Tui si khua bruă kƀĭn ala, knŏng giăm hlăm 4 mlan hlue ngă bruă sang čư̆ êa dua gưl, dŭm klei awăt klei kƀah, msĕ si mbha klei dưi, bruă ngă, bruă čuăn plah wah dŭm gưl adôk ka bi knar, dôk mđĭ mđăl, mâo dŭm hră mơar ka djŏ hŏng klei bhiăn, klei ngă hră mơar adôk ka pral, tuôm hŏng klei dleh dlan hlăm dŭm bruă lăn ala, bruă rŭ mdơ̆ng, bruă răng mgang wăl hdĭp mda, sang lăn, bruă hlue ngă hdră bhiăn, hră gŏ sang.

Khua bruă kƀĭn ala Trần Thanh Mẫn lač, klei êbeh lehanăn kƀah knuă druh mnuih mă bruă, anôk mă bruă điêt kniă, kƀah lu êpul bruă. Siămdah gưl dlông brei klei dưi kơ dŭm alŭ wăl mghaih msir bi pral, êjai dôk hlăm anôk mă bruă mrâo, ka mâo djăp klei găl ôh, dŭm êpul bruă, anôk bruă gưl ƀuôn hgŭm srăng mkŏ mjing hlăm dŭm anôk mdê mdê. Mơ̆ng anăn, dŭm alŭ wăl mđĭ ktang bruă bi mlih mrô, ba yua kdrăp mrâo čiăng khă dah ƀiă mnuih mă bruă, ƀiădah jih jang bruă knuă ăt dưi ngă hŏng klei jăk.

Khua bruă kƀĭn ala mă klei bi hmô, ti anôk bi kƀĭn tal 9 leh êgao, Bruă kƀĭn ala mâo bi mklă leh lu klei bhiăn, tơdah amâo mâo ba yua ôh klei bi mlih mrô, amâo mâo ba yua ôh kdrăp mơ̆ng klei thâo mĭn anak mnuih AI snăn amâo srăng bi leh ôh bruă čuăn mơ̆ng klei bhiăn, lehanăn mñă, anei jing klei bi mlih dôk găn hlăm lu klei dleh dlan, klei lông dlăng, hlei pô amâo mâo thâo amâodah amâo dưi mă bruă snăn mdei.

Khua bruă kƀĭn ala lač, hlăm klei hlue ngă bruă mơ̆ng sang čư̆ êa alŭ wăl dua gưl, kƀah klei bhiăn kăp ksiêm, ngă truh kơ klei dleh kƀah hlăm gưl tal êlâo, ba mâo klei tŭ dưn sĭt êmĭt ôh, boh nik hlăm dŭm alŭ wăl, krĭng ƀuôn sang lehanăn krĭng ƀuôn prŏng mnuih lu. Kyuanăn, gưl čar brei mâo klei kăp ksiêm jêñ jêñ hŏng gưl ƀuôn hgŭm, ya mta bruă kƀah lŏ bi kjăp bruă anăn mtam, lehanăn klei tŭ dưn jing:

Amâo mâo pô mkăn ôh êngao kơ knŭk kna, Phŭn bruă kiă kriê bruă knuă, dŭm alŭ wăl hlue ngă jih jang hdră mă bruă hlăm hdră êlan bi mlih mrâo, mđĭ klei thâo lehanăn kjăp kơ bruă. Tal êlâo jing bi leh klei bhiăn kơ hdră êlan mă bruă, ktrâo atăt klei mă bruă knuă, dŭm alŭ wăl hlue ngă mđrăm jih jang bruă mđĭ mlih bruă knuă, mđĭ klei dưi mâo ngăn prăk. Mkŏ mjing hdră êlan mă bruă bi djŏ hŏng klei bhiăn. Ară anei klei bhiăn ka djăp ênŭm, lehanăn klei ktrâo atăt bruă hlue ngă. Tal dua jing si srăng ngă mâo klei bi mlih kjăp klei bhiăn jao klei dưi, mbha bruă ară anei. Tal 3, hlŏng ksiêm wĭt bi mlih ênoh mnuih ngă bruă, mđing kơ phung mâo keli thâo hlăm bruă, pioh jao bruă bi djŏ guôp.

Mbĭt hŏng anăn, bi ktrâo atăt kơ djăp alŭ wăl bi ksiêm hnơ̆ng thâo knuă druh mă bruă, jao bruă bi djŏ, pral mkŏ mjing dŭm êpul êya truăn kơ bruă, đru kơ jih jang bruă ngă hră mơar hlăm ƀuôn hgŭm, lehanăn mtrŭt phung duh mkra êngao knŭk kna bi mguôp mbĭt, mđĭ klei thâo kơ knuă druh mă bruă, mkŏ mjing klei mjuăt bi hriăm, lehanăn mđĭ bi kjăp êpul bruă kăp ksiêm mơ̆ng yang ƀuôn hlăm alŭ wăl, mkŏ mjing jêñ jêñ dŭm klei bi kƀĭn hŏng mnuih ƀuôn sang, čiăng kơ jih jang bruă ngă mâo klei ksiêm dlăng kjăp.

Boh nik, mơ̆ng ară anei hlŏng truh kơ knhal jih thŭn lŏ tui duah klei duh bi liê, rŭ mdơ̆ng anôk mă bruă, boh nik hlăm gưl ƀuôn hgŭm. Ară anei adôk hlăm brô  2.000 anôk bruă ka djăp hŏng ênoh čuăn.

Kơ dŭm ênoh cuăn mđĭ kyar klei duh mkra ala ƀuôn, khua bruă kƀĭn ala Trần Thanh Mẫn lač bi pral bruă duh bi liê, mđing kơ klei mđĭ kyar, mâo klei mđĭ kyar kjăp, ngăn prăk hơĭt, ênoh mah dưi kiă kriê, klei mđĭ kyar duĕ nao kơ klei mđĭ kyar mtah, bi mlih mrô, mđĭ boh tŭ klei ngă bruă, bi kjăp klei thâo mnuih mă bruă, čiăng kơ bruă knuă mâo klei đĭ kyar nanao.

Hŏng ênoh čuăn tui si Đảng mâo čoh čuăn leh klă hlăm grăp wưng, tui si Khua bruă kƀĭn ala, klei yuôm bhăn hĭn jing bi hơĭt klei duh mkra kluôm, klei mđĭ kyar nao mđrĭng hŏng bruă duh mĭn kơ klei hdĭp mda ala ƀuôn, mlih mrâo hdră mđĭ kyar hlăm klei mtrŭn agha êlam hĭn, tui tiŏ klei bi mlih mrô, mđĭ kyar mtah, mđĭ klei thâo săng. Mbĭt hŏng anăn, lŏ dơ̆ng mkŏ wĭt klei duh mkra hŏng sa hdră kluôm ênŭm, mkŏ wĭt jih jang hdră mă bruă hŏng klei djŏ, čung atăt bruă duh mkra ala čar đĭ kyar, anăp truh kơ phŭn bruă kđĭ čar srăng mâo hdră mtrŭn kơ klei duh mkra knŭk kna, mkŏ wĭt krĭng lăn kơ anôk knŭk kna duh bi liê.

Khua bruă kƀĭn ala mñă, čiăng dưi bi leh jih jang mta kñăm anăn, brei mâo klei bi mlih prŏng kơ hdră êlan mă bruă kluôm, kơ klei knŭk kna, lehanăn bruă kƀĭn ala kiă kriê, ruh mgaih jih klei dleh dlan, mđĭ klei thâo kjăp mơ̆ng bruă knŭk kna kiă kriê. Mđing kơ klei duh mkra kluôm mơ̆gn lăn čar hŏng klei mngač tač, tui si khua bruă kƀĭn ala, hŏng ya mta bruă ka dưi ngă snăn amâo lŏ mâo pô mkăn ôh, brei grăp čô knuă druh đảng viên bi kjăp bruă kđi čar, bi kjăp klei mĭn, čăng mđrăm mbĭt hŏng mnuih ƀuôn sang kjăp ai tiê mđĭ kyar lăn čar./.