Sa hlăm dŭm klei mnuih ƀuôn sang An Giang mâo klei mđing hĭn êdi kơ bruă mjuăt bi hriăm. Lu mnuih ƀuôn sang bơ̆k bâo kơ hnơ̆ng mjuăt bi hriăm wưng leh êgao, klei mlih mrâo bruă sang hră mơar hlăk ba wĭt leh boh tŭ dưn tal êlâo, hnơ̆ng jăk klei mjuăt bi hriăm mâo leh klei bi mlih jăk, amâo mâo tui tiŏ klei čiăng kơ arăng bi mni ôh.

        Ti dŭm boh sang hră mơar, mâo leh lu phung ƀuôn sang bi lač: Bruă mđĭ mlih hdră mjuăt bi hriăm ară anei adôk mâo lu klei amâo mâo djŏ, kƀah klei kjăp, amâo mâo bi sa hnơ̆ng, hdruôm hră mtô bi hriăm pătdah msĕ si amâo mâo klei lŏ čuê ôh, amâo mâo djŏ knŏng jing klei ktrŏ kơ ênoh amĭ ama hđeh hriăm hră bi liê, ƀiădah ngă luič liê ngăn prăk yang ƀuôn. Mbĭt hŏng anăn phung hđeh hriăm hră kƀah anôk hlăp mbul. Ênoh phung hđeh jeh hriăm hlăm sa boh adŭ jing lu đei, mơ̆ng anăn ngă kơ hđeh hŏng nai dleh dưi mâo klei bi êmuh hrăm, hnơ̆ng mtô amâo mâo kjăp, klei hđeh dưi thâo săng jing kƀah prŏng... Nguyễn Văn Tùng, ti wăl krah Vĩnh Bình, kdriêk Châu Thành lač.

“Hđeh hriăm hră ară anei, jih 50% hriăm kơ knhuah hdĭp bŏ hŏng klei kƀah. Kâo čang hmăng kơ bruă kƀĭn ala. Dhar bruă sang hră năng mđing hĭn kơ bruă mjuăt bi hriăm knhuah hdĭp êlâo hĭn, leh kơ anăn mjuăt bi hriăm čiăng bi mâo mnuih kreh knhâo mâo knhuah dôk dơ̆ng ƀơ̆ng huă jăk mơh. Bi bruă bi mlih hdruôm hră mtô bi hriăm, phung kreh knhâo lŏ dơ̆ng ksiêm duah, čiăng bi mâo hdruôm hră mtô bi hriăm djŏ hĭn mjut mjing hđeh gưl mrâo, ƀiădah knŏng mrâo hriăm mă bhiâo riâo rit lui yơh, snăn ngă luič liê, ai tiê klei mĭn lehanăn ênoh bi liê kơ bruă mkra hdruôm hră mơar, luič liê prăk amĭ ama hđeh. Kyuanăn kâo čang hmăng kơ bruă kƀĭn ala dhar bruă sang hră mơar knŏng mkra hdruôm hră mơar dưi djă yua nanao sui thŭn mlan”.

        Kơ bruă lŏ hma, mnuih ƀuôn sang bi lač, ênoh čhĭ hbâo pruê, mnơ̆ng duh kơ bruă lŏ hma đĭ yuôm sơăi, êjai anăn lĕ čiăng čhĭ mdiê kuê, amâodah boh mnga mkăn mơ̆ng bruă lŏ hma amâo mâo hơĭt ôh, hŏng ênoh êlưih măng ai. Mnuih ƀuôn sang ti čar An Giang akâo kơ knŭk kna bi pral mâo hdră bi mguôp kăp hrui blei jih boh mnga mơ̆ng mnuih ƀuôn sang pla mjing, čiăng kơ mnuih ƀuôn sang hdĭp mơ̆ng bruă pô ngă lŏ hma. Mbĭt hŏng anăn, klei mđĭ kyar bruă lŏ hma hlue hdră êlan bi hgŭm mbĭt, jing klei bi mguôp plah wah mnuih pla mjing hŏng phung duh mkra, ƀuh ară anei adôk êdu êdŏk snăk, kƀah klei bi ƀuăn rơ̆ng hlăm hdră êlan mă bruă, mơ̆ng anăn mơh amâo mâo jăk mâo klei tŭ dưn ôh, boh sĭt mnuih pla mjing ka mâo dưn sĭt êmĭt ôh mơ̆ng hdră êlan klei bi hgŭm ară anei. Trần Văn Đức, să Vĩnh Chánh, kdriêk Thoại Sơn, čar An Giang mâo klei blŭ snei.

“Jih jang mnuih thâo sơăi kơ krĭng lăn Dap mnai krông Cửu Long jing kdrăn lŏ prŏng kơ kluôm ala, ƀiădah hlăm anăn An Giang jing anôk phŭn kơ kdrăn lŏ anăn, ƀiădah klei dôk găn nanao ară anei anăn jing djŏ boh mnga luič ênoh, leh êgao yan ênoh čhĭ lŏ đĭ yuôm. Ti să mâo leh mơh klei mtrŭt mjhar mnuih ƀuôn sang bi mlih mnơ̆ng pla, mnơ̆ng rông, lehanăn bruă pla mjing djam mtam amâo mâo thâo bĭt anôk čhĭ mnia. Bi mdiê čhĭ amâo mâo yuôm. Snăn akâo kơ knŭk kna, lehanăn dŭm phŭn dhar bruă mâo klei ktrâo atăt đru kơ mnuih ƀuôn sang ngă lŏ hma ti krĭng dap mnai krông Cửu Long, boh nik ti An Giang”.

Kơ kdrêč anei, k’iăng khua lăn čar Võ Thị Ánh Xuân lač, An Giang hŏng klei găl jing sa boh čar ngă lŏ hma, phung khua kiă kriê čar An Giang, kdriêk   Châu Thành lŏ dơ̆ng ksiêm duah, pai mă klei găl pioh mđĭ kyar bruă lŏ hma, čiăng kơ mnuih ngă lŏ hma dưi hdĭp mơh hŏng bruă pô.

“Djŏ tuôm hŏng bruă lŏ hma pla mjing. Kâo ƀuh truh kơ ară anei, jih jang hdră êlan mơ̆ng Đảng, knŭk kna, lehanăn hŏng jih ai ktang, klei dưi, wăt hŏng lu klei lông dlăng... drei găn leh sơăi, ară anei knŏng drei ngă bruă bi kjăp, čiăng kơ jih jang mnuih ngă lŏ hma ăt dưi đĭ kyar mơ̆ng bruă pô, jing pô phŭn hlăm bruă duh mĭn kơ braih mkuĕ, pô yơh jih khua. Čăng hmăng kơ mnuih ƀuôn sang hrăm mbĭt hŏng bruă sang čư̆ êa lŏ wĭt ksiêm kñăm mđĭ hĭn bruă klam mơ̆ng mnuih ngă lŏ hma. Kơ kdrêč mjuăt bi hriăm hŏng klei mlih mrâo anei, brei bi mâo hdră êlan bi mlih hŏng klei kjăp, sĭt nik yơh drei srăng găn hlăm sa klei dleh êjai hlăm wưng dôk bi mlih, mơ̆ng leh dưi găn jih klei anăn drei srăng hơĭt yơh”.

        Tui si k’iăng khua lăn čar Võ Thị Ánh Xuân, jih jang klei mnuih ƀuôn sang bi êdah leh ăt jing klei phung khua kiă kriê Đảng, knŭk kna, bruă kƀĭn ala, lehanăn alŭ wăl dôk bi mĭn sơăi. Êpul bi ala bruă kƀĭn ala čar An Giang čih pioh jih jang klei mnuih ƀuôn sang akâo lehanăn tui hlue si bruă knuă srăng mghaih msir bi djŏ./.