Tui si klei hâo mdah mơ̆ng adŭ bruă kƀĭn ala, 6 mlan akŏ thŭn, bruă kăp kčĕ, pioh kơ bruă mkŏ mjing hdră bhiăn lŏ dơ̆ng ngă tal êlâo hĭn, mđing kơ hnơ̆ng kjăp. Găn leh hlăm 4 gưl bi kƀĭn, bruă kƀĭn ala mâo bi mklă leh truh 13 hdră bhiăn, 3 hdră mtrŭn tui si klei bhiăn, mă klei blŭ kơ 11 klei čih mkra dŭm hdră bhiăn mkăn, boh nik kơ bruă mkŏ mjing hdră bhiăn thŭn 2024.

Blŭ hrăm ti anôk bi kƀĭn, Khua bruă kƀĭn ala Trần Thanh Mẫn lač, 6 mlan akŏ thŭn, lăn čả dri mâo leh lu klei bi mlih jăk, hlăm anăn mâo wăt klei bi mguôp mơ̆ng anôk bruă kƀĭn ala, mơ̆ng dhar bruă gĭt gai bruă kƀĭn ala, mơ̆ng dŭm anôk ngă bruă hlăm anôk bruă kƀĭn ala. Mâo buă mkŏ mjing hdră bhiăn, bruă kăp ksiêm mơ̆ng gưl dlông lehanăn jih jang klei bi mklă dŭm bruă yuôm bhăn lŏ dơ̆ng mđĭ hĭn kơ ênoh lehanăn hnơ̆ng kjăp, kơ klei mă bruă klă mngač, kơ jih jang bruă mâo mnuih ƀuôn sang dôk mđing.

  Msĕ snăn, khua bruă kƀĭn ala Trần Thanh Mẫn bi mni kơ dĭm klei gĭr mơ̆ng Êpul gơ̆ng bruă djuê ana, dŭm anôk bruă hlăm anôk bruă kƀĭn ala lehanăn jih jang phung knuă druh, mnuih ngă bruă mâo bi leh sa ênoh bruă prŏng hlăm dŭm klei bi kƀĭn tui si hdră mâo leh lehanăn wăt hlăm dŭm bruă bi kƀĭn mjêč mơ̆ng anôk bruă kƀĭn ala.

Khua bruă kƀĭn ala Trần Thanh Mẫn mtă kơ jih jang phung khua hlăm dhar bruă gĭt gai bruă kƀĭn ala, êpul gơ̆ng bruă djuê ana, dŭm anôk bruă hlăm bruă kƀĭn ala hŏng ai tiê klei mĭn ngă bruă hŏng klei klă mngač, dlăng kơ klei djŏ, blŭ klei kpă, kñăm čiăng dưi mghaih msir jih klei dôk kƀah, lehanăn hlưk hlak jih klei hơăi hmang, kñăm ngă buă jăk hĭn hlăm wưng tinăp.

Khua bruă kƀĭn ala mñă, bruă hlăm 6 mlan knhal jih thŭn jing prŏng, boh nik jing bruă mprăp kơ klei bi kƀĭn tal 8, Bruă kƀĭn ala gưl 15 tĭng srăng mkŏ mjing hlăm mlan 10; mkŏ mjing klei bi kƀĭn phung truăn kơ bruă tal 6; ngă dŭm mta bruă kơ 3 mlan gưl tal 3 mơ̆ng êpul bruă Đảng anôk bruă kƀĭn ala, Êpul gĭt gai bruă kƀĭn ala, dŭm klei bi kƀĭn mơ̆ng dhar bruă gĭt gai bruă kƀĭn ala:

“Drei mđing kơ jih jang bruă mkŏ mjing hdră bhiăn, hdră bhiăn mtrŭn thŭn 2024 čiăng dưi lŏ mbŏ lehanăn bi kjăp djŏ tui si klei bhiăn anôk bruă kƀĭn ala, mâo ruah mdưm klei lŏ mbŏ hlăm bruă mkŏ mjing klei bhiăn, hdră bhiăn mtrŭn thŭn   2024, jih jang bruă čih mkra klei bhiăn mâo mprăp leh ƀhĭ ênŭm hră mơar, hrui mă, mlih mkra dŭm klei bhiăn mâo bi mklă leh ti anôk bi kƀĭn tal 7. Phung k’iăng khua bruă kƀĭn ala đru bi mtrŭt mjhar ksiêm bi ênŭm jih jang bruă ngă, êlâo kơ bruă ba bi mklă hră mơar”.

Khua bruă kƀĭn ala brei thâo, anăp anei, dhar bruă gĭt gai bruă kƀĭn ala lehanăn knŭk kna srăng mđrăm mbĭt mkŏ mjing klei bi kƀĭn hlue ngă klei bhiăn, hdră bhiăn mtrŭn mâo bi mklă leh. Boh nik, knŭk kna srăng kiă kriê bruă hâo hưn, bi lar, mjuăt bi hriăm klei bhiăn, kñăm mâo klei hlue ngă bi djŏ dŭm hdră bhiăn, hdră mtrŭn, hră mtrŭn jăk sơăi.

Khua bruă kƀĭn ala mtă, adŭ bruă kƀĭn ala kăp kčĕ kơ dhar bruă gĭt gai bruă kƀĭn ala kiă kriê, gĭt gai bruă mkŏ mjing hră mtrŭn klă ênŭm, klei ktrâo atăt hlue ngă dŭm mta bruă dôk hlăm klei dưi pô, lŏ dơ̆ng ksiêm duah, hlak mblang, tŭ mă mlih mkra 11 klei dôk čih mkra hdră bhiăn mâo leh anôk bruă kƀĭn ala srăng mă klei blŭ ti anôk bi kƀĭn tal 7 lehanăn srăng bi mklă ti anôk bi kƀĭn tal 8, mprăp kơ bruă kƀĭn ala srăng bi kƀĭn mă klei blŭ gưl tal êlâo hŏng 12 klei dôk čih mkra hdră bhiăn, lehanăn dŭm hdră mtrŭn mâo klei lŏ thiăm mbŏ hlăm bruă mkŏ mjing hdră bhiăn, klei bhiăn mtrŭn thŭn 2024; kčĕ lehanăn mâo dŭm klei mkŏ mjing bruă êmuh lehanăn wĭt lač klei êmuh ti anôk bi kƀĭn tal 8; mđing ngă jih jang bruă tui si klei hâo mdah bruă kăp ksiêm 2 hdră mtrŭn truăn kơ bruă pioh dhar bruă kƀĭn ala ksiêm bi mklă ti anôk dhar bruă gĭt gai bi kƀĭn hlăm thŭn 2024.

Khua bruă kƀĭn ala Trần Thanh Mẫn ăt mtă, lŏ hyuă kjăp hĭn klei kiă kriê bruă kđi čar hŏng phung đảng viên, knuă druh, mnuih ngă bruă, boh nik mđing kơ dŭm klei đru hlăm hdră êlan klei kơ prăk mlan hlăm klei mtăp mđơr, djŏ guôp lehanăn hmao djŏ./.