi kbĭn tal 7, bruă kƀĭn ala gưl 15 mrâo êgao, gưl tal êlâo hlăm hƀuê ênuk, bruă kƀĭn ala hlue ngă dŭm hdră mtrŭn mơ̆ng klei bhiăn, bi mlih wưng mâo klei tŭ dưn mơ̆ng hdră bhiăn lăn ala mơ̆ng hrue 01/8/2024, pral hĭn 5 mlan mkă hŏng hrue čoh čuăn. Snăn, mơ̆ng akŏ mlan 8 anei, phung ƀuôn sang mâo klei čiăng tơdah hră lăn sô tĭ leh, anôk klei kơ lăn ala ka lŏ kla mngač mkă hŏng klei jing sĭt... srăng dưi lŏ nao mlih hră lăn djŏ hŏng hdră bhiăn lăn ala thŭn 2024. Năng mđing hĭn êdi, hră lăn srăng dưi mkăp kơ lăn ka mâo tuôm ngă ôh hră lăn mơ̆ng hrue 01/7/2014, tơdah rơ̆ng djăp klei hơĭt, amâo mâo klei bi mmiă, amâo mâo soh hŏng hdră bhiăn klei kơ lăn ala. Pô mgang kđi Phạm Thanh Tuấn, hlăm êpul phung mgang kđi ƀuôn prŏng Hà Nội lač:

 "Hlăm hdră bhiăn mrâo lŏ bi tai leh hrue kruak mă hrue 1/7/2014. Klei čoh čuăn anei srăng mjing klei găl kơ mnuih ƀuôn sang dôk ba yua ka mâo klei hơĭt sĭt ôh mâo sui thŭn mlan leh truh 10 êgao, jing myun kơ diñu nao ngă hră mơar lăn. Tui si thâo săng anei jing sa klei bi mlih prŏng bŏ hŏng klei yuôm bhăn. Kyuadah jih jang klei dôk ksŭn hlăm bruă ngă hră lăn, lu jing djŏ tuôm hŏng klei djă yua lăn, ƀiădah amâo mâo hră lăn ôh, ƀiădah lăn anăn dôk yua. Anei yơh jing klei găl kơ diñu mâo klei dưi nao ngă hră lăn”.

 Mbĭt hŏng anăn, dŭm hdră êlan mkăn klei kơ lăn ala ăt mâo hlue ngă mơ̆ng hrue 1/8 msĕ si kơ klei čiu hnô, kơ klei đru mkŏ mkra anôk dôk mrâo hŏng mnuih ƀuôn sang: Tơdah mkŏ mkra anôk dôk mrâo hlăm ƀuôn prŏng, snăn brei bi mâo djăp ênoh čuăn kơ ƀuôn prŏng, tơdah mkŏ mkra anôk dôk hlăm krĭng ƀuôn sang snăn bi djăp hŏng ênoh čuăn kơ bruă mkŏ mkra krĭng ƀuôn sang mrâo mơh, rơ̆ng bi djăp ênŭm bruă nah gŭ, kơ dharr kreh, yang ƀuôn. Bi kơ klei hrui mă lăn kyua klei tŭ dưn kơ lăn čar, kơ yang ƀuôn, lăn kơ mnuih djuê ƀiă, bruă hrui lăn lŏ hma đang dliê, hdră êlan klei kơ lăn, ênoh yuôm lăn, klei čuăl mkă, hdră djă yua lăn... srăng dưi mghaih msirr hŏng klei pral.

 Klei pral djă yua “Hdră bhiăn nao hlăm klei hdĭp” jing yuôm bhăn snăk. Yuôm hĭn jing jih jang hdră mtrŭn brei bi hlue ngă, đăm bi ktrŏ kơ mnuih ƀuôn sang, mghaih msir jih jang klei ba yua lăn amâo mâo tŭ dưn, kơrrŭ wĭt klei găl hlăm bruă knuă, mđĭ hĭn boh tŭ dưn mơ̆ng lăn ala./.