Hlăm 11 mlan thŭn anei, êpul bruă djŏ tuôm čar Kontum hmao ƀuh truh 83 klei ngă soh hŏng hdră bhiăn răng mgang dliê, mâo mă kơ̆ng êbeh 419m3 kyâo djăp mta, hŏng ênhă dliê rai êbeh 32ha.Ti anôk Êpul Gơ̆ng bruă ƀuôn sang čar Kontum êmuh, pô bi ala Trần Bá Tuấn lač kơ dua klei êdah êdi ti kdriêk Ia H Drai, lehanăn Sa Thầy luič truh dŭm êtuh m3 kyâo, ñu lač klei anei kbiă hriê mơ̆ng klei phưi tha bruă knuă, kƀah klei đua klam, tơl hnơ̆ng lŏ đru kơ phung tlĕ kyâo: “Hŏng ênoh kyâo luič jing prŏng msĕ snăn, tơdah drei amâo mâo ngă jăk ôh bruă bi mguôp, bi mklă bruă klam mơ̆ng dŭm anôk bruă kiă kriê, hlăm anăn mâo pô dliê, anôk bruă ksiêm dlăng dliê kyâo, bruă sang čư̆ êa alŭ wăl... Snăn amâo srăng mâo ôh sa čô mnuih jhŏng mŭt hlăm dliê lehanăn druôm hĕ sa ênoh kyâo lu msĕ snăn. Lehanăn klei uă druôm kyâo lu djuê anăn, snăn klei dŭ mdiăng kyâo ti êlan srăng kbiă? Kyuadah mâo mơh dŭm anôk gak răng ti mbah dliê, kyuanăn bruă klam anei jing mơ̆ng dŭm dhar bruă djŏ tuôm yơh?”

Wĭt lač klei Êpul gơ̆ng bruă ƀuôn sang čar êmuh, Nguyễn Hữu Tháp, k'iăng khua knơ̆ng bruă sang čư̆ êa čar Kontum lač, phưi tha klei bi rai dliê msĕ djuê anăn, klei ngă soh jing kƀah klei đua klam, klei kčĕ đru mơ̆ng dŭm anôk bruă kiă kriê dliê kyâo, knơ̆ng bruă sang čư̆ êa alŭ wăl, lehanăn dŭm anôk bruă ka mâo klei uêñ mđing sĭt êmĭt ôh, bruă klam mơ̆ng phung knuă druh, kiă kriê, tơl hnơ̆ng lŏ đru kơ phung tlĕ kyâo, dŭ mdiăng kyâo soh hŏng klei bhiăn, lehanăn hdră êlan đru kơ bruă dlăng kriê dliê kyâo ăt kƀah; klei thâo kơ bruă mơ̆ng phung knuă druh bruă dliê kyâo awăt... kơ hdră mghaih msir bruă knuă, Nguyễn Hữu Tháp lač: “Knơ̆ng bruă sang čư̆ êa čar srăng lŏ dơ̆ng kiă kriê dŭm knơ̆ng dhar bruă, djăp alŭ wăl boh nik dŭm gưl ti kdriêk, lehanăn să čiăng dưi răng kriê dliê. Mđĭ hĭn bruă klam kơ pô dliê, lehanăn êpul phung ngă bruă kiă kriê dliê kyâo. Mâo klei hiu suăng kđiăm hĭn, boh nik hlăm yan phung ƀuôn sang ngă pưk hma. Knơ̆ng bruă sang čư êa čar srăng mkŏ mjing hdră, kñăm hyuă kjăp hĭn bruă ksiêm dlăng, lehanăn gĭt gai djăp alŭ wăl mơ̆ng kdriêk truh kơ să, lehanăn djăp êpul êya čiăng hmao ƀuh bi pral, mghaih msir bi ktang klei ngă soh bi rai dliê”.

Nguyễn Hữu Tháp, k’iăng khua knơ̆ng bruă sang čư̆ êa čar Kon Tum ăt lač, mkă hŏng wưng anei thŭn dih, klei bi rai dliê hlăm čar hrŏ hĭn leh kơ ênoh, ênhă dliê rai, lehanăn ênoh kyâo ngă soh. Hlăm thŭn, čar mâo mghaih msir truh 63 klei ngă soh, phat mkra truh 17 klei, lehanăn hlăk dôk ksiêm 23 klei. Kơ bruă klam mâo mghaih msir leh 27 čô hlăm anăn mâo 16 čô khua kiă kriê. Sang phat kđi yang ƀuôn dŭm gưl mâo ba phat mkra leh 4 kđi soh, đŭ bi kmhal 20 čô phung ngă soh hŏng hnơ̆ng 347 mlan krư̆ kđăl hlăm mnă, 65 mlan kđi yuôl amâo mâo dưi kbiă hiu kơ êngao, lehanăn phat mkra kăm biăt amâo mâo krư̆ kđăl ôh 60 mlan./.