Blŭ hrăm ti anôk mă bruă, Khua bruă kƀĭn ala Trần Thanh Mẫn brei thâo, truh kơ ară anei, Bruă kƀĭn ala mâo ngă leh sa ênoh bruă prŏng, anăn jing mâo mkŏ mjing leh truh 14 klei bi kƀĭn, hlăm anăn mâo dŭm klei bi kƀĭn tui si hdră leh dăp lehanăn dŭm klei bi kƀĭn mjêč. Ngă bruă mơ̆ng bruă Đảng hlăm bruă kƀĭn ala, hlue ngă hdră mtrŭn mơ̆ng klei bi kƀĭn prŏng Đảng kluôm ala gưl 13, klei bi klă mtrŭn mrô 19 mơ̆ng phŭn bruă kđi čar kơ bruă mkŏ mjing klei bhiăn wưng bruă kƀĭn ala gưl 15 ngă leh năng mâo klei čih pioh. Msĕ si, hlăm 156 bruă čuăn kơ klei čih mkra hdră bhiăn mâo bi leh truh 131 mta bruă čuăn. Jih jang bruă mơ̆ng anôk bruă Đảng hlăm bruă kƀĭn ala mâo ngă leh êbeh 81%. Boh tŭ dưn mơ̆ng dŭm klei bi kƀĭn, jing kdlưn nanao hŏng dŭm klei bi kƀĭn êlâo, mâo leh mnuih ƀuôn sang bi mni.

Tui si Khua bruă kƀĭn ala Trần Thanh Mẫn, klei bi kƀĭn anei kñăm ksiêm wĭt jih jang bruă leh mă, lehanăn lŏ ksiêm mơh dŭm bruă adôk ka dưi ngă, bruă dôk hlăm klei awăt, kñăm mâo klei hriăm lŏ srăng mă bruă jăk hĭn.

Snăn, hlăm dŭm wưng adôk, bruă kƀĭn ala srăng mâo truh kơ 3 klei bi kƀĭn tui si hdră dăp leh, lehanăn 1 klei bi kƀĭn mklin jih bruă hlăm wưng bruă kƀĭn ala gưl 15, Khua bruă kƀĭn ala Trần Thanh Mẫn lač, anei jing bruă prŏng êdi. Kyuanăn, Khua bruă kƀĭn ala mtă, Êpul gơ̆ng bruă djuê ana, dŭm anôk bruă hlăm bruă kƀĭn ala brei mâo klei mă bruă hŏng klei hur har čiăng ba wĭt boh tŭ dưn klă sĭt. Boh nik, ti thŭn 2025, lăn čar drei srăng mâo lu bruă prŏng msĕ si: Bi hdơr 80 thŭn klei kgŭ krŭ kdơ̆ng mlan 8 lehanăn hrue mkŏ mjing lăn čar 2/9; 50 thŭn hrue kwar dhŭng mâo klei êngiê, mhluh lir lăn čar, bruă mprăp kơ klei ruah khua bruă kƀĭn ala gưl 16 lehanăn Êpul gơ̆ng bruă ƀuôn sang dŭm gưl wưng thŭn 2026-2031. Thŭn 2026, Bruă kƀĭn ala bi hdơr 80 thŭn hrue ruah khua bruă kƀĭn ala Việt Nam.

Ti anôk mă bruă, Khua kiă kriê dŭm anôk bruă mjuăt bi hriăm, bruă dhar kreh, anôk ngă bruă hŏng phung bi ala mâo leh klei hâo mdah kơ boh tŭ dưn dŭm bruă knuă hlăm anôk bruă kƀĭn ala gưl 15 truh kơ ară anei, lehanăn hdră êlan srăng ngă bruă hlŏng truh kơ jih wưng păn bruă.

Leh hmư̆ dŭm klei blŭ, klah čŭn jih boh tŭ dưn bruă knuă, Khua bruă kƀĭn ala Trần Thanh Mẫn bi myuôm dŭm boh tŭ dưn leh mâo mơ̆ng dŭm anôk bruă. Hlăm anăn, Dhar bruă yang ƀuôn mâo bi leh truh kơ 10 bruă čuăn, anôk bruă dhar kreh, mjuăt bi hriăm bi leh ênŭm 6 bruă čuăn, êpul ngă bruă hŏng pô bi ala bruă kƀĭn ala dưi bi leh truh 10 bruă čuăn. Kơ klei čih mkra hdră bhiăn, anôk bruă yang ƀuôn mâo bi leh truh 25 bruă čuăn, anôk bruă dhar kreh, mjuăt bi hriăm mâo bi leh truh 14 bruă čuăn, Êpul ngă bruă hŏng phung bi ala mâo bi leh truh 4 bruă čuăn.

Khua bruă kƀĭn ala ăt lač, khădah mâo leh dŭm boh tŭ dưn jăk, ƀiădah mbĭt anăn ăt adôk lu klei kƀah, boh nik hlăm klei čiăng thâo bi mguôp mbĭt, bi mkŏ mjing hdră mă bruă, ka nao hlăm klei kjăp ôh, ngă bruă ka pral, ka mâo klei kreh knhâo ôh.

Khua bruă kƀĭn ala Trần Thanh Mẫn mtă, dŭm dhar bruă êpul êya, anôk ngă bruă hŏng phung bi ala jih ai tiê mghaih msir klei awăt kƀah, rơ̆ng dưi mâo klei bi mguôp kjăp hlăm anôk bruă kƀĭn ala, mđĭ hĭn bruă răng mgang klei hgăm bruă knuă, lehanăn thâo răng hlăm klei blŭ.

 “Kâo mâo klei mtă brei jih jang drei mâo klei ktuh êyuh hlăm hdră êlan mă bruă nao hlăm klei bhiăn, mơ̆ng Êpul gơ̆ng bruă djuê ana, dŭm anôk bruă kƀĭn ala, dăp wĭt bruă ngă hŏng klei knhêč, ya jing boh phŭn bi mđing mghaih msir tal êlâo, mprăp kơ jih jang klei bi kƀĭn tal 8, bi mguôp mkŏ mjing klei bi kƀĭn phung bi ala truăn kơ bruă tal 6; lŏ dơ̆ng ksiêm dlăng hlak mblang, bi mlih dŭm klei čih mkra klei bhiăn mâo leh anôk bruă kƀĭn ala mă klei blŭ ti anôk bi kƀĭn tal 7 pioh bi klă ti anôk bi kƀĭn tal 8.

Mbĭt hŏng anăn, Khua bruă kƀĭn ala ăt mtă kơ dŭm anôk bruă kbĭn ala bi hgŭm kăp ksiêm knŭk kna hlue ngă dŭm klei bhiăn, hdră mtrŭn mơ̆ng anôk bruă kƀĭn ala bi mklă leh hlăm dŭm klei bi kƀĭn, hdră kăp ksiêm bi mâo hdră djŏ lehanăn pral, đăm mđĭ mđal ôh ti dŭm alŭ wăl, lŏ dơ̆ng ngă jăk hĭn bruă čuăn hlue hdră djŏ hlăm hdră mkŏ mjing klei bi hdơr 80 thŭn hrue mkŏ mjing klei ruah khua bruă kƀĭn tala tal êlâo ti Việt Nam, klei bi lông bruă klei mrâo Diên Hồng tal 3; ksiêm dlăng klei mlih mrâo jih jang hdră mă bruă, čiăng kơ ƀrư̆ hrue ƀrư̆ mă bruă hŏng klei kreh knhâo, kjăp hĭn, tŭ jing hĭn, boh nik ngă jăk jih jang hdră êlan klei kơ prăk mlan yap mơ̆ng mlan 7/2024; hyuă kjăp bruă răng mgang klei êđăp ênang kđi čar hlăm anôk pô./.