Blŭ hrăm ti anôk bi kƀĭn, Khua bruă kƀĭn ala Trần Thanh Mẫn brei thâo, ti anôk bi kƀĭn anei, dhar bruă gĭt gai bruă kbĭn ala mă klei blŭ, hlak mblang, bi mlih  28 klei čih mkra hdră bhiăn, hdră mtrŭn mâo trông čhai leh gưl tal 1 mơ̆ng klei bi kƀĭn, tĭng srăng ba mdah kơ bruă kƀĭn ala ti anôk bi kƀĭn tal 2. Klei bi kƀĭn ăt mâo klei blŭ tal êlâo kơ dŭm mta bruă ba mdah hŏng bruă kƀĭn ala ti anôk bi kƀĭn tal 2, mâo: hdră bhiăn mlih mrâo, thiăm mbŏ dŭm mta mơ̆ng hdră bhiăn răng mgang ala čar; hdră mtrŭn mơ̆ng bruă kƀĭn ala kơ klei mlih mrâo amâodah lăm lui klei bhiăn kiă kriê ngăn prăk, hnơ̆ng ênoh mâo ba wĭt mơ̆ng dŭm anôk bruă, êpul êya bruă mơ̆ng knŭk kna; Klei dăp wĭt êpul mă bruă gưl čar thŭn 2025. Khua bruă kƀĭn ala  Trần Thanh Mẫn lač:

 “Grăp mta bruă mâo ksiêm dlăng amâo mâo djŏ knŏng kñăm bi leh jih jang klei bhiăn, ƀiădah lŏ mjing boh kdrŭt mrâo kơ klei mđĭ kyar lăn čar, lehanăn rơ̆ng bruă kiă kriê bruă knŭk kna hŏng klei kjăp hlăm klei bi mlih mrâo. Dŭm anôk bruă bi mdah, anôk bruă kăp ksiêm lehanăn dŭm êpul êya djŏ tuôm mâo klei bi mguôp kjăp, ngă bi mngač jih jang bruă dôk mâo lu klei blŭ, rơ̆ng kơ djăp mta hră mơar mâo bi mklă jing ênưih thâo săng lehanăn ênưih hlue ngă, djŏ hŏng klei sĭt”.

Ti anôk bi kƀĭn, phung khua êmua hlăm dhar bruă gĭt gai bruă kƀĭn ala mâo leh klei blŭ kơ bruă čih mkra hdră bhiăn mkŏ mjing bruă sang čư̆ êa alŭ wăl lŏ mlih mrâo. Dhar bruă gĭt gai bruă kƀĭn ala tŭ ư hŏng mta phŭn klei leh čih mkra, klei bi mlih mơ̆ng knŭk kna. Siămdah, akâo lŏ bi mkă tĭng mta mtrŭn mơ̆ng êpul gơ̆ng bruă ƀuôn sang gưl čar leh mbha gưl mơ̆ng knơ̆ng bruă sang čư̆ êa knar gưl, amâodah êpul gơ̆ng bruă ƀuôn sang gưl să. Khua anôk bruă hdră bhiăn lehanăn hlue ngă hdră bhiăn  Hoàng Thanh Tùng lač:

 “Êpul gơ̆ng bruă ƀuôn sang jing anôk bruă bi ala kơ klei mĭn, klei čang hmăng mơ̆ng mnuih ƀuôn sang ti alŭ wăl. Kyuanăn, ba jao klei dưi, bruă čuăn tui si hdră mtrŭn kơ Êpul gơ̆ng bruă ƀuôn sang, kơ knơ̆ng bruă sang čư̆ êa jing anôk bruă hră mơar mơ̆ng knŭk kna ti alŭ wăl, jing klei amâo mâo găl ôh, kơ klei jing, bruă klam, lehanăn hdră mă bruă mơ̆ng grăp anôk bruă, ênưih ngă kơ anôk bruă kiă kriê bruă sang čư̆ êa bi mlih hĕ bruă čuăn, klei dưi mơ̆ng sa anôk bruă mâo mnuih ƀuôn sang ruah ti alŭ wăl, amâo mâo djŏ ôh hŏng klei bhiăn mkŏ mjing klei dưi mơ̆ng knŭk kna, leh bi jao bruă, bi hgŭm lehanăn bi ksiêm klei dưi”.

Hlak mblang kơ klei anăn, khua phŭn bruă kiă kriê bruă knuă Phạm Thị Thanh Trà brei thâo:

 “Hmei mkă dlăng hŏng dŭm mta, tal êlâo jing anôk bruă kđi čar bi djŏ hŏng hdră êlan mơ̆ng Êpul khua kiă kriê bruă Đảng gưl dlông, mơ̆ng phŭn bruă kđi čar, mđing hlue ngă kjăp bruă mâo jao, lehanăn mbha klei dưi plah wah gưl dlông lehanăn alŭ wăl, lehanăn plah wah dŭm gưl hlăm alŭ wăl. Tal dua lĕ, ăt kbiă hriê mơ̆ng klei bi mlih klei bhiăn kiă kriêtui si hdră êlan hđăp, nao kơ klei kiă kriê alŭ wăl hlăm hdră klă mngač, hnŭk êngiê ngă phŭn mă bruă jăk kơ mnuih ƀuôn sang. Tơdah msĕ snăn amâo lŏ bi lar lu ôh klei dưi kơ êpul hgŭm bruă yang ƀuôn jing ăt dleh mơh”.

Blŭ hrăm ti anôk trông čhai, Khua bruă kƀĭn ala Trần Thanh Mẫn mtă kơ anôk čih mkra, lehanăn anôk bruă mâo klei dưi lŏ kăp ksiêm, mbha gưl bi kjăp, čiăng kơ mgi dih leh bruă kƀĭn ala bi mklă, dŭm alŭ wăl hlŏng dưi ngă mtam:

Kâo mtă lŏ dơ̆ng bi ksiêm nik. Mơ̆ng ară anei truh kơ anôk bruă kƀĭn ala bi mklă leh knhal tuič, knŏng ya mta klei jao kơ knŭk kna lŏ dơ̆ng mbha gưl kơ alŭ wăl tui si klei bhiăn, jing drei bi mkă tĭng čiăng kơ mgi dih leh mâo klei bi mklă snăn alŭ wăl amao lŏ amâo dưi lač ôh amâo mâo dưi ngă, kyua dleh kpăk dŏ anei klei dih. Hdră bhiăn ksiêm duah jing jao kơ knŭk kna čoh čuăn mơ̆, đăm soh hŏng hdră bhiăn phŭn čiăng kơ drei hlue ngă hlăm êpul mă bruă”.

  Ăt hlăm klei bi kƀĭn hrue kăm êgao, dhar bruă gĭt gai bruă kƀĭn ala mâo bi mklă leh asăp mtrŭn bi mlih mta 10 mơ̆ng asăp mtrŭn klei kơ ênoh mnuih. Snăn, grăp kruôp ung mô̆, grăp čô mnuih mâo klei dưi ruah hrue mlan pô čiăng kkiêng anak, ênoh anak pô kkiêng, lehanăn êwang bi kpleh gưl kkiêng, hŏng gưl thŭn, kơ klei suaih pral, kơ klei dưi hriăm mjuăt, klei mă bruă knuă, hnơ̆ng hui wĭt, lehanăn klei rông ba anak aneh, mơ̆ng ung mô̆ hlăm klei mtăp mđơr./.