Bruă kƀĭn ala srăng mâo hdră êlan jăk hĭn hŏng boh klei lăn ala. Mbĭt anăn hmăng hmưi phung bi ala ba mdah dŭm hdră êlan jăk hĭn kñăm ruh mgaih klei dleh dlan kơ bruă duh mkra, kñăm mâo mta kñăm đĭ kyar 6,5% kơ jih thŭn, mkŏ mjing tur knơ̆ng kjăp kơ bruă bi leh dŭm mta kñăm mâo leh hlăm wưng thŭn 2021 – 2025.

Klei đăo knang lehanăn klei čang hmăng anăn yơh jing klei mĭn hlăm lu mnuih dôk tui mđing mơ̆ng klei bi kƀĭn tal 5, bruă kƀĭn ala gưl 15, hŏng klei bruă kƀĭn ala trông čhai lu bruă yuôm bhăn, msĕ si: Bi mklă truh 08 hdră bhiăn, 03 hdră mtrŭn, lehanăn lŏ mă klei blŭ kơ 9 hdră bhiăn. Hlăm anăn hdră bhiăn klei kơ lăn ala lŏ mlih mrâo, mâo bruă kƀĭn ala lŏ dơ̆ng mă klei blŭ gưl tal 2. Truh kơ ară anei, leh mă klei blŭ mơ̆ng mnuih ƀuôn sang, klei čih mkra hdră bhiăn anei adôk mâo lu klei blŭ mdê mdê kơ ngăn prăk bruă lăn ala, lehanăn kơ bruă hrui wĭt lăn. Klei blŭ mơ̆ng mnuih ƀuôn sang snei:

  “Hdră bhiăn lăn ala djŏ tuôm hŏng klei hrui wĭt lăn lehanăn kơ klei ênoh lăn. Bruă hrui wĭt lăn tơdah amâo mâo čih ôh klă mngač ênoh čhĭ lăn, lehanăn hrui mă lăn. Bi mbha lăn brei ngă hŏng klei kjăp. Tơdah hlei pô ngă soh bi mâo hdră ƀuah mkra sĭt êmĭt, mơ̆ng anăn ba klei amâo mâo jăk kơ lăn čar”.

     Klei bi kƀĭn tal 5 êjai klei duh mkra ala čar drei hlăk dôk ti anăp klei lông dlăng, êjai klei đĭ kyar 3 mlan akŏ thŭn djăp 3,32%, anôk duh mkra mnia mblei hŏng ala tač êngao phŭn ala čar pô ăt toh hroh, amâodah klei đĭ kyar amâo mâo prŏng ôh, bruă čiăng bi leh jih jang ênoh čuăn jing sa mta bruă bŏ hŏng klei dleh dlan. Mnuih ƀuôn sang čang hmăng phung bi ala bruă kƀĭn ala mâo bruă klam hĭn, klei mĭn kjăp bi trông čiăng tui duah hdră djŏ hĭn ruh mgaih jih klei dleh dlan kơ bruă duh mkra ară anei, kñăm dưi bi leh mta čuăn klei đĭ kyar truh 6,5% kơ kluôm thŭn. K’iăng khua bruă kƀĭn ala Trần Quang Phương lač:

 “Amâo mâo djŏ knŏng hjăn hlăm 3 mlan akŏ thŭn ôh GDP êdah hĕ klei toh hroh pral mơ̆ng 8,2% trŭn 3,3% ƀiădah mơ̆ng mlan 9 lehanăn jih thŭn dih leh mâo mnhuai toh hroh. Klei anei, mâo leh dŭm klei bi knăl, kñăm lŏ tĭng mkă bi djŏ hnơ̆ng toh hroh anăn bhiâo riâo rit mơ̆ng 8,2 trŭn 3,3. Snăn brei mâo hdră hlak mblang ya mta klei awăt kƀah hŏng klei bi djŏ, lehanăn djăp ênŭm hĭn”.

Sa mta klei mkăn năng lŏ mđing mơ̆ng klei bi kƀĭn tal anei, anăn jing bruă kƀĭn ala kăp ksiêm gưl dlông kơ klei kiă kriê ba yua mnuih ngă bruă hlăm klei mdrơ̆ng hŏng klei ruă tưp Covid-19. Hlăm klei čih mkra klei hâo mdah mơ̆ng êpul ksiêm dlăng brei ƀuh, mklei čoh čuăn kơ bruă blei mprăp kdrăp mdrao mgŭn lĕ hlăm klei êmưt snăk, kyua lu klei dôk bi hyưt, huĭ kơ soh mơ̆ng leh mâo dŭm klei ngă bruă amâo mâo djŏ. Tui si pô bi ala Phạm Khánh Phong Lan, êpul ƀuôn prŏng Hồ Chí Minh: Klei ruă tưp msĕ si sa mta klei lông dlăng hŏng dhar bruă mdrao mgŭn, lehanăn mnuih ƀuôn sang yơh jing pô tŭ lu klei hmăi amâo mâo jăk:

  “Kâo tŭ ư hŏng bruă ƀuh klei amâo mâo djŏ jing drei bi kdơ̆ng, msĕ hŏng klei mdrao mgŭn mơh, brei mâo klei thâo bi kna plah wah krơ̆ng ai ktang kđeh êrah, bi mbŏ hnơ̆ng tŭ jăk kơ asei mlei, čiăng mâo ai dưi mdrơ̆ng hŏng ya mta klei amâo mâo jăk êjai dôk mdrao klei ruă. Asei hlăm dhar bruă anei mtam ƀuh êdah êdi kơ klei anei. Kâo tŭ ư yơh, dah ngă soh tŭ klei ƀuah mkra, ƀiădah brei mâo klei ksiêm hlăm kluô mjih jang bruă, si srăng ngă brei thâo ƀuh klei ksiêm dlăng anăn jing kbiă hriê mơ̆ng klei khăp”.

  Klei bi kƀĭn tal 5, Bruă kƀĭn ala gưl 15 mâo mkŏ mjing leh klei bi kƀĭn mkrah wưng Êpul khua kiă kriê gưl dlông mrâo mjưh ruĕ. Mâo gưl dlông mtă brei ngă hŏng klei pral, ngă bi jăk hĭn bruă mkŏ mjing, ƀư̆ mkra Đảng lehanăn jih jang bruă kđi čar hŏng klei doh mngač, boh nik hlăm bruă kiă kriê klei bhiăn, hlue ngă klei bhiăn. Pô bi ala Nguyễn Thị Báo, dôk ti kdriêk čar Cầu Giấy, ƀuôn prŏng Hà Nội akâo ngă bi jăk hĭn jih jang bruă lăm lui hĕ jih ya mta klei mĭn amâo mâo djŏ, klei duah bi mplĕ klei soh hdơ̆ng găp hlăm đa đa phung khua êmua:

 “Drei bi kdơ̆ng hŏng jih jang klei mĭn amâo mâo djŏ, klei alah kba, klei huĭ kơ bruă pô klam, amâo mâo klei jhŏng, amâo mâo jhŏng klam ôh klei amâo mâo djŏ pô ngă. Mâo đa đa phung khua kiă kriê, phung đảng viên ênuah ênô, bŏ hŏng klei thâo gĭr, amâo mâo êdu ai ôh ti anăp klei dleh dlan, jih ai tiê hur har hŏng bruă knuă tơl bi leh, hŏng klei đua klam prŏng, wăt lĕ hlăm klei săn asei mlei luič klei tŭ dưn kơ pô tŭ mơh”.

Klei bi kƀĭn êjai klei duh mkra ala ƀuôn lăn čar pô dôk găn lu klei dleh dlan, mnuih ƀuôn sang čang hmăng kơ phung bi ala mâo klei thâo uêñ mĭn, dưn yua jih ai tiê klei mĭn pô hrăm mbĭt ruh mgaih jih jang klei dleh dlan bruă duh mkra, ngă tŭ jing djăp ênoh čuăn kčah mơ̆ng anôk bruă kƀĭn ala thŭn 2023, mjing atur kjăp kơ bruă bi leh djăp mta ênoh čuăn kơ jih wưng 2021 - 2025./.