Khua bruă kƀĭn ala Vương Đình Huệ jih jang hdră êlan mơ̆ng anôk bruă kƀĭn ala kñăm jing mdưm tal êlâo kơ mnuih ƀuôn sang lehanăn phung duh mkra. Mnuih ngă bruă jing pô phŭn kơ klei duh mkra, hơĭt kjăp lehanăn đĭ kyar, jing pô knơ̆ng hlăm klei bi mlih hdră bhiăn čiăng bi djŏ. Bruă kƀĭn ala, dhar bruă gĭt gai bruă kƀĭn ala, dŭm anôk bruă hlăm bruă kƀĭn ala, lehanăn dŭm êpul bruă djŏ tuôm mâo mmông dưi lŏ bi tuôm, mđing hmư̆ klei mĭn, klei mnuih ngă bruă čang hmăng, kñăm lŏ bi kjăp hĭn klei bhiăn lehanăn mâo klei tŭ yuôm sĭt:

 “Hmei yap anei jing klei bi tuôm hŏng phung bi ala truăn kơ bruă, kăp mđing hmư̆, lehanăn bi trông hŏng dŭm êpul kiă kriê mnuih ngă bruă, phung ngă bruă, phung bi ala brei kơ êbeh 50 êklăk čô mnuih hlăm kluôm ala, jing phung ngă bruă sĭt ba wĭt klei tŭ dưn kơ klei mđĭ kyar bruă duh mkra ti lăn čar, lehanăn digơ̆ mơh jing phung hmăi djŏ dŭm klei dleh dlan, tơdah lĕ nanao hlăm klei bhiăn bi mlih mơ̆ng djăp mta klei bhiăn mơ̆ng jih jang hdră bhiăn Việt Nam".

Bi trông ti anôk bi tuôm anăn, klei kơ sang dôk hŏng mnuih ngă bruă jing sa hlăm dŭm bruă mâo lu mnuih ngă bruă kwưh akâo. Nguyễn Việt Anh, pô ngă bruă mơ̆ng knơ̆ng bruă dăng kông Viettel hlăm êpul grŭp dăng kông êlan kbưi lĭng kahan lač:

 “Hlăk anăn, sang dôk lu mnuih jing lâo lu, ti anôk mâo alŭ wăl duh mkra snăn tinăn mâo yơh. Ƀiădah truh kơ ară anei, lăn čar mâo klei đĭ kyar hĭn leh, ƀiădah lu alŭ wăl duh mkra, mnuih ngă bruă hŏng ênoh jing lu dŭm êtuh, dŭm êbâo čô mnuih. Tơdah nao dôk hlăm sang dôk lu mnuih kơ mnuih ngă bruă snăn amâo mâo djăp ôh. Mơ̆ng anăn mơh hmăi amâo mâo jăk ba klei dleh dlan kơ mnuih ngă bruă”.

Wĭt lač kơ klei anei, Khua bruă kƀĭn ala Vương Đình Huệ brei thâo, anei jing klei dôk găn bŏ hŏng klei dleh dlan hlăm lu anôk duh mkra, amâo mâo thâo bi djŏ hŏng hdră êlan ară anei. Anôk ngă bruă, alŭ wăl duh mkra jing lu, ƀiădah lĕ anôk kơ mnuih ngă bruă amâo mâo ôh:

 “Tơdah bruă rŭ mdơ̆ng anôk duh mkra hlăm ƀuôn prŏng hŏng klei pral, snăn klei bi rŭ mdơ̆ng adôk êmưt, klei anei yơh jing klei adôk ka thâo bi djŏ hŏng klei bhiăn klei kơ sang dôk. Ƀiădah tơ nao mklăk hŏng klei anăn, sitôhmô rŭ mdơ̆ng ƀuôn prŏng êlâo hĭn si tôhmô rŭ mkra sang dôk êlâo, knhal tuič amâo mâo mnuih čiăng nao dôk ôh, amâo mâo mnuih čiăng nao blei ôh. Kyuadah bruă anei djŏ tuôm hŏng klei čuăl mkă. Ară anei, knŭk kna, khua knŭk kna ăt hlăk dôk gĭt gai jih hnơ̆ng mơh kơ bruă čuăl mkă čar. Kơ bruă čuăl mkă ƀuôn prŏng, čuăl mkă krĭng ƀuôn sang, si srăng ngă čiăng bi djŏ jih jang bruă anei”.

Ăt ti anôk bi trông anei, mnuih ngă bruă mâo klei êmuh hŏng phung khua kiă kriê bruă kƀĭn ala, knŭk kna dŭm phŭn dhar bruă djŏ tuôm kơ klei êđăp ênang mnơ̆ng ƀơ̆ng huă, kơ jih jang klei bhiăn đru, djŏ tuôm hŏng klei hdĭp hŏng mnơ̆ng dhơ̆ng, ai tiê mnuih ngă bruă, klei lăn čar kiă kriê, lehanăn hdră êlan ngă bruă, kơ dŭm klei đru čoh čuăn hŏng mnuih ngă bruă, kơ bruă čoh čuăn hlăm bruă knuă, kơ klei huă ƀơ̆ng yang hrue dơ̆ng ti anôk ngă bruă. Khua dhar bruă kơ yang ƀuôn mơ̆ng anôk bruă kƀĭn ala, khua anôk bruă kreh knhâo, khua adŭ bruă hdră bhiăn, khua phŭn bruă mdrao mgŭn, khua phŭn bruă sang hră mơar wĭt lač leh jih jang klei mnuih ngă bruă êmuh.

Blŭ klah čŭn ti anôk bi kƀĭn, Khua bruă kƀĭn ala Vương Đình Huệ lač, jih jang klei mnuih ngă bruă bi êdah leh kơ klei hdĭp, kơ bruă ngă, kơ ai tiê, lehanăn klei digơ̆ hmăng hmưi jing djŏ tuôm hŏng jih jang mnuih ngă bruă hlăm kluôm ala, lehanăn jih jang hdră êlan adôk ka djŏ mơ̆ng knŭk kna, mơ̆ng hdră bhiăn ngă leh kơ mnuih ngă bruă tuôm hŏng lu klei dleh dlan, hlăm anăn lŏ djŏ tuôm hŏng ênoh bi tĭng tla mưn ƀơk mnuih ngă bruă ăt adôk ka djŏ ôh hŏng hnơ̆ng klei hdĭp ară anei, snăn êdah êjai kơ jih klei awăt kƀah, dơ̆ng mơ̆ng sang dôk, hlŏng kơ ênoh hrui wĭt, truh kơ ênua yang ƀuôn, ênua mdrao mgŭn, lehanăn lu mta klei đru mkăn tui si bruă knuă mdê mdê:

 “Boh tŭ dưn mơ̆ng klei bi trông srăng bi mklă kơ ai tiê mlih mrâo, klei ngă bruă jih hnơ̆ng mơ̆ng anôk bruă kƀĭn ala kyua klei tŭ dưn kơ mnuih ƀuôn sang, kơ mnuih ngă bruă, lehanăn bi mklă bruă klam čŏng jih ai tiê mơ̆ng êpul hgŭm kiă kriê mnuih ngă bruă Việt Nam nao hlăm klei mkŏ mjing Đảng, mkŏ mjing bruă sang čư̆ êa. Drei đăo knang, ti gŭ klei kiă kriê klă mngač mơ̆ng Đảng, mâo klei bi hgŭm kjăp djŏ mơ̆ng jih jang dŭm gưl dhar bruă, lehanăn jih jang bruă kđi čar, klei bi sa ai hur har hŏng jih ai tiê mơ̆ng mnuih ƀuôn sang, mnuih ngă bruă, phung duh mkra sĭt nik drei srăng dưi găn jih klei lông dlăng klei dleh dlan ară anei”.

Ti anôk bi trông, Khua bruă kƀĭn ala Vương Đình Huệ, phung k’iăng khua bruă kƀĭn ala mđup brei leh mnơ̆ng kơ 20 čô mnuih ngă bruă kdlưn hĭn dôk găn hlăm klei dleh dlan./.