Êjai Khua bruă kƀĭn ala Trần Thanh Mẫn mrâo truh, phung bi ala leh anăn mnuih ƀuôn sang să Nga Mi, kdriêk Phú Bình, čar Thái Nguyên hưn mdah kơ boh sĭt klei hmăi mơ̆ng hjan êa lêč ngă truh leh anăn bi êdah klei hmăng hmưi dưi mâo klei đru.

          “Mnuih ƀuôn sang Thái Nguyên, hlăm anăn mâo să Nga Mi hmăng hmưi mâo klei đru čiăng dưi tlaih mơ̆ng klei anei. Hmei mâo kdrăn lŏ pla mdiê, mâo ƀiă luč ƀiă, mâo lu luč lu, amâo lŏ mâo mnơ̆ng hrui wiă ôh”.

          Ruă ai tiê ti anăp klei luč liê mơ̆ng angĭn êbŭ bi rai, ngăn drăp leh anăn kdrăn lŏ mơ̆ng mnuih ƀuôn sang, Khua bruă kƀĭn ala Trần Thanh Mẫn mđĭ ai leh anăn mñă klă hdră êlan mơ̆ng Đảng leh anăn knŭk kna uêñ mĭn nanao kơ klei hdĭp mnuih ƀuôn sang.

“Amai hơĭt yơh, Đảng leh anăn knŭk kna, Mặt trận čar kwar, dŭm dhar bruă, gưl bruă mâo nanao klei uêñ mĭn hŏng klei hdĭp mnuih ƀuôn sang, boh nik jing phung mâo klei hdĭp dleh dlan leh angĭn êbŭ mrô 3, ngă truh lu klei hmăi kơ klei hdĭp, boh kroh mơ̆ng mnuih ƀuôn sang. Si srăng ngă čiăng kơ hdră êlan mơ̆ng Đảng, knŭk kna hŏng alŭ wăl srăng hnưm bi hơĭt klei hdĭp mnuih ƀuôn sang.

Nao čuă êmuh mnuih ƀuôn sang ti să Nga My, anôk dôk mâo êa lêč, Khua bruă kƀĭn ala Trần Thanh Mẫn mđup brei 200 hnư mnơ̆ng mđĭ ai dŭm gŏ sang tŭ klei hmăi mơ̆ng angĭn êbŭ mrô 3 leh anăn adiê hjan êa lêč ngă truh.

Mđup brei hnư mnơ̆ng leh anăn êmuh hrăm êpul lĭng kahan ti să Nga My, Khua Bruă Kƀĭn Ala brei thâo:

“Phung dĭng kna knuă druh lĭng kahan kâo thâo jing suăi êmăn, găn klei dleh dlan, đru kơ mnuih ƀuôn sang tinei mgaih msir boh mơ̆ng angĭn êbŭ mrô 3. Boh nik hlăm wưng êa đĭ, diñu đru kơ mnuih ƀuôn sang nao ti anôk êđăp ênang. Ară anei kâo thâo jing 100% mnuih ƀuôn sang wĭt leh kơ pưk sang. Phung lĭng kahan lŏ dơ̆ng đru bi hơĭt klei hdĭp mnuih ƀuôn sang, boh nik jing đru kơ mnuih ƀuôn sang bi doh wăl hdĭp mda.

Hưng mdah hŏng Khua bruă kƀĭn ala Trần Thanh Mẫn, Khua bruă Đảng čar Thái Nguyên Trịnh Viết Hùng brei thâo, mâo leh 4 čô djiê, đăo tĭng ênoh hmăi kơ ngăn dŏ êbeh 600 êklai prăk, êbeh 25.000 gŏ sang mbĕ đuê̆ mjêč. Bi kơ bruă lŏ hma hmăi êbeh 10 êbâo ha. Bi hŏng dŭm anôk êa lêč, leh êa hrŏ ênưih mâo klei čhŏ djhan wăl hdĭp mda, bluh mâo klei ruă tưp.

Blŭ hrăm hlăm mmông mă bruă, Khua bruă kƀĭn ala Trần Thanh Mẫn brei thâo, ti anăp klei hmăi kjham mơ̆ng angĭn êbŭ mrô 3, khua gĭt gai Tô Lâm mâo leh klei iêo mthưr mnuih ƀuôn sang, knuă druh, lĭng kahan kluôm lăn čar kñăm đru kơ bruă mgaih msir boh jhat ti dŭm čar kwar Dưr leh anăn ƀuôn prŏng phŭn Hà Nội.

Khua Bruă Kƀĭn Ala mñă klă, čar Thái Nguyên čiăng lŏ ksiêm dlăng êlan klei pui, êa jua kơ mnuih ƀuôn sang, bi doh wăl hdĭp mda čiăng rơ̆ng kơ bruă gang mkhư̆ klei ruă tưp. Bi kơ bruă anei, khua Bruă Kƀĭn Ala mñă kơ bruă mdrao mgŭn srăng ngă bruă ktang phĭt čiăng rơ̆ng klei suaih pral kơ mnuih ƀuôn sang, mkra wĭt dŭm sang hră čiăng kơ jih jang phung hđeh dưi nao sang hră mơar, răng mgang klei êđăp ênang.

Kâo hmăng hmưi hŏng ai tiê thâo khăp thâo pap, hla hrông luôm hla tĭ, klei bi đru, bi mguôp mmông anei jing yuôm bhăn sơnăk, drei čiăng mtrŭt mjhar hlăm leh anăn êngao čar mâo ênoh prăk đru mgaih msir leh gưl angĭn êbŭ mrô 3 jing mtăp mđơr, amâo brei mâo klei amâo mâo jăk hlăm bruă đru dŏng gang mkhư̆ klei êa lip lêč, angĭn êbŭ. Lŏ sa blư̆, bi ala khua gĭt gai Đảng, knŭk kna, dŭm êpul ngă bruă, kâo hmăng mhưi bruă Đảng bruă sang čư êa leh anăn mnuih ƀuôn sang čar Thái Nguyên găn jih klei dleh dlan, klei lông dlăng čiăng bi hơĭt klei hdĭp mnuih ƀuôn sang.

Khua Bruă Kƀĭn Ala lač, leh angĭn êbŭ, truh êa lip lêč leh anăn êjai êa hrŏ, klei hmăi jing kjham êdi, anăn jing êlan klông jhat rai, sang dôk, sang hră mơar srăng mkra wĭt, wăl hdĭp mda mâo klei hmăi. Čiăng mgaih msir boh jhat mơ̆ng angĭn êbŭ mrô 3, khua Bruă Kƀĭn Ala mñă, wăt bruă kđi čar mơ̆ng čar Thái Nguyên, mơ̆ng bruă Đảng čar, Êpul gơ̆ng bruă ƀuôn sang, bruă sang čư êa, mặt trận čar kwar, êpul êya, dhar bruă, dŭm gưl bruă srăng nao hgŭm mgaih msir, amâo mâo ngă ngơi mang ôh.