Hluê si hră hưn mdah kơ bruă mkŏ mjing dŭm anôk bruă Đảng hlăm bruă Đảng Bruă Kƀĭn Ala, mâo 11 anôk bruă đảng, mâo: Bruă đảng tĭng mkă knŭk kna, bruă adŭ bruă Bruă Kƀĭn Ala, bruă Đảng êpul gơ̆ng bruă djuê ana, Bruă đảng dhar bruă hdră bhiăn, Bruă Đảng dhar bruă duh mkra leh anăn ngăn prăk, Bruă Đảng dhar bruă lĭng kahan, klei êđăp ênang leh anăn bruă hŏng tač êngao, Bruă Đảng dhar bruă dhar kreh leh anăn yang ƀuôn, Bruă Đảng dhar bruă kreh knhâo, mrâo mrtang leh anăn wăl hdĭp mda, Bruă Đảng dhar bruă phung bi ala, Bruă Đảng dhar bruă čung ba mnuih ƀuôn sang leh anăn ktuê dlăng, Bruă Đảng dŭm anôk bruă đru kčĕ, đru bruă kơ Bruă Đảng Bruă Kƀĭn Ala.

Blŭ hrăm klei bi kƀĭn, Khua bruă kƀĭn ala Trần Thanh Mẫn mñă kơ dŭm anôk bruă Đảng mjêč hluê ngă bruă hluê klei bi hmô mrâo, êpul bruă mrâo, hlăm anăn čiăng rơ̆ng lŏ čuê jăk bruă klam, boh tŭ dưn klei ngă bruă mơ̆ng dŭm êpul bruă Đảng, bruă Đảng êlâo dih, amâo brei mâo klei kpăk, anôk huâng, lui bruă, srăng mđĭ hnơ̆ng tŭ jăk, boh tŭ dưn dŭm mta bruă. Dŭm anôk bruă bi mguôp kjăp, thâo klă klei dleh dlan, kpăk gun srăng hmao ruh mgaih, mgaih msir tŭ dưn, hưn mdah hŏng gưl bruă mâo klei dưi ksiêm dlăng, bi klă êjai čiăng êdi.

Khua Bruă Kƀĭn Ala mñă klă, mjêč bi kluôm phung ngă bruă, mkŏ mjing dŭm anôk bruă Đảng, mkŏ mjing hdră mă bruă, mbha bruă klam klă klơ̆ng kơ grăp čô đảng viên leh anăn klei mjĕ giăm hŏng dŭm anôk bruă djŏ tuôm čiăng kơ klei ngă bruă mơ̆ng dŭm êpul bruă Đảng rơ̆ng mâo klei hơĭt, tŭ dưn. Srăng jêñ jêñ ngă jăk bruă kđi čar, klei mĭn, bruă ktuê dlăng, uêñ mĭn bruă knuă mơ̆ng dŭm êpul bruă đảng, rơ̆ng klei ngă bruă djŏ hdră bhiăn, tŭ dưn leh anăn klă mngač.

Khua Bruă Kƀĭn Ala mñă čiăng uêñ mĭn kơ klei bi kƀĭn anôk bruă Đảng nah gŭ, phung đảng viên, hdră đru hŏng knuă druh mâo klei hmăi, ngă bruă hŏng klei mtăp mđơr hŏng ai tiê “Mơ̆ng bruă mă duah mnuih”, duah mnuih thâo, mâo klei mĭn, mâo knuih hdĭp “thâo leh anăn thơ̆ng”.

Mrâo anei, Phŭn bruă kđi čar ba mdah klei bi klă 126, hlăm anăn mâo dŭm mta phŭn djŏ tuôm hŏng Êpul Bruă Kƀĭn Ala, Khua bruă kƀĭn ala Trần Thanh Mẫn mñă, Bruă Đảng Bruă Kƀĭn Ala hnưm ksiêm dlăng čiăng kơ êjai Gưl dlông bi klă mtya phŭn klă klơ̆ng, amâo mâo klei bi kngăr.

 “Mkra mlih, bi mbŏ dŭm klei čuăn mơ̆ng Đảng, hdră bhiăn lăn čar, dŭm hdră êlan djŏ tuôm čiăng mâo tur knơ̆ng hdră bhiăn hluê ngă kluôm klei bi hmô kơ kluôm kơ bruă kđi čar. Msĕ hŏng Khua gĭt gai Đảng Tô Lâm lač mmông găl yuôm bhăn jing mprăp kơ klei kƀĭn bruă Đảng dŭm gưl, anăp truh kơ klei kƀĭn kluôm ala mơ̆ng Đảng, lŏ dơ̆ng lui hĕ gưl bruă knŭk kna ti krah, mkŏ mjing hdră êlan lŏ dơ̆ng mkŏ dăp gưl să găl guôp hŏng klei bi hmô êpul bruă mrâo, Tă hdră bi mŭt đa đa anôk bruă knŭk kna gưl čar, mkra mlih, bi mbŏ dŭm klei čuăn hdră bhiăn, klei čuăn mơ̆ng Đảng djŏ tuôm hŏng mta phŭn mkŏ dăp “Wăt hră mơar yuôm bhăn ăt dưi mkra mlih msĕ si hdră bhiăn phŭn”, Hdră bhiăn ruah khua…hlăm wưng kơ anăp.

Khua bruă kƀĭn ala Trần Thanh Mẫn hmăng hmưi, gưl bruă Đảng nah gŭ mơ̆ng dŭm êpul bruă Đảng dưi mkŏ mjing hruê anei srăng bi lar bruă klam gĭt gai kluôm dhuôm, tŭ dưn hlăm bruă hluê ngă dŭm bruă klam kđi čar mơ̆ng êpul gơ̆ng, dŭm dhar bruă, dŭm anôk bruă mơ̆ng Bruă Kƀĭn Ala, rơ̆ng kơ dŭm mta phŭn hlăm bruă srăng mâo gưl bruă đảng nah gŭ ksiêm dlăng, brei klei blŭ êlâo kơ hluê ngă, êjai anăn srăng hyuă kjăp dŭm klei mĭn, lŏ dơ̆ng mlih mrâo bruă mkŏ mjing hdră bhiăn, mâo klei răng, hnơ̆ng tŭ jăk, djăp ênŭm klei čiăng hlăm boh sĭt, mđĭ hnơ̆ng tŭ dưn ksiêm dlăng leh anăn wĭt lač, mtrŭt mđĭ ktang hdră hlăk mblang, mđing hmư̆ klei blŭ mơ̆ng pô bi ala Bruă Kƀĭn Ala leh anăn mnuih ƀuôn sang, mđĭ hnơ̆ng tŭ jăk bi klă boh klei yuôm bhăn mơ̆ng lăn čar hluê hră ƀrư̆ hruê ƀrư̆ djŏ, ksiêm duah, mkŏ mjing hdră êlan đru mlih mrô, mlih mtah, dưn yua kdrăp mrâo mrang, mtrŭt mđĭ klei čô̆ kơ bruă, mlih mrâo mbruă…

Hŏng ai tiê êran êjai, dăp pruê̆ êjai, srăng ngă klă nik, răng leh anăn hmar, čŏng pô ƀiădah amâo mâo ngơi mang, khua Bruă Kƀĭn Ala hmăng hmưi leh anăn đăo knang, êpul bruă Đảng Bruă Kƀĭn Ala leh anăn grăp êpul bruă Đảng srăng bi mguôp kjăp, bi lar ai tiê bi mguôp, klei êngiê, klei đua klam, mlih mrâo, mbruă čiăng bi leh jăk dŭm bruă klam, đru mguôp hlăm boh tŭ dưn mbĭt mơ̆ng lăn čar./.