Khua phŭn bruă êlan klông dŭ mdiăng Nguyễn Văn Thắng mdah leh klah čŭn hră mơĭt kơ knŭk kna, hdră êlan duh bi liê mkra êlan êdeh treng pral dưr – dhŭng. Mơ̆ng anăn, êlan êdeh treng anei srăng mkŏ mơ̆ng ƀuôn prŏng Hà Nội nao truh kơ kdrêč knhal tuič ti ƀuôn prŏng Hồ Chí Minh găn hlăm 20 boh čar ƀuôn prŏng, hŏng boh taih êbeh 1.540 km; prăk bi liê jih jang hlăm brô 1 êklăk 700 êbâo êklai prăk (knar 67 êklai USD).  Tĭng bruă anei srăng mphŭn rŭ mkra mơ̆ng thŭn 2027; ktưn srăng bi leh jih kdrêč êlan hlăm thŭn 2035. Mâo klei blŭ lač kơ bruă anei, Khua bruă kƀĭn ala  Trần Thanh Mẫn brei thâo, Phŭn bruă kđi čar, Êpul khua kiă kriê bruă Đảng mâo klei mđing truh kơ bruă mkra êlan êdeh treng pral Dưr dhŭng.

“Tơdah dưi mkra êlan êdeh treng pral dưr dhŭng hŏng ênoh prăk bi liê hlăm brô 67 êklai USD, lăn čar drei srăng mâo klei găl mđĭ kyar. Amâo mâo djŏ hlŏng dưi ngă mtam ôh, ƀiădah srăng dơ̆ng mă bruă ƀrư̆ ƀrư̆ hlue thŭn 2025, thŭn 2035. Tơdah dưi bi pral hĭn jăk hĭn. Ară anei ala tač êngao mâo dŭm hdră êlan prŏng, êbeh kơ dŭm blư̆ hŏng bruă anei, ƀiădah arăng dê mă bruă amâo mâo bŏ ôh 3 thŭn. Bi hŏng drei, snăn kâo mĭn, bi mlih hdră êlan mă bruă, klei ngă hră mơar snăn ăt jing mơ̆ng drei mơh pô ngă. Snăn si drei srăng ngă čiăng dưi ruh mgaih jih klei dleh dlan, gun kpăk”.

Leh hmư̆ klei hâo mdah bruă ksiêm dlăng, lehanăn dŭm klei hâo mdah ba kơ knŭk kna, klah čŭn bruă čiăng, k’iăng khua bruă kƀĭn ala Nguyễn Đức Hải brei thâo, dhar bruă gĭt gai bruă kƀĭn ala mâo leh klei bi tŭ ư mdah kơ anôk bruă kƀĭn ala, ksiêm dlăng bi mklă hdră êlan mkra êlan êdeh treng pral 8, bruă kƀĭn ala gưl 15. Anei jing sa mta bruă prŏng drei ka tuôm ngă ôh hlăm ala čar drei. Kyuanăn, dhar bruă gĭt gai bruă kƀĭn ala mtă kơ knŭk kna lŏ dơ̆ng ksiêm bi nik, tĭng mkă hdră êlan mă bruă, lehanăn si klei srăng čuăl mkă tal êlâo kñăm dưi mkiêt mkriêm hĭn, lehanăn mâo ba wĭt klei tŭ dưn hĭn, lŏ thiăm mbŏ hdră êlan hrŏng ruah hlăm klei mkra êlan anei.

Êjai mkra êlan êdeh treng pral Dưr  – Dhŭng, jing yuôm bhăn snăk lŏ ksiêm wĭt hlăm jih jang ênhă lăn lŏ, ênhă dliê srăng bi mlih, lehanăn bi mâo hdră đăm bi luič ôh ênhă lăn pla mdiê, hnơ̆ng luôm dliê, gưl mâo klei dưi bi mklă, si klei hmăi mơ̆ng bruă mkra êlan anei djŏ hŏng wăl hdĭp mda, lehanăn bi mâo hdră mghaih msir truh thŭn 2035 čiăng dưi bi leh jih bruă mkra êlan, mđing kơ bruă hrui mă lăn, kơ klei čiu hnô, klei đru ba, klei mkŏ mkra anôk ala mrâo, klei ruah pô ngă bruă, ba yua kdrăp mrâo mrang, mnuih thâo bruă, mnơ̆ng mă bruă, klei čiăng kơ pui kmlă êjai hlăm wưng dôk mkra êlan.

Klei kơ prăk kăk pioh mkra êlan jing ênoh prŏng snăk, wăt hlăm bruă bi liê kơ klei rŭ mkra, lehanăn klei kiă kriê ba yua. Kyuanăn, čiăng rơ̆ng dưi ngă jih bruă leh tă, lehanăn rơ̆ng čiăng dưi mâo djăp prăk hlăm klei rŭ mkra snăn lăn čar bi ksiêm nik bruă anei, êjai lăn čar dôk ngă lu mta bruă yuôm bhăn mkăn, jing bruă tŭ mơh hŏng êlan klông dŭ mdiăng, bruă pui kmlă kñăm dưi mghaih msir jih ya mta bruă huĭdah mâo hĕ klei amâo mâo jăk, huĭdah lĕ hlăm klei kruh bruă kyua amâo mâo djăp prăk duh bi liê, lĕ hlăm klei amâo mâo dưi bi kna ênoh ngăn prăk hlăm wưng man dưn, thâo dah dŭm nư klei truh leh wưng kčah tla, dôk hyưt kơ klei amâo mâo jăk kyua jưh knang đei klei čan prăk mơ̆ng ala tač êngao, ênưih lĕ hlăm klei amâo mâo hơĭt ôh klei kơ ngăn prăk knŭk kna.

Dhar bruă gĭt gai bruă kƀĭn ala bi tŭ ư leh brei mâo dŭm hdră êlan kdlưn hĭn kñăm čiăng dưi ngă bruă anei. Siămdah, čiăng dưi ngă bruă hŏng klei kjăp, akâo kơ knŭk kna ksiêm wĭt 19 hdră êlan bi mâo klei hlak mblang klă mngač, kơ ya mta hmăi hŏng bruă anei, brei ngă bi nik, boh nik dŭm klei amâo mâo jăk, amâo mâo kjăp hlăm klei mbha bruă, amâo mâo bi mguôp hlăm klei ksiêm dlăng, mbha klei dưi kơ djăp gưl čiăng đăm lĕ ôh hlăm klei luič liê hơăi mung mang, bi mđing truh kơ dŭm hdră êlan, anôk bruă kăp ksiêm, mtă amâo mâo jăk ôh čoh čuăn kơ klei bi mlih, amâodah ksiêm wĭt bi nik klei hmăi tơdah leh čoh čuăn./.