Knhal jih thŭn dih, phŭn bruă kđi čar mâo leh hdră mtrŭn mrô 57 kơ klei mđĭ kyar bruă kreh knhâo, kdrăp mrâo, mlih mrâo, lehanăn bruă bi mlih mrô hlăm ala čar. Leh mơ̆ng anăn, ti anôk bi kƀĭn Diên Hồng mâo leh klei bi kƀĭn kluôm ala hlue ngă hdră mtrŭn mrô 57, Khua gĭt gai Đảng Tô Lâm mâo leh klei blŭ hrăm gĭt gai ti anôk bi kƀĭn, lehanăn khua bruă kƀĭn ala Trần Thanh Mẫn ăt mâo klei hâo mdah kơ bruă anei. Bruă Đảng anôk bruă kƀĭn ala mâo leh hdră mtrŭn mrô 3260 čiăng bi hlue ngă hdră mtrŭn mrô 57. Ti anôk bi kƀĭn mjêč tal 9, bruă kƀĭn ala ksiêm dlăng, bi mklă hdră mtrŭn mrô 193 kơ dŭm klei bhiăn, hdră êlan mđĭ kyar pral bruă kreh knhâo, kdrăp mrâo, mlih mrâo lehanăn ba yua kdrăp mrô. Anei jing hdră êlan kñăm mghaih msir jih jang djăp mta bruă tal êlâo hĭn, lehanăn kơ êdei anăp srăng bi mlih hdră bhiăn mđĭ hĭn bruă ba yua kreh knhâo, kdrăp mrâo.

Blŭ hrăm ti anôk bi kƀĭn, Khua bruă kƀĭn ala Trần Thanh Mẫn mñă, hdră mtrŭn mrô  57 bi leh mta kñăm truh thŭn 2030, Việt Nam dôk hlăm ênoh 3 ala čar ba akŏ Ngŏ Dhŭng Asi, dôk hlăm ênoh 50 ala čar mrô sa dlông rŏng lăn, kơ ai dưi bi ktưn ba yua kdrăp mrô, lehanăn tĭng ênoh klei đĭ kyar klei mĭn anak mnuih, anôk mđĭ kyar dŭm mta bruă, dŭm bruă kdrăm mrô. Khua bruă kƀĭn ala Trần Thanh Mẫn mtă kơ êpul khua kiă kriê Êpul gơ̆ng bruă djuê ana, dŭm anôk bruă hlăm bruă kƀĭn ala, adŭ bruă kbĭn ala ngă mtam mta bruă anei;

 “Mđĭ kyar bruă kreh knhâo kdrăp mrâo, mlih mrâo hŏng klei mbruă, bi mlih jih jang bruă knơ̆ng čiăng mkŏ mjing anôk bruă kƀĭn ala ênuk mrâo, êngiê, klă mngač, truăn kơ bruă, kreh knhâo tŭ jing. Klei thâo mĭn anak mnuih srăng jing mta knơ̆ng đru kơ anôk bruă kƀĭn ala ksiêm dlăng kơ bruă bi mklă dŭm hdră êlan prŏng, djŏ hŏng klei dôk čiăng ară anei, mđĭ boh tŭ dưn klei ksiêm dlăng lehanăn thâo mkŏ jăk hĭn hŏng mnuih ƀuôn sang. Bruă kƀĭn ala bi ba akŏ hlăm bruă mrô, ba yua klei kreh knhâo kdrăp mrâo, mjuăt bi hriăm mnuih mă bruă hŏng klei kjăp hlăm bruă ƀi mlih mrô. Ngă hŏng klei pral, mâo klei tŭ jing jih jang hdră mtrŭn mơ̆ng bruă kƀĭn ala ba yua kdrăp mrâo hŏng klei kjăp. Mđĭ kyar hdră mă bruă ênuk mrâo, mjing atur kơ klei thâo ba yua klei mĭn anak mnuih… pioh kơ bruă hlăm anôk bruă kƀĭn ala”.

Khua bruă kƀĭn ala mñă, čiăng lŏ mđĭ hĭn klei thâo hlăm bruă knuă, lehanăn lŏ mâo hdră ksiêm duah klei ba yua kdrăp mrâo hlăm anôk bruă kƀĭn ala, tui hriăm mơ̆ng dŭm ala čar đĭ kyar, čiăng bi mâo ênŭm hdră mghaih msir jăk jih jang bruă hlăm anôk bruă kƀĭn ala Việt Nam.

Khua bruă kƀĭn ala hưn mthâo, ti anôk bi kƀĭn tal 9, hlăm mlan 5 tinăp, bruă kƀĭn ala srăng mă klei blŭ kơ hdră bhiăn klei kreh knhâo, kdrăp mrâo, lehanăn mlih mrâo hŏng klei mbruă, ksiêm dlăng čiăng bi mklă hdră bhiăn kdrăp mrâo, čiăng ruh mgaih jih dŭm klei gun kpăk, pŏk êlan kơ klei mđĭ kyar bruă kreh knhâo, kdrăp mrâo mlih mrâo mrô.

Bi trông ti anôk bi kƀĭn truăn kơ bruă, Khua phŭn bruă kreh knhâo lehanăn kdrăp mrâo Nguyễn Mạnh Hùng lač, hlăm hdră mtrŭn mrô 57, bruă kreh knhâo, kdrăp mrâo, mlih mrâo hŏng klei mbruă jing klei ngă mtam, jing wưng găl kơ Việt Nam jing ala čar đĭ kyar;

Hŏng klei mđĭ kyar bruă duh mkra sĭt nik amâo mâo dưi kƀah ôh hdră êlan ngă bruă hŏng klei săn asei mlei tŭ lu klei luič čiăng hlue ngă hdră mtrŭn mrô 57 jing sa bruă dleh lehanăn ktrŏ. Ƀiădah hŏng klei gĭt gai, nao mđrĭng mtlâo hlăm klei mă bruă jing leh boh kdrŭt phŭn mđĭ kyar lăn čar. Đăm lŏ dôk sa anôk amâo mâo klei đĭ kyar, čiăng dưi bluh đĭ ktang, amâo lŏ dôk mă mkrah dưh. Kyuanăn brei mâo klei ktuh êyuh tŭ lu klei săn asei mlei hlăm djăp mta.  Việt Nam kreh dưi ngă lehanăn mâo klei đĭ kyar ktang tơdah jhŏng tŭ klei luič liê kñăm čiăng bi leh bruă mlih mrâo mđrăm mbĭt hŏng jih jang mnuih ƀuôn sang hlăm klei kluôm ênŭm”.

Klei bi kƀĭn truăn kơ bruă "Anôk bruă kƀĭn ala hŏng kdrăp mrô, ba klei yua klei thâo mĭn anak mnuih ngă hlăm bruă mrô ti anôk bruă kƀĭn ala" bi êdah leh klei gĭr prŏng mơ̆ng bruă kƀĭn ala hlăm klei ba akŏ bi mlih mrô, ba yua klei kreh knhâo, kdrăp mrâo kñăm mđĭ hĭn boh tŭ dưn bruă knuă. Jih jang dŭm mta kñăm prŏng mâo čoh čuăn leh mơ̆ng hdră mtrŭn mrô 57 lehanăn dŭm hdră mtrŭn djŏ tuôm amâo mâo djŏ knŏng tui tiŏ truh kơ klei ba yua tar ƀar hlăm jih klei kreh knhâo, kdrăp mrâo, mlih mrâo hŏng klei mbruă, ƀiădah lŏ mjing atur kjăp kơ sa anôk bruă kƀĭn ala ênuk mrâo, klă mngač, truăn kơ bruă hĭn./.