Khua gĭt gai Đảng Nguyễn Phú Trọng jing sa čô mnuih cộng sản sĭt nik, sa čô khua kiă kriê mbruă, mnuih mâo nanao klei blŭ mđrĭng hŏng bruă ngă, mă mnuih ƀuôn sang jing giê mkă, mă mnuih ƀuôn sang anôk kñăm, kyua klei tŭ dưn kơ mnuih ƀuôn sang ktuh êyuh jih ai tiê, mâo nanao klei jĕ giăm hŏng mnuih ƀuôn sang lehanăn mâo sa ai tiê thâo khăp êdi.

 “lăn čar drei ka tuôm mâo ôh bruă ngă prŏng prĭn, mđĭ leh kơhưm lăn čar pô hŏng tač êngao msĕ si ênuk ară anei, mjing klei găl mâo knhuang đĭ kyar kjăp hlăm êlan mâo leh Đảng, lehanăn mnuih ƀuôn sang tui nao djŏ hŏng klei Awa Hô mtă”.

Anei jing klei khua gĭt gai Nguyễn Phú Trọng lač, ti anôk bi kbĭn tal sa Êpul khua gĭt gai Đảng gưl 13, lehanăn ti anôk bi kƀĭn yuôm bhăn mâo khua gĭt gai nao kƀĭn mbĭt, lehanăn mâo dŭm klei blŭ yuôm bhăn. Klei anei brei ƀuh khua gĭt gai Đảng bi êdah leh   giăm 40 thŭn ngă klei mlih mrâo, mơ̆ng sa lăn čar ƀun ƀin, dơ̆ng mơ̆ng anôk hơăi măng, lăn čar ka đĭ kyar, bruă nah gŭ adôk êdu awăt, klei thâo săng adôk kƀah, truh ară anei   Việt Nam kpưn đĭ jing leh lăn čar hlăk đĭ kyar, mâo hnơ̆ng hrui wĭt man dưn, dhar kreh yang ƀuôn lŏ dơ̆ng đĭ kyar, klei hdĭp mda mnuih ƀuôn sang mâo leh klei bi mlih, bruă mkŏ mjing Đảng lehanăn jih jang bruă kđi čar mâo leh knhuang đĭ kyar jăk, klei bi mguôp jih jang djuê ana mâo hyuă kjăp, bruă kđi čar, yang ƀuôn hơĭt kjăp, bruă răng mgang klei êđăp ênang ƀrư̆ hrue ƀrư̆ đĭ hĭn, lehanăn mâo k’hưm hŏng tač êngao:

“Drei jing amuôn adei A wa Hô, Đảng jing Đảng Cộng sản Việt Nam djuê ana jing djuê ana Việt Nam, sĭt nik lăn čar srăng mâo klei đĭ kyarr amâo mâo mdei, săng hmao dŭm ala čar mkăn snăn jing klei gĭr mâo čoh čuăn leh”.

Čiăng dưi atăt lăn čar bi knar hŏng ala čar tar rŏng lăn, msĕ si klei A wa Hô tuôm lač leh, tui si khua gĭt gai Đảng êngao kơ klei sa ai mbĭt hŏng jih jang bruă kđi čar, lehanăn jih jang mnuih ƀuôn sang hlăm kluôm ala dlăng yuôm bhăn êdi bruă mkŏ mjing mnuih ngă bruă. Nao lehanăn blŭ hrăm gĭt gai klei bi kƀĭn tal êlâo mơ̆ng knŭk kna wưng thŭn 2021 – 2026, Khua gĭt gai Nguyễn Phú Trọng mtă, ngă bi jăk hĭn bruă knuă druh, boh nik hlăm klei kiă kriê, bi thâo ruah mnuih thâo lu, mnuih thâo mĭn, mâo knhuah dôk dơ̆ng ƀơ̆ng huă ênuah, klă sĭt mâo ai tiê kyua klei khăp kơ lăn čar, kơ mnuih ƀuôn sang mdưm hlăm bruă jing khua kiă kriê knŭk kna lehanăn dŭm bruă sang čư̆ êa. Khua gĭt gai tuôm mtă leh:

 Đăm ôhƀuh mnŭ mĭn dah kôk, đăm ôh ƀuh hrah mĭn dah ksă, đăm lĕ ôh hlăm klei mplư kyua klei tŭ dưn kơ hjăn hlăm klei amâo mâo djŏ, hŏng dŭm bruă ngă amâo mâo klei khăp. Kut kat bi kdơ̆ng hŏng djăp klei jhat, knuih toh hroh, knhuah amâo mâo jăk, bi kdơ̆ng hŏng jih jang klei bi tiŏ êran hlăm bruă knuă, knŏng mdưm mă mnuih hlăm gŏ sang pô, wăt tơdah pô anăn jing mnuih amâo mâo thâo bruă ôh”.

Bi ti anôk pŏk klei bi kƀĭn tal sa, klei bi kƀĭn bruă kƀĭn ala gưl 15, hlăm hrue   20/7/2021, jing sa anôk bruă bi ala prŏng hĭn kơ mnuih ƀuôn sang, anôk bruă mâo klei dưi prŏng hĭn kơ lăn čar yang ƀuôn ngă phŭn êngiê Việt Nam, Khua gĭt gai Đảng Nguyễn Phú Trọng mtă, bruă kƀĭn ala lŏ bi dưn yua ktang hĭn dŭm boh tŭ dưn leh mâo hlăm 75 thŭn êgao, lŏ dơ̆ng mlih mrâo, mđĭ hĭn hnơ̆ng kjăp klei ngă bruă hlăm kđi čar mơ̆ng lăn čar hlăm ênuk mrâo mrang. Čiăng mâo msĕ snăn khua gĭt gai Đảng Nguyễn Phú Trọng lŏ dơ̆ng mtă:

“Jih jang phung bi ala hlăm anôk bruă kƀĭn ala gưl anei, mâo leh bruă đua klam prŏng, jih ai tiê kyua lăn čar, kyua mnuih ƀuôn sang, mă bruă kơ lăn čar, ngă bruă kơ mnuih ƀuôn sang, lŏ mjuăt bi hriăm knhuah hdĭp, jĕ giăm hŏng mnuih ƀuôn sang, mđing hmư̆ klei mnuih ƀuôn sang blŭ, hlue ngă lehanăn bi leh jăk bruă čuăn mâo mnuih ƀuôn sang jao leh”.

Jih jang klei blŭ năng mđing êdi mơ̆ng khua gĭt gai Nguyễn Phú Trọng – mnuih cộng sản sĭt nik, sa čô khua kiă kriê mbruă, pô mâo nanao klei blŭ nao mđrĭng hŏng bruă ngă, mă mnuih ƀuôn sang jing giê mkă, dlăng kơ mnuih ƀuôn sang jing anôk kñăm, kyua klei tŭ dưn kơ mnuih ƀuôn sang bi ktưn ngă, mâo nanao klei jĕ giăm hŏng mnuih ƀuôn sang, hŏng sa ai tiê thâo khăp prŏng./.