Khua bruă kƀĭn ala Vương Đình Huệ lŏ mñă thŭn 2022 lan čar drei mâo leh lu klei tŭ dưn jăk lehanăn kluôm ênŭm. Klei duh mkra kluôm lŏ dơ̆ng krơ̆ng klei hơĭt kjăp, mkhư̆ klei prăk luič ênoh, klei tŭ ênoh ênil kah knar hlăm thŭn đĭ 3,15%, dôk hlăm ênoh bruă kƀĭn ala tĭng mkă kơ klei bi liê, klei đĭ kyar DGP truh 8,02%, jing ti hnơ̆ng kdlưn hĭn hlăm 10 thŭn êgao, bi kna jih jang klei duh mkra. Bruă kƀĭn ala, êpul khua kiă kriê bruă kƀĭn ala, dŭm anôk bruă kƀĭn ala, Êpul Gơ̆ng bruă ƀuôn sang dŭm gưl lŏ dơ̆ng mâo lu klei bi mlih, mđĭ hnơ̆ng kjăp, tŭ jing hlăm klei ngă bruă.

“Bruă kƀĭn ala ksiêm dlăng, bi mklă 5 êpul bruă prŏng, yuôm bhăn, lehanăn hŏng klei mjêč ti anôk bi kƀĭn êngao hdră tal 2 đru ruh mgaih leh pral  lu klei dleh dlan, klei gun kpăk kñăm mjing knơ̆ng yuôm bhăn pioh hlue ngă bruă čuăn thŭn 2023 lehanăn hlăm dŭm thŭn ti anăp”.

Khua bruă kƀĭn ala Vương Đình Huệ mtă, thŭn 2023, dŭm gưl dhar bruă, êpul êya, phung duh mkra lehanăn jih jang phung ƀuôn sang păn kjăp jih jang hdră mtrŭn mơ̆ng Êpul khua kiă kriê bruă Đảng gưl dlông, hdră mtrŭn mrô 68/2022 mơ̆ng bruă kƀĭn ala kơ hdră mđĭ kyar klei duh mkra ala ƀuôn thŭn 2023; boh nik lŏ mlih mrâo hdră êlan ngă bruă, čŏng tui duah hdră êlan jăk lehanăn djŏ jih ai tiê hlăm klei kiă kriê lehanăn gĭt gai.

Khua bruă kƀĭn ala hmăng hmưi, čiăng lŏ bi kjăp hĭn klei bhiăn mđĭ kyar, mđing ruh mgaih jih klei dleh dlan, đru bi pral kơ bruă duh mkra mnia mblei, čiăng kơ phung ƀuôn sang lehanăn phung duh mkra mâo klei găl hlăm klei mă bruă. Mđing mơh kơ bruă mđĭ kyar dhar kreh bi năng hŏng bruă duh mkra, hŏng bruă kđi čar, yang ƀuôn, mâo nanao klei ksiêm duah, mkŏ mjing hdră ala čar kñăm lŏ bi kơrŭ bruă dhar kreh tui si klei khua gĭt gai Đảng Nguyễn Phú Trọng gĭt gai. Ngă jăk jih jang hdră êlan kơ klei hdĭp mda ala ƀuôn, răng mgang wăl hdĭp mda, duh mĭn kơ mnơ̆ng dhơ̆ng ai tiê klei hdĭp phung ƀuôn sang, boh nik hŏng phung mâo bruă tŭ dưn hŏng lăn čar, phung dôk hlăm klei dleh dlan ti krĭng taih kbưi knông lăn plao ksĭ, krĭng mnuih djuê ƀiă.

Mbĭt hŏng anăn lŏ dơ̆ng mđĭ hĭn ai ktang, bi kjăp bruă răng mgang lăn čar, răng mgang klei êđăp ênang yang ƀuôn, mđĭ bruă bi mguôp hŏng ala tač êngao, ngă bruă hŏng klei tŭ jing, hơĭt kjăp bi hgŭm mđĭ kyar pral. Anăn yơh jing mta kñăm kơ bruă pioh mđĭ kyar. Čiăng dưi ngă jih jang hŏng klei tŭ jing djăp hdră êlan mơ̆ng klei bi kƀĭn mjêč tal 2, Bruă kƀĭn ala gưl 15, Khua bruă kƀĭn ala   Vương Đình Huệ mtă:

“Knŭk kna, Khua knŭk kna, dhar bruă gĭt gai bruă kƀĭn ala, Êpul gơ̆ng bruă djuê ana, dŭm anôk bruă hlăm bruă kƀĭn ala, dŭm gưl dhar bruă hlăm knŭk kna, phung bi ala bruă kƀĭn ala, dŭm êpul mâo hlue ngă leh hŏng klei pral, jih jang klei bhiăn, hdră mtrŭn mrâo mâo bi mklă, bi djŏ hŏng bruă klei mĭn, hŏng bruă mkŏ mjing, bruă knuă druh kñăm dưi ngă djŏ hŏng ai tiê jih jang bi sa ai,bi thâo săng mâo khua gĭt gai Đảng Nguyễn Phú Trọng mñă leh hlăm lu blư̆. Boh nik, phung bi ala bruă kƀĭn ala hŏng dŭm hdră găl guôp, hâo hưn hŏng klei pral, djăp ênŭm truh hŏng phung ƀuôn sang boh tŭ dưn klei bi kƀĭn; mđing hmư̆ bi mklin, lehanăn mdưm hlăm klei hâo mdah jih jang klei blŭ mơ̆ng phung ƀuôn sang, ksiêm dlăng klei mghaih msir bruă knuă, klei phung ƀuôn sang kčŭt hưn”.

Lehanăn čŏng bi mguôp hlăm bruă mprăp bi bhĭ ênŭm djăp mta klei pioh kơ phung ƀuôn sang mâo mơak yan mnga, drông Tết Nguyên đán Quý Mão mơak mñai, jăk yâo, êđăp ênang, mkiêt mkriêm, mjing ai êwa mtluk mtlak mơak mñai truh kơ grăp boh sang, kut kat ngă bi dưi hdră mtrŭn klei bi kƀĭn prŏng Đảng 13, hdră mđĭ kyar bruă duh mkra ala ƀuôn thŭn 2023 mơ̆ng dŭm hrue tal êlâo, mlan tal êlâo hlăm thŭn mrâo./.