Khua bruă kƀĭn ala Trần Thanh Mẫn lač; anei jing klei bi kƀĭn tal êlâo hlăm thŭn  2025, mâo mkŏ mjing hlăm ai êwa kluôm ala mơak kơ Đảng, mơak yan mnga Xuân lehanăn mkŏ mjing djăp mta bruă mơak Tết Nguyên đán Ất Tỵ, bi hdơr 95 thŭn hrue mkŏ mjing Đảng Cộng sản Việt Nam. Mbĭt anăn, bruă kƀĭn ala lehanăn êpul gơ̆ng bruă ƀuôn sang djăp gưl mkŏ mjing klei bi hdơr 79 thŭn hrue ruah khua tal êlâo bruă kƀĭn ala  Việt Nam. Mñă kơ bruă knuă srăng mă bruă thŭn 2025 jing prŏng, Khua bruă kƀĭn ala lač, hlăm 3 mlan akŏ thŭn anei bi mđing mkŏ mjing klei bi kƀĭn mjêč gưl tal 9:

"Drei bi mđing ktuh êyuh ai tiê kơ klei bi kƀĭn mjêč hlăm knhal jih mlan 2. Klei bi kƀĭn anei bruă kƀĭn ala srăng mkŏ mjing amâo mâo tĭng hrue mông êlâo ôh, ƀiădah srăng mkă tĭng ti boh tŭ dưn bruă bi trông, kñăm čiăng dưi bi mklă dŭm hdră bhiăn, hdră mtrŭn mơ̆ng anôk bruă kƀĭn ala, kơ bruă ksiêm wĭt hdră mtrŭn mrô 18 kơ bruă dăp bi khuăt êpul mă bruă, mă bruă hŏng klei tŭ dưn, hlăm wưng tinăp”.

Dhar bruă gĭt gai bruă kƀĭn ala ksiêm leh klei hâo mdah bruă mđing êmuh klei mĭn mnuih ƀuôn sang mơ̆ng bruă kƀĭn ala hlăk mlan 12/2024. Khua anôk bruă đru čung ba mnuih ƀuôn sang Dương Thanh Bình brei thâo: Phung bi ala lehanăn mnuih ƀuôn sang mâo klei sa ai prŏng lŏ dơ̆ng gĭt gai hlue ngă hdră mtrŭn mrô 18 kơ klei dăp wĭt bi khuăt jih jang êpul bruă kđi čar. Phung bi ala lehanăn mnuih ƀuôn sang čang hmăng pral dưi mâo sa hdră êlan kiă kriê kjăp mơ̆ng Đảng, knŭk kna lehanăn jih jang dŭm êpul êya mơ̆ng gưl dlông hlŏng kơ nah gŭ hlăm klei khuăt, kjăp mă bruă mâo klei tŭ dưn.

Dhar bruă gĭt gai bruă kƀĭn ala mă klei blŭ, kơ klei čih mkra hdră mtrŭn, čoh čuăn klă ênŭm kơ bruă mkŏ mjing klei bi tuôm hŏng mnuih ƀuôn sang mơ̆ng phung bi ala bruă kƀĭn ala, lehanăn phung bi ala êpul gơ̆ng bruă ƀuôn sang. Mâo leh lu klei blŭ mơ̆ng phung bi ala hlăm dhar bruă gĭt gai bruă kƀĭn ala, dôk ka hơĭt kơ klei Êpul khua kiă kriê bruă mặt trận ti gưl să mkŏ mjing klei bi tuôm mnuih ƀuôn sang. Khua anôk bruă hdră bhiăn Hoàng Thanh Tùng lač:

"Êpul kiă kriê bruă mặt trận ti gưl să amâo mâo djŏ ôh djăp anôk mă bruă mâo klei tŭ dưn, lehanăn bi knar msĕ, boh nik hlăm dŭm krĭng taih kbưi, krĭng adôk mâo lu klei dleh dlan. Kyuanăn klei čoh čuăn ktang mkŏ mjing bruă bi tuôm hŏng mnuih ƀuôn sang ti gưl să msĕ si hdră mtrŭn hlăm klei bi tuôm hŏng mnuih ƀuôn sang, kơ êpul bruă mặt trận să jing nanao anôk kăp kiă kriê, bi hgŭm hŏng bruă mặt trận kdriêk, lehanăn dŭm anôk bruă djŏ tuôm hlăm klei bi tuôm hŏng mnuih ƀuôn sang, kyuanăn mâo đa đa anôk amâo mâo dưi klam ôh, hmăi amâo mâo jăk hlăm bruă bi tuôm hŏng mnuih ƀuôn sang”.

Ti bi kƀĭn, 100% phung khua êmua hlăm dhar bruă gĭt gai bruă kƀĭn ala, mâo bi mklă leh hdră mtrŭn djŏ tuôm hŏng mta mtrŭn kơ bruă mkŏ mjing klei bi tuôm hŏng mnuih ƀuôn mơ̆ng phung bi ala bruă kƀĭn ala, lehanăn phung bi ala Êpul gơ̆ng bruă ƀuôn sang. Hdră mtrŭn čoh čuăn kơ klei dưi, lehanăn bruă klam mơ̆ng dŭm anôk bruă, êpul bruă hlăm klei bi tuôm hŏng mnuih ƀuôn sang, ngă bruă, lehanăn hdră mkŏ mjing, bruă srăng ngă hlăm klei bi tuôm hŏng mnuih ƀuôn sang. Bi klin tŭ mă jih klei blŭ mơ̆ng mnuih ƀuôn sang, Boh nik, mâo mta mtrŭn bruă klam mơ̆ng dŭm anôk bruă, êpul bruă lehanăn êpul êya mghaih msir klei mnuih ƀuôn sang akâo, hŏng klei klă mngač mghaih msir jih jang klei mnuih ƀuôn sang akâo, lehanăn kăp ksiêm jih jang bruă mghaih msir klei mnuih ƀuôn sang akâo.

Phung khua êmua hlăm dhar bruă gĭt gai bruă kƀĭn ala ăt bi êdah mơh dŭm klei dôk ka djŏ mơ̆ng dhar bruă djŏ tuôm, čiăng mâo hdră êlan djŏ hĭn mghaih msir hlăm wưng tinăp, msĕ si klei kơ ênol ênil mnơ̆ng dhơ̆ng đĭ yuôm, klei gun kpăk hlăm êlan klông, klei čhĭ mnia, dŭ mdiăng, ba yua phao mơar soh hŏng klei bhiăn… K’iăng khua bruă kƀĭn ala Nguyễn Đức Hải čang hmăng pral ba yua hdră bhiăn lăn ala thŭn 2024 kơ klei hdĭp:

"Drei hlăk dôk djă yua klei bhiăn lăn ala nao hlăm klei hdĭp mâo klei  mnuih ƀuôn sang mơak. Ƀiădah klei djŏ tuôm hŏng ênoh čhĭ lăn, bruă bi mklă kơ klei dưi djă yua lăn ti dŭm alŭ wăl… Ară anei adôk mâo lu hră mơar bi ksŭn lu. Brei drei ngă bi pral bruă mkăp hră lăn, klei anei brei bi mâo klei bi sa hnơ̆ng mă bruă mơ̆ng dŭm gưl. Tui si hdră bhiăn mrâo, hdră êlan mrâo bi djă yua êjai mnuih ƀuôn sang dôk guôn”.

Dhar bruă gĭt gai bruă kƀĭn ala mtă leh kơ knŭk kna gĭt gai mtam dŭm phŭn dhar bruă, anôk bruă djŏ tuôm, bruă sang čư̆ êa dŭm alŭ wăl mđing mprăp bi djăp mnơ̆ng dhơ̆ng Tết Nguyên đán; Phŭn bruă êlan klông mđĭ hĭn bruă ksiêm dlăng, čih hưn bi klă ênoh bi dŭ mdiăng. Phŭn bruă kahan ksiêm hyuă kjăp bruă hiu suang, kiă kriê klei êđăp ênang êlan klông, boh nik êjai hlăm dŭm bruă dŭ mdiăng tue lehanăn mdiăng mnơ̆ng pioh kơ Tết Nguyên đán.