Nao bi kƀĭn mâo êbeh 500 čô phung bi ala dôk hlăm êpul khua kiă kriê, êpul khua čih hră, khua êpul thơ̆ng kơ bruă mơ̆ng gưl dlông, adŭ bruă êpul khua kiă kriê, phung bi ala mơ̆ng êpul kiă kriê mrô 35, Êpul khua kiă kriê bruă đảng, êpul khua hlăm Đảng, bruă Đảng gưl dlông; êpul khua bi ala kiă kriê mrô 35 dŭm bruă Đảng čar, ƀuôn prŏng dôk hlăm gưl dlông...

Mă bruă hŏng klei êngiê, mâo klei uêñ klam, klă mngač, klei bi kƀĭn pioh leh lu mmông mđing hmư̆ phung bi ala trông čhai, hlak mblang kơ dŭm mta bruă mâo bơ̆k bâo leh hlăm klei hâo mdah ksiêm wĭt 5 thŭn hluê ngă hdră mtrŭn mrô 35-NQ/TW, mâo klei wĭt ksiêm kjăp lehanăn bi êdah dŭm boh tŭ dưn leh mâo, mbĭt hŏng bruă adôk ka dưi ngă, klei dleh dlan, klei gun kpăk, bi êdah dŭm mta boh phŭn ba hriê klei êdu awăt, mơ̆ng anăn mâo dŭm hdră êlan lehanăn klei akâo mghaih msir wăt hlăm klei hlak mblang, lehanăn wăt hlăm klei ngă bruă sĭt êmĭt mta čuăn hlăm wưng tinăp. Phung bi ala thâo bi kah mbha lu hdră êlan jăk, hdră mă bruă djŏ, mă klei hriăm hlăm bruă răng mgang tui si atur knơ̆ng mơ̆ng Đảng; bi tăng mblah, gang mkhư̆, mghaih msir djăp mta klei amâo mâo djŏ, dŭm klei mĭn soh čhuai, lehanăn klei bi roh...

Blŭ kiă kriê klei bi kƀĭn, Khua lăn čar Võ Văn Thưởng lač, leh 5 thŭn hlue ngă hdră mtrŭn mrô 35-NQ/TW, klei thâo săng mơ̆ng dŭm gưl bruă Đảng, phung knuă druh, đảng viên hŏng bruă klam pô kơ bruă răng mgang klei mĭn hdră êlan mơ̆ng Đảng, klei tăng mblah hŏng djăp mta klei mĭn soh čhuai, mâo leh klei bi mlih klă mngač, hŏng klei jăk, dưn yua jih ai ktang hlăm kluôm bruă kđi čar, klei sa ai mơ̆ng dŭm gưl bruă Đảng, bruă mặt trận, djăp êpul êya bruă yang ƀuôn, mjing leh sa ai ktang kluôm, mjing ai tiê tăng mblah prŏng hlăm mnuih ƀuôn sang kơ bruă răng mgang ai tiê klei mĭn mơ̆ng  Đảng.

Bruă hâo hưn mâo leh lu klei mlih mrâo, kơ mta bruă, kơ hdră êlan, kơ klei ngă bruă, mđĭ hĭn bruă klam klei thâo tă êlan kơ klei hâo hưn mơ̆ng dŭm anôk bruă klei mrâo, mơ̆ng anôk bruă hâo hưn mtô mblang, mơ̆ng internet lehanăn hlăm hla pŏk yang ƀuôn bi lar pral hdră êlan mơ̆ng Đảng, klei bhiăn knŭk kna, hâo hưn djăp mta bruă jăk, dŭm boh tŭ dưn hlăm klei mlih mrâo lăn čar hŏng djăp mta klei, hâo hưn kơ dŭm bruă ngă jăk siam, klei thâo bi hmô bruă jăk, mnuih jăk mơ̆ng phung knuă druh, đảng viên lehanăn hlăm mnuih ƀuôn sang. Dŭm boh tŭ dưn leh 5 thŭn hlue ngă hdră mtrŭn mrô 35-NQ/TW dưi đru mguôp leh yuôm bhăn bi hơĭt bruă kđi čar, răng mgang kjăp klei êđăp ênang yang ƀuôn, lŏ bi kjăp klei mnuih ƀuôn sang đăo knang hŏng Đảng, Knŭk kna.

Khua lăn čar mtă kơ dŭm gưl bruă Đảng lŏ dơ̆ng hyuă kjăp, mtrŭn agha êlam hĭn klei thâo săng hŏng bruă čuăn răng mgang kjăp klei mĭn mơ̆ng Đảng, tăng mblah hŏng dŭm klei mĭn soh čhuai, klei bi roh, boh nik êjai hlăm boh klei ară anei, bi klă mtam bruă klam mơ̆ng pô djă akŏ, lehanăn mơ̆ng grăp čô knuă druh, đảng viên hlăm klei ngă bruă anei. Mbĭt hŏng anăn, mđĭ hĭn bruă klam răng mgang kjăp atur knơ̆ng klei mĭn mơ̆ng Đảng; mđĭ klei hâo hưn, bi lar klei hâo hưn jăk, kut kat bi kdơ̆ng ktang hŏng djăp mta klei mĭn soh čhuai, klei bi roh.

Ti Anôk bi kƀĭn, phung bi ala nao dlăng leh klei rang mdah dŭm mta mnơ̆ng mâo ksiêm duah klei kreh knhâo, dŭm mta hră mơar kơ klei kreh knhâo čih pioh kơ bruă răng mgang atur knơ̆ng kơ klei mĭn mơ̆ng Đảng; dlăn fim rup čih lač kơ boh tŭ dưn 5 thŭn hlue ngă hdră mtrŭn mrô 35-NQ/TW mơ̆ng phŭn bruă kđi čar gưl 12.

Êpul kiă kriê bruă hlue ngă hdră mtrŭn mrô 35 mơ̆ng gưl dlông mđup brei leh hră mpŭ mni kơ dŭm êpul, lehanăn mnuih mâo leh boh tŭ dưn kdlưn hĭn hlăm 5 thŭn hlue ngă bruă čuăn răng mgang atur knơ̆ng klei mĭn mơ̆ng Đảng, bi tăng mblah hŏng dŭm klei mĭn soh čhuai, klei bi roh./.