Mơ̆ng leh mkŏ mjing hlăk thŭn 1977 truh kơ ară anei, mâo dŭm gưl bruă Đảng, bruă sang čư̆ êa lehanăn mnuih ƀuôn sang hlăm krĭng mđing uêñ, Sang hră gưl 3 Phạm Hùng dưi găn leh lu klei dleh dlan, mâo klei thâo bi mguôp, bi ktưn, tui duah hdră êlan hriăm jăk mtô jăk, mâo ba wĭt leh lu bôh tŭ dưn năng čih pioh. Ară anei mâo êbeh 40 boh adŭ hriăm hŏng ênoh jih jang truh 1.571 čô hđeh hriăm.

Bi ala kơ phung khua kiă kriê Đảng, knŭk kna, Khua bruă kƀĭn ala Trần Thanh Mẫn bi êdah leh klei mơak ti anăp dŭm boh tŭ dưn jăk êdi mơ̆ng sang hră mâo ba wĭt wưng leh êgao, kyua dŭm klei gĭr mơ̆ng phung nai mtô, lehanăn phung hđeh hriăm hră ti sang hră. Lehanăn mâo klei bi mni kơ knơ̆ng bruă sang hră mơar čar Vĩnh Long jing leh gru mngač kơ krĭng dap mnai Krông Cửu Long, jing hlăm jih krĭng kwar dhŭng lehanăn mbĭt hŏng kluôm ala.

Khua bruă kƀĭn ala Trần Thanh Mẫn mñă, Đảng lehanăn knŭk kna drei mâo nanao klei bi mklă dlăng kơ bruă sang hră mơar jing leh hdră êlan tal êlâo mơ̆ng lăn čar, duh bi liê kơ bruă sang hră mơar jing klei duh bi liê kơ bruă mđĭ kyar, pioh djăp mta klei jăk hĭn kơ jih bruă mjuăt bi hriăm, čiăng kơ jih jang phung hđeh mâo nao sang hră mơar ênŭm, mâo hriăm hŏng klei găl jăk hĭn, mđing mjuăt bi hriăm mnuih tŭ dưn pioh mă bruă kơ lăn čar, boh nik mâo mjăt bi hriăm mnuih mă bruă mâo klei thâo, anăn yơh jing sa hlăm dŭm bi klă hnơ̆ng kjăp kơ klei jing anak mnuih, lehanăn kơ klei mđĭ kyar pral, lehanăn kjăp kơ lăn čar, bi êdah tinăn ai ktang hlăm bruă bi ktưn, lehanăn k’hưm kơ lăn čar hŏng alŭ wăl lehanăn tar rŏng lăn.

   Khua bruă kƀĭn ala Trần Thanh Mẫn lač, sa thŭn hriăm mrâo lŏ dơ̆ng kčưm hŏng lu klei mơak lehanăn lu klei lông dlăng mơh, hlăm 3 thŭn dôk hriă gưl 3 jing yuôm bhăn snăk, kruak knăl kơ klei phung hđeh đĭ hriê kơ prŏng hlăm djăp mta. Kyuanăn, Khua bruă kƀĭn ala čang hmăng kơ phung hđeh hriăm hră mâo lu hĭn klei mơak, jing boh kdrŭt hlăm klei hriăm, gĭr amâo mâo mdei, tui hriăm knhuah mngač mơ̆ng Awa Hô, tui hriăm knhuah mngač mơ̆ng Awa Phạm Hùng ƀuôn sang ti Vĩnh Long; mâo klei thâo bi mguôp, thâo bi khăp, bi đru hdơ̆ng găp mđrăm mbĭt mđĭ kyar, mprăp kơ klei thâo săng, kơ klei hriăm bruă, hŏng ai tiê klei mĭn prŏng rŭ mdơ̆ng bruă knuă hlăm êdei anăp, hdơr knga tla ai amĭ ama rông ba pô, hdơr knga kơ phung nai mtô bi hriăm leh pô.

Khua bruă kƀĭn ala Trần Thanh Mẫn mtă kơ phung nai mtô, srăng jing “sa klei bi hmô jăk kơ knhuh dôk dơ̆ng ƀơ̆ng huă, čŏng čiăng hriăm, lehanăn mâo klei mĭn knhêč”, hur har jih ai tiê, mâo bruă đua klam hŏng bruă, bŏ hŏng klei thâo khăp, gĭr ktir mtô bi hriăm phung hđeh; phung nai mtô jing msĕ si amĭ ama, klă sĭt jing pô mbŏ ai ktang, klei kreh kriăng, boh kdrŭt đru kơ phung hđeh mâo ai tiê thâo čŏng čiăng hriăm, mjuăt mjing knhuah thâo gĭr, kpưn đĭ tui duah klei thâo săng:

“Kâo đăo knang kơ jih jang knuă druh, phung nai mtô, lehanăn phung hđeh hriăm hră hlăm sang hră ngă jăk hĭn jih jang klei khua gĭt gai Tô Lâm mtă leh hlăm hră mơĭt ƀri pŏk thŭn hriăm mrâo, amâo mâo mdei lŏ mlih mrâo, mđĭ hnơ̆ng thâo mtô lehanăn hriăm mkŏ mjing dhar kreh - kreh kriăng hriăm hră mơar, păn kjăp jing anôk hing ang klei jhŏng ktang Long Hồ, Vĩnh Long; đru jih hnơ̆ng kơ bruă mjut mjing mnuih thâo lu, bi năng hŏng sang hră djă anăn Khua êpul gơ̆ng kiă kriê phung khua phŭn bruă Phạm Hùng. thŭn hriăm 2024 - 2025, hdră mtô bi hriăm hlăm sang hră jing mơ̆ng hdră thŭn 2018 srăng lŏ dơ̆ng djă yua, jing leh thŭn tal êlâo klei bi lông jih gưl 3 hlue hŏng hdră mrâo. Kâo čang hmăng phŭn bruă sang hră mơar lŏ dơ̆ng kiă kriê, mkŏ mjing bi jăk hdră mtô bi hriăm mrâo, pral mâo hdră êlan ktrâo atăt, mkŏ mjing klei mjuăt bi hriăm kơ klei bi lông, mjing klei găl jăk hĭn kơ phung hđeh lehanăn găp djuê phung hđeh hriăm hră”.

Khua bruă kƀĭn ala Trần Thanh Mẫn mtă kơ jih jang dŭm gưl bruă Đảng, bruă sang čư̆ êa, bruă Mặt trận, lehanăn dŭm êpul êya hlăm knơ̆ng dhar bruă čar   Vĩnh Long lehanăn kdriêk Long Hồ lŏ dơ̆ng mâo klei mđing, rơ̆ng bi mâo djăp klei găl mnơ̆ng mnuă mă bruă, mnuih ngă bruă, lehanăn ngă prăk pioh kơ bruă mjuăt bi hriăm bi djŏ lehanăn djăp hŏng ênoh čuăn kčah, bi mlih hŏng klei ktang hĭn hdră êlan mtô bi hriăm, kñăm mđĭ kluôm dhuôm boh tŭ dưn klei mjuăt bi hriăm hlăm djăp gưl, mđĭ hĭn klei hlue ngă dhar kreh ti sang hră, mâo klei bi hgŭm plah wah sang hră hŏng gŭm gŏ sang, sang hră hŏng yang ƀuôn hlăm bruă mjuăt bi hriăm phung hđeh./.