Klei čhĭ mnia soh hŏng klei bhiăn, mkra mjing mnơ̆ng mgưt ăt dôk mâo dleh dưi ksiêm dlăng. Mơ̆ng hrue 15/12/2025 truh 14/3/2026, kluôm bruă ksiêm dlăng klei mŭt kbiă hmao ƀuh, mă kơ̆ng, lehanăn phat mkra êbeh 4.800 klei čhĭ mnia soh hŏng klei bhiăn, dŭ mdiăng mnơ̆ng soh hŏng klei bhiăn găn knông lăn, đĭ hĭn êbeh 1.000 klei, jing knar hŏng giăm 26% mkă hŏng wưng anei thŭn 2025. Hlăm ala čar kahan ksiêm lehanăn dhar bruă djŏ tuôm ăt hmao ƀuh, mghaih msir lu klei mkra mjing mnơ̆ng mgưt, mnơ̆ng amâo mâo jăk.

Ti êngao bruă mơ̆ng bruă kƀĭn ala, phung bi ala bi êdah ktang phĭt bruă bi kdơ̆ng hŏng klei čhĭ mnia mnơ̆ng mgưt, mnơ̆ng soh hŏng klei bhiăn, mnơ̆ng amâo mâo kjăp. Tui si Trung tướng Phạm Công Nguyên, Khua kiă kriê anôk bruă hdră bhiăn, lehanăn hră mơar klei bhiăn mmơ̆ng phŭn bruă kahan ksiêm, jing pô bi ala mơ̆ng čar Thanh Hóa: ti gŭ klei gĭt gai mơ̆ng Đảng, dŭm dhar bruă djŏ tuôm mđĭ hĭn leh bruă bi kdơ̆ng hŏng mnơ̆ng mgưt, mnơ̆ng soh hŏng klei bhiăn, mnơ̆ng amâo mâo kjăp, jing sa hlăm dŭm bruă tal êlâo pioh mđĭ kyar klei duh mkra, lehanăn răng mgang kjăp klei suaih pral mnuih ƀuôn sang.

“Êjai drei bi kdơ̆ng ktang hŏng djăp mta mnơ̆ng soh hŏng klei bhiăn, mnơ̆ng mgưt, mnơ̆ng amâo mâo jăk, kñăm čiăng mâo klei bi ktưn čhĭ mnia hŏng klei ênuah, lehanăn mtăp mđơr. Tơdah mnơ̆ng mgưt, mnơ̆ng soh hŏng klei bhiăn bŏ hlăm sang mnia, klei anăn jing mđrĭng hŏng dŭm anôk mkra mjing mnơ̆ng dhơ̆ng jăk srăng tuôm hŏng klei dleh dla. Ngă dleh kpăk prŏng snăk hŏng phung duh mkra, kơ hnơ̆ng hrui wĭt, lehanăn hmăi kăn jăk rei kơ klei čiăng mđĭ kyar kơ dua mrô. Klei bi kdơ̆ng hŏng mnơ̆ng soh hŏng klei bhiăn, mnơ̆ng mgưt, mnơ̆ng amâo mâo jăk jing bruă ngă tal êlâo ară anei. Mjing anôk bi ktưn jăk hlăm klei mtăp mđơr hŏng phung duh mkra, lehanăn lŏ jing hdră êlan gang mkhư̆ djăp mta klei amâo mâo jăk hŏng klei suaih pral mnuih ƀuôn sang, bi hrŏ ênoh bi liê hlăm klei mdrao mgŭn klei ruă.”

          Khua êpul hgŭm phung duh mkra điêt lehanăn man dưn Việt Nam, pô bi ala  Nguyễn Văn Thân êpul mơ̆ng ƀuôn prŏng Hồ Chí Minh brei thâo, mnơ̆ng soh hŏng klei bhiăn, mnơ̆ng mgưt, mnơ̆ng amâo mâo jăk hlăk hlê dôk kpĭ mnơ̆ng sĭt, mnơ̆ng jăk, ba klei ktrŏ hŏng phung duh mkra ênuah, ba klei luič liê prŏng kơ klei duh mkra. Čiăng rơ̆ng dưi mâo klei đĭ kyar dua mrô, lehanăn răng mgang kjăp klei suaih pral mnuih ƀuôn sang, bruă bi kdơ̆ng hŏng mnơ̆ng čhĭ mnia soh hŏng klei bhiăn, mnơ̆ng mgưt, mnơ̆ng amâo mâo jăk năng lŏ dơ̆ng ktang hĭn:

“Hŏng phung mă bruă sĭt, bi liê lu, snăn ênoh ênil đĭ. Ƀiădag truh kơ mnơ̆ng mgưt, mnơ̆ng amâo mâo jăk ñu ba hriê klei jhat kơ asei mlei anak mnuih, kơ klei hdĭp anak mnuih. Tơdah mnơ̆ng soh hŏng klei bhiăn, mnơ̆ng mgưt, mnơ̆ng amâo mâo jăk lu hĭn êjai snăn si dưi mâo klei đĭ kyar? Jih jang kluôm yang ƀuôn srăng lĕ hlăm klei jhat rai. Kyuanăn bruă bi kdơ̆ng hŏng mnơ̆ng soh hŏng klei bhiăn, mnơ̆ng mgưt, mnơ̆ng amâo mâo jăk, jing bruă nga mjêč. Knŏng mâo dua hdră jing ksiêm hlăm anôk mkra mjing, tal dua lĕ nao ksiêm anôk čhĭ mnia. Bi tơdah čhĭ hlăm êlan hla pŏk snăn mâo bruă kiă kriê klei čhĭ mnia anei.”

Dưi thâo ƀuh, klei bi kdơ̆ng hŏng mnơ̆ng mgưt, mnơ̆ng soh hŏng klei bhiăn, mnơ̆ng amâo mâo jăk amâo mâo djŏ knŏng răng mgang klei suaih pral kơ mnuih yua, ƀiădah lŏ jing bruă kut kat mkŏ mjing anôk duh mkr amnia mblei klă mngač, kjăp, mtăp mđơr. Tơdah anôk bi mnia mblei jing djŏ, klă mngač, phung duh mkra hŏng klei sĭt lŏ mâo thiăm hĭn ai tiê mđĭ kyả rbruă knuă, mjing klei đăo knang hlăm mnuih ƀuôn sang, mơ̆ng anăn mjing boh kdrŭt kjăp kơ klei mđĭ kyar bruă duh mkra srăng truh kơ dua mrô sĭt nik. Ƀiădah, čiăng dưi bi sĭt klei anei, klei tal êlâo anăn jing bi kut kat trŭn hlăm bruă bi kdơ̆ng ktang, iêo jak jih êpul êya djŏ tuôm, mđrăm mbĭt hŏng phung duh mkra lehanăn mnuih yua mnơ̆ng bi kdơ̆ng ktang hŏng mnơ̆ng soh hŏng klei bhiăn, mnơ̆ng mgưt, mnơ̆ng amâo mâo jăk, kñăm mkŏ mjing sa anôk duh mkra mnia mblei kjăp, lehanăn đĭ kyar nanao./.