Kiă kriê klei bi kƀĭn, K’iăng khua bruă kƀĭn ala Nguyễn Thị Thanh mñă Dhar bruă gĭt gai bruă kƀĭn ala bi êdah klei hdơr knga, lehanăn mâo klei hơêč hmưi jăk sdiam truh hŏng phung nai leh wĭt mdei, lehanăn phung nai hlăk dôk mtô truh giăm 1,6 êklăk čô phung nai mtô, knuă druh kiă kriê bruă sang hră mơar  hlăm djăp čar kwar kluôm ala. Mbĭt anăn mtă kơ phung bi ala bruă kƀĭn ala mâo klei trông čhai kơ dŭm mta bruă hlăm klei mkŏ mjing hdră bhiăn sang hră mơar.

Lač kơ hdră mtrŭn mơ̆ng klei bhiăn hrŏng ruah nai mtô, pô bi ala Trần Văn Thức, êpul mơ̆ng Thanh Hóa brei thâo ară anei bruă hrŏng ruah nai mtô ti dŭm boh sang hră knŭk kna hlăk dôk tui tiŏ hdră êlan mbĭt kơ klei hrŏng ruah mnuih mă bruă. Anei jing sa klei adôk ka djŏ, kyua klei kƀah nai mtô dôk mâo lu hlăm đa đa anôk, jing leh mta phŭn lu alŭ wăl ăt dôk lĕ nanao hlăm klei kƀah nai mtô, ka dưi mkŏ mjing ôh hdră mtô bi hriăm hlăm dŭm mta klei hriăm hlue hŏng hdră mtô bi hriăm thŭn 2018.

“Kâo mâo klei sa ai, lehanăn tŭ ư prŏng hŏng bruă čih mkra hdră bhiăn jao klei dưi kơ dhar bruă sang hră mơar hrŏng ruah nai mtô. Mơ̆ng anăn, Phŭn bruă sang hră mơar, Phŭn bruă mnuih ngă bruă phung kñap mñai jing anôk bruă kiă kriê, mkŏ mjing hdră êlan mă bruă čiăng dưi mâo lu phung nai mtô dôk hlăm klei pô kiă kriê, ba mdah kơ gưl mâo klei dưi bi mklă, mkă tĭng klei bi mŭt jing phung nai sĭt êmĭt, ti dŭm boh sang hră knŭk kna, mâo dŭm anôk bruă mâo klei dưi jao leh. Anei jing mta mtrŭn yuôm bhăn anăp dưi ruh mgaih jih dŭm klei dleh dlan, boh nik kơ klei anôk êbeh nai, anôk kƀah nai mtô găn leh dŭm thŭn hŏng anei ti lŭ alŭ wăl”.

Lač kơ dŭm mta mtrŭn răng mgang phung nai mtô, pô bi ala Nguyễn Văn Cảnh, êpul mơ̆ng Bình Định yăl dliê kơ klei kƀah, bruă ngă ka djŏ mâo phung amĭ ama ngă jhat kơ phung nai, hđeh hriăm hră blŭ jhat kơ nai mtô, ngă hmăi klei amâo mâo jăk kơ k’hưm klei jing phung nai mtô. Pô bi ala mâo klei akâo snei:

“Kâo čang hmăng mơ̆ng mta 11 lŏ thiăm dŭm mta lač kơ amĭ ama hđeh, amâo mâo dưi ngă jhat ôh kơ phung nai mtô, tơdah phung nai tăm ngă amâodah blŭ gao klei bhiăn. Snăn amĭ ama, lehanăn hđeh hriăm hră đăm mâo ôh klei bi mneh bi msao thâo dah ngă jhat kơ phung nai, ƀiădah nao hưn hŏng sang hră, thâodah êpul bi ala phung amĭ ama hđeh, anôk bruă knŭk kna. Mta 9 mtrŭn bruă čuăn mơ̆ng phung nai mtô, kâo mâo klei čang hmăng dưi bi mlih jing bruă čuăn lehanăn bruă klam mơ̆ng phung nai mtô. Bi lač kơ bruă klam kơ phung nai, snăn ti anăn lŏ mbŏ klei thâo bi mguôp nai mtô hŏng amĭ ama hđeh. Sitôhmô: Tơdah ƀuh klei thâo lehanăn êmăt hlăm phung hđeh hriăm hră mâo leh, ƀiădah ka dưi mđĭ ôh klei thâo anăn mơ̆ng phung hđeh snăn, nai mtô dưi bi tuôm hŏng amĭ ama hđeh bi trông hdră srăng ngă”.

Bi kơ klei prăk mlan hŏng phung nai mtô, pô bi ala Dương Khắc Mai, êpul mơ̆ng Đắk Nông bi êdah tŭ ư prŏng mơ̆ng phung nai mtô hŏng dŭm klei čih mkra hdră êlan prăk mlan, kñăm ruh mgaih jih klei dleh dlan. Pô bi ala mâo klei čang hmăng, prăk bơ̆k brei nao mđrĭng hŏng hnơ̆ng mtô bi hriăm:

“Hlăm wưng leh êgao, mâo đa đa phung nai mtô, lu jing phung mâo klei thâo mâo knhuah dôk dơ̆ng ƀơ̆ng huă jăk, mbĭt anăn mâo mơh phung nai mtô, wăt hŏng knuă druh bruă sang hră mơar, hlăm knhuah dôk dơ̆ng ƀơ̆ng huă ngă hĕ dŭm klei amâo mâo mơak, snăn năng phat mkra ƀuah ăl. Kâo mâo hĕ klei bi êdah anei, kyuadah ară anei drei hlăk dôk mkra klei bhiăn, snăn năng bi mâo dŭm mta hdră mtrŭn mđĭ hnơ̆ng tŭ phung nai mtô, mâo klei thâo kluôm dhuôn, mbĭt hŏng knhuah dôk dơ̆ng ƀơ̆ng huă, klei blŭ tlao nao hriê ti nanăn bi êdah bruă klam lehanăn bruă čuăn jing nai mtô”.

Tŭ mă jih klei blŭ đru kčĕ mâo phung bi ala bi êdah ti anôk bi trông, Khua phŭn bruă sang hră mơar Nguyễn Kim Sơn mâo klei lač jăk kơ jih jang phung bi ala mâo leh klei blŭ yuôm bhăn hlăm klei čiăng čih mkra klei bhiăn bi jăk. Khua phŭn bruă lač, jih jang klei blŭ mâo klei jăk sơăi, anăp truh kơ klei bi mklă, tui duah klei sa ai prŏng, kñăm mjing kơ klei bhiăn dôk mkra anei mjing bruă klam prŏng hŏng bruă sang hră mơar lehanăn hŏng lăn čar./.