Bi trông kơ Hdră bhiăn Rông anak rông (lŏ mlih mrâo), phung bi ala bruă kƀĭn ala mtă brei bi leh hdră êlan răng mgang phung hđeh êlăk êlâo, hlăm leh anăn êdei kơ tŭ mă jing anak rông. Hlăm anăn, brei rơ̆ng klei sa ai sĭt, bi klă boh tŭ hdră bhiăn, boh nik hŏng dŭm klei tŭ mă anak rông mâo mta phŭn mơ̆ng ala tač êngao. Pô bi ala Cil Bri, Êpul mơ̆ng Lâm Đồng, mtă kơ klei đru kčĕ, mblang leh anăn mă klei blŭ hlăm wưng brei, tŭ mă anak rông brei ngă hŏng klei blŭ leh anăn hdră djŏ guôp:

“Kâo akâo bi mbŏ hlăm mta 3 mta 20 klei bhiăn đru kčĕ, mblang leh anăn mă klei blŭ brei hŏng klei blŭ, hdră êlan mnuih dưi mă klei blŭ dưi thâo săng, djŏ guôp hŏng thŭn, hnơ̆ng đĭ prŏng mơ̆ng hđeh, mâo klei đru kơ klei blŭ ai tiê klei mĭn tơdah čiăng. Anei jing klei čiăng êdi phŭn tal êlâo mơ̆ng klei tŭ ư čŏng pô”.

Hluê si pô bi ala Nguyễn Vũ Trung, Êpul mơ̆ng ƀuôn prŏng Hồ Chí Minh brei lŏ dơ̆ng bi leh hdră ksiêm dlăng, hmao ƀuh klei arưp aram mơ̆ng êlâo kơ ba jao hđeh, boh nik êjai hđeh dưi ba mơ̆ng anôk dôk, kñăm gang mkhư̆ klei ba yua hdră tŭ jum anak rông čiăng čhĭ mnia, ba jao soh hdră bhiăn amâo dah ngă jhat kơ phung hđeh:.

Kâo mñă brei bi mbŏ klă ti Mta 5 kơ dŭm bruă ngă amâo dưi ngă, jing amâo dưi yua klei brei, mă anak rông čiăng hrŏng ruah, ba jao, tŭ mă, dŭ mdiăng amâo dah ba phung hđeh čiăng kñăm kơ klei čhĭ mnuih, tlĕ mă amâo dah mă mta, kdrêč mơ̆ng asei mlei, amâo dưi bi mguôp klei tŭ mă anak rông hŏng klei akâo myơr, mă, bi mguôp mta, kdrêč mơ̆ng asei mlei amâo dah ya mta bruă mdrao mgŭn soh hŏng hdră bhiăn. Klei găl mơ̆ng pô tŭ mă anak rông, brei bi klă”.

Hŏng klei rông anak rông mâo mta phŭn mơ̆ng ala tač êngao, pô bi ala Lê Thị Ngọc Linh, Êpul Cà Mau, mñă klei čiăng mkŏ mjing hdră ksiêm dlăng leh anăn msir mghaih klei hâo hưn klă klơ̆ng tơdah hđeh mâo klei bi knăl mâo klei ngă jhat, čăm biêng, lui amâo dah amâo rơ̆ng klei găl kriê dlăng:

Brei bi mklă anôk bruă tŭ mă klei hâo hưn, bruă klam bi hgŭm plah wah anôk bruă kriê dlăng knŭk kna kơ anak rông, anôk bruă bi ala Việt Nam ti ala tač êngao leh anăn êpul anak rông ala tač êngao. Mbĭt anăn čoh čuăn amâodah jao klei čoh čuăn klă klơ̆ng kơ wưng hâo hưn, bruă klam wĭt lač, ktuê dlăng boh tŭ msir mgaih leh anăn đru răng mgang phung hđeh hlăm klei čiăng êdi”.

Ti sa kdrêč hdră bhiăn mkăn, pô bi ala Nguyễn Danh Tú, Êpul mơ̆ng An Giang, mñă brei bi klă klei hmăi mơ̆ng bruă mjưh mdei klei mjĕ mjing anak amiêt awa, boh nik bruă krŭ wĭt hdră bhiăn plah wah amĭ ama kkiêng hŏng anak kkiêng:

“Kâo mtă brei mđing thiăm klei čuăn: klei bi mjĕ plah wah amĭ ama kkiêng hŏng anak kkiêng dưi lŏ kơrŭ wĭt yap mơ̆ng wưng klei bi mjĕ rông ba anak rông mdei. Msĕ snăn wăt tơdah anak rông leh jing mnuih thâo săng amâo dah ka thâo săng, tơdah klei bi mjĕ rông ba anak rông mdei snăn bruă bi mklă amĭ ama anak rông jing amĭ ama kkiêng kơ pô anăn jing sa klei tŭ dưn hdră bhiăn yuôm bhăn mơ̆ng klei mdei rông ba anak rông. Tal dua, tơdah mdei rông ba anak rông, sang phat kđi bi mklă jao kơ amĭ ama kkiêng amâo dah anôk bruă mkăn kriê dlăng rông ba mtô bi hriăm, hlăm klei anak rông amâo mâo klei dưi mă bruă. Ƀiădah tơ anak rông leh prŏng, khădah amâo mâo klei dưi mă bruă ƀiădah mâo ngăn drăp dưi rông pô snăn amâo guôn jao kơ anôk bruă mkăn kriê dlăng rông ba mtô mjuăt.

Hưn mthâo kơ dŭm mta phŭn djŏ tuôm kơ Hdră bhiăn Rông anak rông (lŏ mlih mrâo), Khua phŭn bruă Hdră bhiăn Hoàng Thanh Tùng mñă klă Hdră bhiăn lŏ dơ̆ng bi êdah ai tiê răng mgang jih hnơ̆ng klei tŭ dưn leh anăn klei jăk hĭn kơ phung hđeh. Dŭm hdră ksiêm dlăng kjăp ăt dưi mkŏ mjing čiăng gang mkhư̆ klei ngă soh, gang mkhư̆ klei ƀơ̆ng ngăn leh anăn bi kpleh klei tŭ dưn. Hŏng dŭm boh klei lăm lui amâo dah mjưh mdei klei rông anak rông, Khua phŭn bruă Hoàng Thanh Tùng lač klă:

“Ti mrô 2 mta 23 mâo leh klei čuăn klă mngač djŏ tuôm hŏng klei tơdah klei lui hĕ klei bi mklă rông ba anak rông ngă truh klei hmăi kjham kơ klei tŭ dưn klei dưi djŏ hdră bhiăn mơ̆ng phung hđeh dôk jing anak rông srăng ksiêm dlăng lehanăn srăng ksiêm dlăng, duah hdră mkăn amâo mâo lui hĕ ôh. Djŏ tuôm kơ klei truh mơ̆ng bruă mjưh mdei rông ba anak rông snăn mâo čih leh klă mngač djŏ tuôm kơ grăp boh klei mdê mdê snăn klei tŭ dưn mơ̆ng phung hđeh si srăng ksiêm dlăng? Ya boh klei jao wĭt kơ amĭ ama rông, ya boh klei jao kơ anôk bruă mkăn”.