Angĭn êbŭ 13, leh anăn boh nik gưl êa lip knhal jih mlan 11/2025 ngă kơ 1.653 boh sang ti kwar Krah leh anăn Lăn Dap Kngư dlưh rai, êbeh 35 êbâo boh sang jhat rai, dŭm êbâo gŏ êsei mnuih ƀuôn sang lĕ hlăm klei dleh dlan. Leh êa lip mrâo jih, lăn lŭ adôk mâo hlăm djăp anôk ti Dhŭng kwar Krah, Khua knŭk kna Phạm Minh Chính truh leh ti krĭng phŭn mâo êa lip ti Ngŏ Dak Lak, mâo klei iêô mthưr kđi čar: mkra wĭt leh anăn lŏ mdơ̆ng sang kơ mnuih ƀuôn sang leh gưl angĭn êbŭ êa lip!

 “Drei pŏk ngă "Hdră êlan Quang Trung" mâo klei mjêč,  jhŏng hlăm bruă lŏ mdơ̆ng sang dôk.  Hdră êlan Quang Trung msir 2 bruă djŏ tuôm kơ sang dôk. Sa jing êmưt hĭn êlâo hruê 31/1/2026 jih jang pưk sang dlưh rai, êa puh đung lŏ mkra jih. Bruă klam tal dua jing mkra sang jhat rai snăn brei leh êlâo hruê 31/12/2025.”

Sa hruê leh klei pŏk ngă mơ̆ng Khua knŭk kna, hruê 1/12, mơ̆ng Hà Tĩnh truh Lâm Đồng, boh nik ti krĭng mâo angĭn êbŭ, êa lip Dak Lak, Khánh Hòa, Gia Lai, êbeh 5.600 čô knuă druh, lĭng kahan mơ̆ng dŭm anôk bruă lĭng kahan; giăm 5.100 čô knuă druh, kahan ksiêm hrăm mbĭt ba kahan.

 Mlam yan puih truh pral snăk ti krĭng êa lip Hòa Thịnh (Dak Lak). Hlăm ênai lir, ktuôp mñê mlam, ti dlông tur lăn adôk msah, pui mtrang anôk rŭ mdơ̆ng mtrang mgăt phung lĭng kahan ngă ksô, bŭ mnơ̆ng mkra mjing, digơ̆ mphŭn gưl mă bruă mdê snăk: lŏ mdơ̆ng sang kơ mnuih ƀuôn sang mơ̆ng anôk tur lăn lŭ êlam. Amâo mâo ênai kwang, amâo klei blŭ bi mñă, “Hdră êlan Quang Trung” mjêč mâo hŏng klei tlăng lăn hŏng kiê kngan, ksô tuh bê tông ruăt kuăt leh anăn dŭm knhuang êbat jiă lăn lŭ jih mlam.

Trung uý Hồ Hoài Phin, Tiểu đoàn 1, Trung đoàn 143, Sư đoàn 315 (Êpul kahan 5) brei thâo, ti đa đa anôk tur, diñu lŏ mkra wĭt lu blư̆ kyua tur lăn lŏ dơ̆ng êun.

 “Lăn lŭ anei snăn ñu ƀlĭt snăk, bi kgăn kơ lu mta bruă. Wăt tơdah deh dlan snăk ƀiădah hŏng ai tiê đua klam hĭn, ayŏng adei ăt gĭr bi leh jih bruă klam, mâo hnơ̆ng jăk lu hĭn.”

 “Mjêč” jing ai tiê hlăm Hdră êlan Quang Trung, ƀiădah klei kpĭ mjuăt leh anăn hdră mnêč dưi dưm bi knar hŏng klei čiăng kơ hnơ̆ng. Thượng tá Đỗ Thành Thái, Khua dlăng bruă Đảng Sư đoàn 315 (Êpul kahan 5) brei thâo, knŏng mâo sa klei thâo čiăng kơ dŭm bruă mdơ̆ng mâo jih 2 klei čiăng, anăn jing ƀrư̆ thiăm klei gĭr, mă bruă jih mlam.

 “Yan adiê mâo găl jăk, adiê hjan lu, ƀiădah hmei gĭr mtă mtăn kơ knuă druh, lĭng kahan hŏng ai tiê msir klei dleh dlan. Mbha 3 gưl, 3 êpul, boh nik jing mđĭ êpul mă bruă mlam čiăng bi leh bruă klam.”

Ai tiê” dưi hŏng hjan, amâo uêñ hŏng mđiă, jih hruê mlam”, knuă druh hgŭm hlăm  "Hdră êlan Quang Trung" amâo brei pô êmưt ôh. Mơ̆ng aguah truh kơ ƀuôn sang čuh pui, phung kahan hơô ao mtah jiă lăn lŭ, ăt djă ksô ƀê tông, đĭ ti pra rŭ mdơ̆ng kmeh. Khua gĭt gai ngă mbĭt, phung kahan ngă bruă ktrŏ.

 Hŏng mnuih ƀuôn sang krĭng êa lip, bruă ƀuh ti ală mta boh sang pô ƀrư̆ dơ̆ng leh hlăm mlam amâo djŏ jing klei mơak ôh, ƀiădah lŏ jing klei mđĭ ai tiê leh dŭm hruê luč liê. Lê Hùng Nhựt, alŭ Mỹ Điền, să Hoà Thịnh, čar Dak Lak, brei thâo:

 “Knŭk kna ba kahan hriê đru mnuih ƀuôn sang snei jing hmei mơak snăk, hdơr knga snăk. Tơdah amâo ôh phung lĭng kahan đru, ka lač ôh kơ bruă mdơ̆ng sang, bruă kih mdoh ăt kăn thâo mơh si srăng ngă.”

Leh 3 hruê kăm mkŏ mjing “Hdră êlan Quang Trung”, dŭm boh sang mrâo ƀrư̆ dưi bi leh ti dlông lăn lŭ. Anei amâo djŏ knŏng jing anôk gang adiê hjan mđiă ôh, čiăng kơ mnuih ƀuôn sang păn kjăp ƀuôn sang leh yan adiê ngă. "Hdră êlan Quang Trung" găn leh klei kčah mơ̆ng sa hdră msir boh jhat klei yan adiê ngă, jing leh klei bi knăl jăk siam kơ ai ktang bi hgŭm leh anăn bruă klam kđi čar ti anăp mnuih ƀuôn sang. Asăp mtrŭn pô gĭt gai Knŭk kna mkŏ mtam hŏng hnơ̆ng mjêč phung kahan. Dŭm boh sang hŏng ƀaih êjai mgang mnuih ƀuôn sang srăng dưi ruh, ƀuh sang mrâo, msĕ si klei kruăk knăl kơ klei mĭn leh anăn klei khăp anak mnuih. Dŭm klei jăk siam anei dưi mdơ̆ng hŏng klei mĭn mrâo, rơ̆ng kjăp hŏng hruê mmông, đru kơ mnuih ƀuôn sang êđăp ênang hĭn hlăm klei yan adiê ngă./.