Bi ala kơ khua gĭt gai êpul ktuê dlăng, K’iăng khua êpul gơ̆ng bruă djuê ana mơ̆ng Bruă kƀĭn ala Nguyễn Lâm Thành brei thâo, boh tŭ klei ksiêm duah brei ƀuh, klei brei čan êmưt (boh nik jing ngăn prăk ngă bruă) lu jing phŭn agha mơ̆ng pô, lu hră mơar ktrâo lač truh kơ knhal jih thŭn 2023 mrâo bi leh, mkra mlih, bi mbŏ čiăng hluê ngă, ngă truh kơ boh tŭ klei brei čan dŭm hdră ala čar kñăm truh hruê 30-9-2023 mâo mă ƀiă.

Dhar bruă kƀĭn ala bi klă boh tŭ ktuê dlăng dŭm hdră ala čar kñăm êmưt klei brei čan (boh nik jing ngăn prăk ngă bruă) mrâo mâo mă hlăm brô 15% (3.800 êklai prăk). Tơdah amâo mâo ba ngăn prăk hluê ngă thŭn 2023 kơ thŭn 2024 srăng ngă truh bruă lui hĕ klei tĭng mă thŭn 2023 hlăm brô 16.000 êklai prăk. Khua kiă kriê dhar bruă ngăn prăk mơ̆ng bruă kƀĭn ala Lê Quang Mạnh lač:

"Kâo ăt tŭ ư hŏng klei năng mjêč mơ̆ng bruă lŏ dơ̆ng ba ênoh prăk anei hŏng ngăn prăk ngă bruă thŭn 2022 truh kơ ară anei ka dưi brei čan jih adôk hlăm brô 3.713 êklai prăk, kyua êlâo dih Khua knŭk kna hưn mdah leh dŭm hdră êlan mdê hjăn ka dưi bi klă kyuanăn amâo dưi brei čan jih ênoh prăk anei hlăm thŭn 2023. Ƀiădah, djŏ tuôm hŏng klei tĭng mkă thŭn 2024 mơ̆ng Bruă kƀĭn ala bi klă leh kyuanăn mñă kơ Phŭn bruă hdră êlan leh anăn duh bi liê bi klă thiăm boh klei anei hlăm klei hmăi hŏng klei đăo tĭng mơ̆ng thŭn 2024 čiăng kơ Dhar bruă kƀĭn ala mâo tur knơ̆ng ksiêm dlăng”.

Bi hŏng ênoh prăk ba hlăm thŭn 2024, k’iăng Khua knŭk kna Trần Lưu Quang hmăng hmưi Dhar bruă gĭt gai bruă kƀĭn ala leh anăn Bruă kƀĭn ala săng brei leh anăn thâo klă, kyua mta kñăm mơ̆ng bruă mlih ngăn prăk anei jing prŏng êdi kơ dŭm alŭ wăl. “Tơdah khăt ênoh prăk anei klei kpĭ brei čan kơ knŭk kna srăng hrŏ, ƀiădah hmăi kơ dŭm alŭ wăl”. Alŭ wăl dôk čang guôn, čiăng êdi. K’iăng knŭk kna Trần Lưu Quang lač:

"Ênoh prăk anei klă sĭt kơ 3 hdră anei jing mâo hnơ̆ng. Mta kñăm mơ̆ng drei prŏng sơnăk, tơdah ară anei drei amâo mâo ai dưi bi mbŏ srăng dleh kơ dŭm alŭ wăl. Ară anei ênoh pprăk lu hĭn kpăk djŏ tuôm hŏng klei brei čan ênoh prăk ngă bruă amâodah ênoh prăk bi liê jêñ jêñ. Bi ênoh prăk duh bi liê mđĭ kyar tơdah hmei amâo mâo gĭr mơ̆ng ară anei truh ti hruê 31/1/2024 knŏng dôk mă hlăm brô êbeh 1 êbâo êklai prăk. Bi kơ ngăn prăk brei čan ngă bruă drei mâo hlăm brô 4 êbâo 500 êklai prăk, ƀiădah klă sĭt ênoh prăk anei jing dleh êdi. Tơdah mâo hdră êlan hlăm wang 7 hruê hưn mdah mơ̆ng Knŭk kna mơĭt leh anăn hmao ngă drei srăng ngă bi klă ti hruê 28/11.”

Bi klă hlăm klei kƀĭn, Khua bruă kƀĭn ala Vương Đình Huệ brei thâo, hlăm klei bi trông brei ƀuh, phung bi ala mâo klei tŭ ư hŏng bruă ba mdah hdră mtrŭn kơ hdră mdê hjăn hluê si klei bi klah čŭn, ƀiădah hdră ngă bruă si srăng ngă čiăng lŏ dơ̆ng bi trông klă nik leh anăn djŏ hŏng klei čuăn.

Bi hŏng dŭm boh klei kơ ngăn prăk msĕ si tĭng mkă ngăn prăk, bi kdung ngăn prăk, Khua bruă kƀĭn ala mñă kơ K’iăng Khua knŭk kna gĭt gai dŭm anôk bruă mprăp klei hưn mdah klă klơ̆ng mơ̆ng knŭk kna kơ boh klei anei. Jao kơ Dhar bruă ngăn prăk, Ngăn prăk mơ̆ng bruă kƀĭn ala bi klă kơ mta phŭn anei. Ai tiê jing ruh mgaih jih hnơ̆ng klei kpăk gŭn hluê ngă dŭm hdră ala čar kñăm ƀiădah amâo brei mâo klei soh hŏng hdră bhiăn.

"Ngăn prăk mơ̆ng thŭn 2024 mrâo anei tĭng mkă leh, êdei anei lŏ tuôm hŏng klei đăo tĭng, tĭng mkă, bi klă ngăn prăk. Hluê si ai tiê ba ngăn prăk mơ̆ng thŭn 2023 kơ thŭn 2024 yơh. Ăt srăng mngă djŏ hŏng hdră bhiăn leh anăn bi klă mâo mơ̆ anôk amâo mâo bi djŏ? Bi kơ klei dưi ƀruă Kƀĭn ala dưi bi klă ƀiădah mâo klei amâo mâo bi djŏ hŏng klei tĭng mkăn ngăn prăk mơ̆? Mâo klei amâo mâo bi djŏ kơ klei tĭng tla, tĭng mkă, bi klă ngăn prăk? Klei amâo djŏ hŏng Hdră mtrŭn mơ̆ng bruă Kƀĭn ala mơ̆? Čiăng mơh klei bi klă klei hmăi kơ ngăn prăk”.