Nao ti anôk bi kƀĭn phung bi ala khua kiă kriê dŭm phŭn dhar bruă, khua bruă Đảng čar, Khua knơ̆ng bruă sang čư̆ êa 5 boh čar ti Lăn Dap kngư mâo Daklak, Gia Lai, Kon Tum, Lâm Đồng, Đak Nông lehanăn 9 čar riêng gah mâo   Quảng Nam, Quảng Ngãi, Bình Định, Phú Yên, Khánh Hòa, Ninh Thuận, Bình Thuận, Đồng Nai, Bình Phước.

Blŭ hrăm ti anôk pŏk klei bi kƀĭn, k’iăng khua knŭk kna Trần Lưu Quang lač: Klei duh mkra ala ƀuôn krĭng lăn dap kngư mâo leh dŭm knhuang đĭ kyar jăk, klei tŭ dưn dhar kreh djăp djuê ana mâo kriê pioh, lŏ dơ̆ng bi lar, klei jih jang mnuih ƀuôn sang đru bi răng mgang klei êđăp ênang mâo bi kjăp, snăn klei hdĭp mda ala ƀuôn mâo leh klei hnŭk ênang.

Siămdah, klei mđĭ kyar klei duh mkra ala ƀuôn krĭng Lăn Dap Kngư ăt ka jing năng ôh hŏng klei găl klei dưi mâo mơ̆ng alŭ wăl. Čiăng mđĭ kyar kjăp krĭng lăn dap kngư, mnuih ƀuôn sang dưi mâo klei trei mđao, jăk yâo, bi kjăp hĭt klei êđăp ênang djŏ hŏng mta kñăm tui si hdră mtrŭn mrô 23-NQ/TW mơ̆ng phŭn bruă kđi čar, khua knŭk kna mâo leh hdră mtrŭn kơ klei mđĭ kyar bruă duh mkra ala ƀuôn mguôp mbĭt hŏng bruă răng mgang kjăp klei êđăp ênang krĭng lăn Dap kngư.

Mta kñăm mơ̆ng hdră êlan mđĭ kyar bruă duh mkra ala ƀuôn mguôp hŏng bruă răng mgang kjăp klei êđăp ênang krĭng lăn dap kngư, jing lŏ mđĭ hĭn boh tŭ mơ̆ng bruă duh mkra ala ƀuôn, mâo klei bi mguôp kjăp hŏng bruă răng mgang klei êđăp ênang wưng tinăp. Kyuanăn, hlăm klei bi trông, tui duah hdră êlan mă bruă kñăm čiăng bi jăk, pral mâo ba yua hdră mtrŭn mrô 23 – NQ/TW, lehanăn čiăng kơ hdră êlan anei nao hlăm klei hdĭp klă sĭt, đru mđĭ kyar krĭng lăn dap kngư pral, kjăp, hnŭk ênang klă sĭt.

Ti anôk bi kƀĭn, Đại tướng Tô Lâm lač: Đảng lehanăn knŭk kna mâo leh klei mđing yuôm bhăn kơ djăp mta klei, lehanăn mâo mtrŭn leh lu hdră êlan, klei klah čŭn kơ bruă mđĭ kyar krĭng lăn dap kngư. Boh nik giăm anei jing hdră mtrŭn mrô 23 – NQ/TW mơ̆ng phŭn bruă kđi čar kơ “Hdră mđĭ kyar bruă duh mkra ala ƀuôn lehanăn rơ̆ng mâo klei êđăp ênang sĭt ti krĭng lăn dap kngư truh thŭn 2030, tă hdră truh thŭn 2045” lehanăn hdră êlan mđĭ kyar bruă duh mkra ala ƀuôn mguôp mbĭt hŏng bruă răng mgang kjăp klei êđăp ênang ti alŭ wăl Lăn dap kngư mơ̆ng knŭk kna.

Đại tướng Tô Lâm mtă kơ dŭm phŭn dhar bruă, alŭ wăl brei mâo klei bi sa ai, ngă bruă hŏng jih ai tiê, hlue ngă djăp klei gĭt gai, mđing kơ jih hdră, ai dưi hlue ngă jih hdră êlan mrâo kñăm dưi bi sĭt jih bruă kñăm. Msĕ si: Jih ai tiê ruh mgaih klei dleh dlan, klei gun kpăk, gĭr bi leh, hlue ngă tŭ jing klei bhiăn, hdră êlan pioh hjăn kơ krĭng lăn dap kngư, kut kat ngă bruă brei mâo klei đĭ kyar sĭt, dưi dưn yua jih klei găl mơ̆ng krĭng, mđĭ bi lar knhuah gru dhar kreh, hƀuê ênuk, anak mnuih krĭng lăn dap kngư, klei jhŏng ktang, msĕ si Dăm Săn mphŭn dô, kñăm mjing ai ktang kơ klei mđĭ kyar bruă duh mkra ala ƀuôn, mđĭ kyar klei hdĭp mda mnuih ƀuôn sang ti lăn dap kngư, amâo mâo lui sa čô mnuih kơ tluôn ôh, kut kat jih ai tiê mgaih msir mơ̆ng hnưm, mơ̆ng kbưi mơ̆ng dŭm anôk awăt êdu, jing mơ̆ng dŭm klei amâo mâo găl, anôk amâo mâo hơĭt, đăm lĕ ôh hlăm klei kdjăt, ƀiădah hŏng klei kjăp mghaih msir djăp mta klei, boh nik bruă kđi čar dơ̆ng mơ̆ng nah gŭ, dưi ngă bruă djŏ tui si klei čiăng, mđĭ bruă đua klam mơ̆ng knuă druh, mnuih ngă bruă êjai dôk ngă dŭm bruă čuăn, djŏ tui si klei khua gĭt gai Đảng Nguyễn Phú Trọng, Klei khua knŭk kna Phạm Minh Chính kiă kriê anăn jing: “Hlei pô amâo mâo jhŏng ngă, hlei pô amâo mâo dưi ngă, snăn ñĕ ti djiêo brei mnuih mkăn ngă”.

Đại tướng Tô Lâm kñă: Čăng hmăng kơ dŭm gưl bruă Đảng, bruă sang čư̆ êa dŭm boh čar riêng gah mâo klei bi mguôp kjăp hŏng dŭm boh car ti lăn dap kngư hlue ngă jih jang bruă mơ̆ng knŭk kna kčah mtrŭn, mâo klei thâo bi mguôp kjăp, bi hgŭm hlăm klei mđĭ kyar bruă duh mkra, klei mkra êlan klông, iêo jak klei duh bi liê, dưn yua bi djŏ klei găl čŏng mâo mơ̆ng yan adiê lăn ala, lehanăn anak mnuih ti lăn dap kngư. Tui si hƀuê ênuk mơ̆ng đưm êlâo, mâo leh ai tiê klei jhŏng ktang, mâo klei thâo mĭn mbruă, brei mâo klei bluh đĭ ktang hlăm klei mlih mrâo, hlăm klei thâo bi mguôp, sa ai tiê tui hluê Đảng, tui hlue awa Hồ mơ̆ng mnuih ƀuôn sang ti lăn dap kngư, Đại tướng Tô Lâm đăo knang snei: Bruă Đảng, bruă sang čư̆ êa, lĭng kahan lehanăn mnuih ƀuôn sang dŭm boh čar ti lăn dap kngư srăng dưi găn jih klei dleh dlan, klei lông dlăng, ngă tŭ jing bruă čuăn mđĭ kyar bruă duh mkra ala ƀuôn, răng mgang kjăp klei êđăp ênang, pral atăt lăn dap kngư mâo klei đĭ kyar pral, kluôm dhuôm lehanăn kjăp./.