Khua mduôn Y Đheh Ayun, 65 thŭn, djuê ana Ê Đê, ti ƀuôn Phơng, să Ea Tul, kdriêk Čư̆ M’Gar, čar Daklak mâo mŭt Đảng mơ̆ng hlăk 25 thŭn. Ñu mâo mnuih hlăm ƀuôn mpŭ snăk, kyuadah ñu blŭ lehanăn ngă jăk jih jang bruă. Hlăm ƀuôn, hlei gŏ sang dôk mâo klei dleh dlan, snăn ñu iêo jak mnuih hlăm ƀuôn bi đru prăk kăk lehanăn đru ktrâo atăt hdră duh ƀơ̆ng. ti anôk bi kƀĭn ƀuôn, ñu pioh lu mmông blŭ hrăm yăl dliê kơ dŭm klei bi hmô jăk hlăm hdră duh ƀơ̆ng, klei ngă bruă mâo čiăng kơ mnuih hlăm ƀuôn tui hlue. Ñu kreh bi mguôp nanao hŏng gưl bruă Đảng, bruă sang čư̆ êa să, lehanăn kčĕ kơ êpul bruă Đảng kơ bruă păn kjăp klei êđăp ênang hlăm alŭ wăl. Y - Đheh Ayun lač:

 “Mơ̆ng êlâo dih truh kơ ară anei mnuih ƀuôn sang hlăm ƀuôn   Phơng amâo mâo ôh mnuih duah tui hmư̆ klei mơ̆ng êngao kčŭt mčhur, čiăng mčhua hŏng mnuih ƀuôn sang kơ anei. Tal dua, jing hâo hưn kơ mnuih ƀuôn sang bi kriê pioh knhuah gru dhar kreh mnuih djuê ana Êđê pô”.

Bi khua mduôn Y - Ngôn Knul, ti ƀuôn Triă, să Ea Tul, kdriêk Čư̆ Mgar, čar Daklak, 30 thŭn jing leh đảng viên Đảng cộng sản Việt Nam ñu mtă mtăn kơ klei bi hmô, lehanăn ba akŏ hlue ngă dŭm hdră êlan mơ̆ng Đảng, klei bhiăn knŭk kna. Grăp hrue ñu truh hlăm grăp boh sang, nao hlăm grăp boh djuê čiăng thâo săng kơ ai tiê klei mĭn mnuih ƀuôn sang, lehanăn mâo klei mtă mtăn, mjuăt mtô anak čô amuôn adei hlue gưt klei bhiăn knŭk kna, amâo mâo ngă soh ôh hlăm klei hdĭp mda ala ƀuôn. Amâo mâo djŏ knŏng dŭm anăn, ñu jing pô hur har êdi hlăm klei hâo hưn, mtrŭt mjhar mnuih ƀuôn sang hlăm klei thâo bi mguôp, thâo bi đru hdơ̆ng găp mđĭ kyar hlăm klei hdĭp:

 “Hlăm wưng êgao hmei mkŏ mjing leh klei hâo hưn kơ mnuih ƀuôn sang ti ƀuôn Triă, boh nik mâo mghaih msir bi mgrăng lu klei amâo mâo thâo bi djŏ hlăm gŏ sang, msĕ si ung mô̆, anak aneh bi mneh msao. Êlâo kơ mâo klei bi mgrăng bi tui duah mơ̆ng mâo hĕ klei amâo mâo thâo bi djŏ anăn. Mơ̆ng anăn, mâo hdră mghaih msir bi jăk. Snăn jih jang boh klei mâo mghaih msir hŏng klei jăk”.

           Tui si Lê Quang Bất, Khua să Ea Tul, kdriêk Čư̆ M’Gar, hlăm dŭm boh ƀuôn anak ÊĐê, khua mduôn jing mnuih mâo k’hưm čiăng bi đru mghaih msir dŭm klei amâo mâo thâo bi djŏ hlăm ƀuôn. Ară anei, mbĭt hŏng bruă klam jing sa čô đảng viên, diñu mâo leh klei đru mguôp yuôm bhăn jing pô mkŏ plah wah bruă sang čư̆ êa ba klei bhiăn knŭk kna truh hŏng ƀuôn sang lehanăn bi kriê pioh knhuah gru dhar kreh, đru mguôp bi hdĭt klei hdĭp mda lehanăn klei êđăp ênang ƀuôn sang.

 “Khua mduôn lehanăn phung mâo k’hưm hlăm ƀuôn jing mnuih hing ang hlăm krĭng djuê ƀiă. Diñu mâo hdră hâo hưn jăk čiăng kơ mnuih ƀuôn sang hmư̆ lehanăn tui gưt jih jang klei Đảng, knŭk kna kiă kriê msĕ si dŭm hdră êlan klei bhiăn. Đru bi hơĭt klei hdĭp mda ala ƀuôn hlăm wưng êgao”.

Čiăng lŏ dơ̆ng dưn yua bruă klam mơ̆ng phung khua mduôn, mnuih mâo k’hưm hlăm ƀuôn sang, Nay H'Nan, k’iăng khua bruă Đảng kdriêk Čư̆ M’gar, čar Daklak brei thâo:

 “Mnuih mâo k’hưm jing kdrông mkŏ, kăp ba jih klei hâo hưn, hdră êlan, hdră mtrŭn mơ̆ng Đảng, knŭk kna hŏng mnuih ƀuôn sang. Diñu jing mnuih mâo leh dŭm gưl bruă Đảng, bruă sang čư̆ êa mjuăt bi hriăm, mbŏ nanao klei thâo săng, čiăng mơ̆ng anăn diñu mđĭ hĭn klei thâo kơ pô, pioh lŏ kčĕ đru mnuih ƀuôn sang. Mơ̆ng klei mtrŭt mjhar mnuih ƀuôn sang hlue ngă dŭm hdră êlan mtrŭt mjhar mnuih ƀuôn sang mđĭ kyar klei hdĭp mda, răng mgang kjăp klei êđăp ênang, mkŏ mjing klei hdĭp dhar kreh mrâo, mơ̆ng anăn mâo klei mđĭ kyar hlăm ƀuôn sang mnuih djuê ƀiă”.

Daklak ară anei mâo truh 942 čô khua mduôn, lehanăn mnuih mâo k’hưm hlăm ƀuôn sang. Anei jing êpul yuôm bhăn kơ bruă mkŏ mjing Đảng, bruă sang čư̆ êa, jih jang bruă kđi čar, mtrŭt mjhar mđĭ kyar klei hdĭp mda ala ƀuôn, răng kriê kjăp dhar kreh djăp djuê ana hlăm alŭ wăl./.