Hdră êlan amâo mâo mă prăk ôh prăk hriăm hră mơar, brei dưi rơ̆ng kơ ênoh ngăn prăk knŭk kna ti alŭ wăl

VOV4.Êđê- Ti Klei bi kƀĭn tal 9, Anôk bruă kƀĭn ala gưl 15, phung bi ala bi trông ti Êpul kơ klei čih mkra Hdră mtrŭn mơ̆ng Anôk bruă kƀĭn ala kơ klei lui, đru prăk tăk hriăm hră kơ phung hđeh mơ̆ng gưl điêt truh kơ gưl tlâo, mnuih hriăm hră ti dŭm anôk mtô bi hriăm. Lu phung bi ala bi mklă, anei jing hdră mtrŭn bi êdah klei thâo bi đru, klei jăk mơ̆ng hdră êlan, rơ̆ng klei mtăp mđơr hlăm hdră mjuăt bi hriăm. Khă snăn, brei tĭng dlăng klă ngăn prăk mơ̆ng alŭ wăl, boh nik dŭm alŭ wăl dleh dlan tơdah pŏk ngă Hdră mtrŭn anei.

Video Player is loading.
Current Time 0:00
/
Duration 0:00
Loaded: 0%
Progress: 0%
Stream Type LIVE
Remaining Time -0:00
 
1x

Tui si phung bi ala, bruă mkŏ mjing lehanăn mtrŭn dŭm hdră mtrŭn mơ̆ng bruă kƀĭn ala kơ bruă amâo lŏ hrui ôh prăk hriăm hră hŏng phung hđeh adŭ điêt, gưl sa, 2; 3 ti dŭm boh sang hră knŭk kna mkŏ mjing, bi klă leh bruă tŭ ư hlue ngă klei klah čŭn mơ̆ng bruă kđi čar. Hdră mtrŭn mơ̆ng mơ̆ng êpul khua gĭt gai bruă Đảng gưl dlông kơ bruă mjuăt bi hriăm, rơ̆ng kơ klei hdĭp mda ala ƀuôn, bi hrŏ klei ktrŏ kơ dŭm gŏ sang mâo anak aneh dôk hriăm hră mơar. Khắnăn phung bi ala ăt dôk mâo klei mĭn, si ngă bruă anei dưi ngă djŏ mơ̆ tui si hdră mtrŭn, hlăm anăn djŏ tuôm hŏng prăk mă bruă. pô bi ala  Nguyễn Thị Lan, êpul ƀuôn prŏng Hà Nội lač:

 Kâo ăt sa ai hlăm bruă dăp ênoh bi liê ngăn prăk. Siămdah bi mkă tĭng djŏ hŏng ngăn prăk alŭ wăl, boh nik dŭm čar ka dưi bi kna ôh ngăn prăk mơ̆ng knŭk kna, ăt lŏ bi tĭng mơh pioh lŏ bi hnô ngăn prăk mơ̆ng alŭ wăl, čiăng đăm lĕ ôh hlăm klei hdră êlan jing jăk, jing djŏ, ƀiădah lĕ kyua amâo mâo prăk mă bruă snăn lĕ hlăm klei êmưt amâodah mă bruă amâo mâo bi knar ôh”.

Pô bi ala Siu Hương, êpul Gia Lai lač:

Grăp alŭ wăl klei dưi mâo jing mdê mdê. Mâo alŭ wăl dôk hlăm klei dleh dlan snăk, msĕ si hŏng Gia Lai ară anei mâo êbeh 6% jing prăk mơ̆ng gưl dlông sơăi, mơ̆ng anăn mơh čiăng bi mâo hdră êlan klă mngač hĭn kơ klei bhiăn prăk kăk mơ̆ng gưl dlông, čiăng kơ jih jang bruă ngă djŏ hŏng hdră êlan Đảng, Knŭk kna dưi mă bruă hŏng sa hdră jăk hĭn”.

Mă klei hriăm mơ̆ng alŭ wăl mâo ngă leh jăk hdră êlan đru prăk hriăm kơ phung hđeh, mơ̆ng hđeh adŭ điêt, hlŏng truh kơ adŭ 12, pô bi ala Trần Chí Cường, êpul Đà Nẵng lač, hdră êlan đru hlăm klei mtăp mđơr, klă ênŭm, klă mngač:

 Amâo lŏ rĭng ôh prăk hriăm ti dŭm boh sang hră knŭk kna, anăn jing klei ênưih leh, ƀiădah ară anei lŏ bi čoh čuăn ênoh đru kơ hđeh hriăm hră ti dŭm boh sang hră êngao knŭk kna, snăn ênoh bi đru anăn mơ̆ng Êpul gơ̆ng bruă ƀuôn sang bi mklă, jing dleh kơ bruă đru, si ênoh srăng đru ăt jing sa klei dôk bi tĭng. Msĕ hŏng Đà Nẵng bi liê mơ̆ng ngăn prăk knŭk kna kơ dŭm phung hđeh hriăm hră ti dŭm boh sang hră êngao knŭk kna, jing knar hŏng ênoh bi liê hlăm sang hră knŭk kna dưi dưn, amâo mâo bi kpleh. Snăn, jing msĕ si mâo sa ênoh bi knar msĕ kơ bruă čiăng hlue ngă.

Kơ klei bhiăn bi tĭng tla, pô bi ala Nguyễn Đại Thắng, êpul mơ̆ng Hưng Yên akâo:

Hlăm hdră mtrŭn bi tĭng tla kơ phung dưi dưn. Tui si kâo mĭn, lŏ bi ksiêm duah čiăng dưi bi tĭng tla ti anôk mjuăt bi hriăm srăng jing djŏ hĭn, drei bi mâo hdră kăp ksiêm pioh kơ klei hâo mdah, sĭt yơh bhiăn mâo klei bhiăn kăp ksiêm ti dŭm sang hră dưi dưn klei anei. Tal êlâo jing ti anôk mjuăt bi hriăm pioh bi tĭng tla kơ phung hđeh. Dua lĕ, hlŏng kah hĕ kơ ênoh prăk hriăm, tôhmô 10 prăk, snăn tĭng prăk hriăm amâo hrui jing 3 prăk, snăn lŏ dơ̆ng bi tla jing 7 prăk.

Mâo klei blŭ kơ hdră mtrŭn bi hriăm hđeh điêt mơ̆ng 3 - 5 thŭn, mâo đa đa phung bi ala lač, hlăm gưl thŭn anăn, phung hđeh ka nao kơ sang hră knŏng lu jing hlăm krĭng taih kbưi, krĭng dleh dlan. Tơdah hdră mtrŭn mâo bi lar leh srăng đru rơ̆ng kơ klei mtăp mđơr kơ hđeh krĭng taih kbưi dưi nao sang hră mơar. Khădah čiăng mâo klei duh bi liê lu hĭn kơ mnơ̆ng dhơ̆ng sang hră mơar, kdrăp mnơ̆ng yua, kơ nai mtô… ƀiădah brei yap anei jing klei duh bi liê yuôm bhăn hĭn pioh kơ klei mđĭ kyar, jing bruă lŏ dơ̆ng čuê hlăm sang hră mơar, pral mâo klei duh bi liê lu hĭn kơ klei mđĭ klei ksuă awan, lehanăn klei suaih pral kjăp kơ phung hđeh, bi kjăp hnơ̆ng ênoh mnuih kơ mgi dih. Tui si pô bi ala Phan Văn Mãi, êpul mơ̆ng ƀuôn prŏng Hồ Chí Minh, mbĭt hŏng ênoh ngăn prăk mơ̆ng knŭk kna, brei bi mâo klei bhiăn kjăp mđĭ ai yang ƀuôn bi mguôp kơ bruă anei:

Lač kơ klei yang ƀuôn bi mguôp pioh mđĭ kyar bruă mjuăt bi hriăm hđeh điêt jing yuôm bhăn snăk, tơdah hơăi srăng jing klei ktrŏ kơ ngăn prăk knŭk kna. Brei drei mâo klei ksiêm duah, lehanăn mâo dŭm hdră êlan pŏk phai hĭn, mbruă hĭn čiăng kơ yang ƀuôn mđrăm mbĭt mă bruă. Tôhmô drei čoh čuăn jao lăn amâo mâo mă prăk ôh, msĕ si yap 0 prăk pioh mâo anôk rŭ mdơ̆ng sang hră kơ hđeh điêt anâodah hơăi./.

Viết bình luận