H’Mên Teh, mnuih Mnông jing đảng viên mrâo dưi bi mŭt hlăm gưl hruê 22 mlan 12-2023 mrâo êgao, ti êpul đảng buôn Diêo, să Bông Krang, kdriêk Lăk. H’Mên Teh brei thâo, dưi mŭt hlăm êpul Đảng jing klei ktưn hưn leh anăn hơ̆k mơak leh anăn jăk mơak snăk kyua klei gĭr ktưn mơ̆ng pô hlăm wưng êgao dưi čih yap:

“Kâo dưi mŭt hlăm êpul Đảng jing ktưn hưn snăk kyua klei anăn. Hlăm 1 thŭn jing đảng viên mkăp anei kâo srăng gĭr hĭn čiăng mđĭ kơ pô klei jăk siam mơ̆ng Đảng viên leh anăn gĭr ktưn hĭn čiăng 12 mlan êdei kâo srăng jing đảng viên klă sĭt”

Dưi mŭt hlăm êpul Đảng mơ̆ng thŭn 2018, amai Lữ Thị Thái djuê ana Thái, ară anei jing Đảng viên mkra mjing mbruă mơ̆ng Êpul bruă đảng buôn Thái, să Bông Krang, kdriêk Lăk. Ba anăp hlăm hdră bi mlih ana pla mjing, mnơ̆ng rông ti alŭ wăl, ară anei hŏng gru hmô rông êmô, rông hluăt, pla ana boh kroh, ba wĭt kơ gŏ sang amai Thái ênoh prăk êbeh 400 êklăk prăk. Êngao kơ amai Thái ba anăp nanao hlăm dŭm hdră bruă leh anăn klei mtrŭt mjhar ti alŭ, ƀuôn msĕ si myơr lăn mkra êlan krĭng ƀuôn sang, pui kmlă kuč mngač êlan krĭng ƀuôn sang, mkra êlan mnga…

“Jing sa čô đảng viên ba anăp, tal sa jing hâo hưn mtô mblang hlue ngă jăk hdră êlan mơ̆ng Đảng, hdră êlan mơ̆ng Hdră bhiăn knŭk kna, bi hŏng ñu pô snăn ba anăp kơ djăp mta bruă. Hlue ngă Hdră mtrŭn 05 mơ̆ng bruă Đảng kdriêk snăn hmei ăt ba hlăm boh sĭt, kâo pô ăt ngă êlâo čiăng kơ mnuih ƀuôn sang hlue ngă snăn klă klơ̆ng ară anei ana pla mjing mnơ̆ng rông ti ƀuôn jing 70%, êlâo dih pla kphê snăn amâo guôp hŏng lăn čuah anei ôh, bi mlih snăn klă klơ̆ng kjăp, ară anei mnuih ƀuôn sang mđĭ kyar ktang.”

Amâo djŏ knŏng mđing mđĭ kyar đảng viên mnuih djuê ƀiă hlăm grăp êpul đảng, bruă mđĭ kyar đảng viên mnuih djuê ƀiă mguôp hŏng dăp phung knuă druh jing mnuih djuê ƀiă hlăm bruă kđi čar, anôk bruă knŭk kna mâo bruă Đảng kdriêk Lăk mđing dlăng. Truh ară anei, ênoh phung knuă druh, phung mă bruă knŭk kna jing đảng viên mnuih djuê ƀiă hlăm kluôm kdriêk jing 1547 čô. Hlăm anăn, gưl să mâo 227 čô. Ayŏng Y Wu Sruk –  K’iăng Khua Knơ̆ng bruă Sang čư̆ êa să Yang Tao, kdriêk Lăk brei thâo, bruă mđĭ kyar đảng viên mnuih djuê ƀiă mguôp hŏng ba yua knuă druh jing mnuih djuê ƀiă tinăn mtam dưi mđĭ lar ai ktang mơ̆ng dŭm êpul bruă Đảng ti nah gŭ. Mơ̆ng anăn, đru mguôp jăk hlăm hdră kñăm mđĭ kyar bruă duh mkra – ala ƀuôn ti alŭ wăl, mbĭt anăn, bruă hâo hưn, mtô mblang mnuih ƀuôn sang ti dŭm alŭ ƀuôn hlue ngă hdră êlan, hdră mtrŭn mơ̆ng Đảng, Knŭk kna dưi găl ênưih, tŭ dưn hĭn:

“Să Yang Tao mâo 95% čô mnuih djuê ƀiă, pô thâo săng klei bhiawn hdĭp mda tinei, boh nik jing klei blŭ čiăng kah mbha hŏng mnuih ƀuôn sang, pô ăt jing mnuih tinei, pô thâo knuih hdĭp mnuih ƀuôn sang, klei hdĭp dleh dlan mơ̆ng mnuih ƀuôn sang, mơ̆ng klei tur knơ̆ng thâo săng anăn ba yua hdră êlan mơ̆ng Đảng čiăng ênưih hâo hưn kơ mnuih ƀuôn sang thâo săng leh anăn ênưih hâo hưn hlăm klei hdĭp.”

 Kdriêk Lăk mâo êbeh 75 êbâo čô mnuih ƀuôn sang, hlăm anăn ênoh mnuih djuê ƀiă mâo êbeh 63%. Đào Thị Thanh An, K’iăng Khua dlăng bruă Đảng kdriêk Lăk, čar Dak Lak brei thâo, čiăng mđĭ kyar đảng viên hlăm dŭm êpul alŭ, ƀuôn krĭng taih kbưi, krĭng mnuih djuê ƀiă, Anôk dlăng bruă Đảng jao kơ Anôk mkŏ mjing kdriêk bi hgŭm hŏng dŭm anôk mkŏ mjing Đảng ktrâo lač kơ bruă hâo hưn čiăng ruh mgaih klei gun kpăk, mbĭt anăn mtô mñă, ksiêm dlăng, ktuê dlăng bruă mđĭ kyar đảng biên ti alŭ, ƀuôn. Kyua anăn, bruă mđĭ kyar đảng viên dưi hlue ngă djŏ hdră kčah, rơ̆ng hnơ̆ng čuăn leh anăn hnơ̆ng jăk đảng viên mrâo. Ară anei kluôm kdriêk adôk mâo 737 čô êdah êdi jing phung dôk dưi ksiêm dlăng bi mŭt Đảng hlăm thŭn 2024. Đào Thị Thanh An bi mklă:

“Grăp thŭn hmei mkŏ mjing dŭm hdră kčah, hră mơar čiăng gĭt gai kơ dŭm anôk bruă Đảng mơ̆ng akŏ thŭn brei ksiêm dlăng hưn mthâo kơ phung êdam êdi hgŭm hlăm dŭm adŭ hriăm mjuăt bi mŭt Đảng. čiăng mđĭ hnơ̆ng jăk phung đảng viên hlăm grăp thŭn hmei mkŏ mjing nanao hdră kčah mbha kơ phung khua hlăm anôk bruă Đảng, Anôk dlăng bruă Đảng nao kƀĭn mbĭt hŏng dŭm êpul bruă đảng ti alŭ, ƀuôn čiăng tă hdră, êngao kơ klei mđĭ kyar bruă duh mkra ala ƀuôn, mkŏ mjing rơ̆ng klei êđăp ênang krĭng ƀuôn sang ti anôk bruă nah gŭ ăt brei ktrâo lač kơ đảng viên ti dŭm êpul bruă đảng mđing ngă jăk hĭn kơ bruă mkŏ mjing Đảng, mđing atăt phung êdah êdi čiăng mđĭ kyar đảng viên.”

Êpul knuă druh, đảng viên jing mnuih djuê ƀiă ti Lăk mđĭ lar jăk bruă klam phŭn hlăm bruă kđi čar nah gŭ, ba anăp nanao hlăm klei mkŏ mjing êpul bi hgŭm jih jang mnuih ƀuôn sang, răng mgang leh anăn mđĭ kyar alŭ wăl./.