Bruă mkra êlan dơ̆ng pral Dưr – Dhŭng kdrêč găn Yŭ Gia Nghĩa (Dak Nông) - Chơn Thành (Bình Phước) jing leh êlan phŭn yuôm bhăn mkŏ krĭng Lăn dap kngư hŏng krĭng Ngŏ Kwar Dhŭng, krĭng Yŭ kwar Dhŭng lehanăn ƀuôn prŏng Hồ Chí Minh. Hŏng boh taih 128 km, duh bi liê mbha dŭm kdrêč mkra gưl tal 1, mâo boh prŏng êlan 4 grông êdeh. Hŏng ênoh bi liê ka klă ênŭm jing 25 êbâo 540 êklai prăk. Phung bi ala čang hmăng kơ knŭk kna mkŏ mjing bruă mkra êlan hŏng klei tŭ jing, kjăp lehanăn ngă bruă bi djŏ hŏng hdră mtrŭn. Mbĭt hŏng anăn, klei duh bi liê brei mâo klei mkă tĭng bi djŏ, čiăng kơ phung mkra êlan mâo ênŭm ngăn prăk pioh ngă bruă. Pô bi ala Trình Lam Sinh, Êpul mơ̆ng An Giang lač:

 "Leh mâo klei iêo jak duh bi liê hlăm bruă bi hgŭm knŭk kna hŏng êngao knŭk kna, snăn mâo hdră êlan bi tĭng mkă klă mngač klei tŭ dưn kơ dua nah, răng kơ dŭm klei amâo mâo jăk huĭdah mâo kơ dua nah, hlăm anăn knŭk kna mjing yơh djăp klei găl kơ phung duh bi liê pral lŏ mâo hrui wĭt ngăn prăk pô leh bi liê. Klei yuôm hĭn anăn jing, klei iêo jak phung duh bi liê hŏng hdră êlan ăt dôk ka klă mngač, phung duh bi liê dôk bi hyưt kơ klei ngă bruă êmưt, ênưih ngă luič liê ngă prăk knŭk kna lehanăn anôk bruă êngao knŭk kna msĕ mơh. Snăn brei bi mâo hdră êlan jăk ênưih bi iêo jak yang ƀuôn mđrăm mbĭt mă bruă mkra êlan klông anei”.

Bi klei mă lăn lehanăn boh tâo jing dŏ pioh kơ bruă mkra êlan, pô bi ala Nguyễn Trường Giang, êpul mơ̆ng Dak Nông akâo kơ anôk bruă kƀĭn ala brei hdră êlan hjăn kơ alŭ wăl ngă bruă anei:

          "Hŏng dŭm alŭ wăl ka mâo ôh hră mơar dưi mă lăn lehanăn boh tâo, snăn phung mkra êlan bi tui duah anôk mă boh tâo lehanăn lăn. Pô ngă bruă lŏ ngă hră mơar mă lăn lehanăn boh tâo, mâo wăt klei ƀuăn răng mgang wăl hdĭp mda   lehanăn jao kơ knơ̆ng bruă sang čư̆ êa čar Bình Phước lehanăn knơ̆ng bruă sang čư̆ êa čar Dak Nông mâo bruă klam bi klă anôk mă boh tâo lehanăn lăn, nao mđrĭng hŏng bruă răng mgang wăl hdĭp mda kbiă hriê mơ̆ng bruă mă lăn lehanăn boh tâo anăn”.

Bi prăk mơ̆ng gưl dlông mâo êbeh 10 êbâo êklai prăk, phung bi ala čang hmăng kơ knŭk kna mâo klei mblang hĕ bi nik ênoh ngă prăk pioh mă bruă hlŏng truh kơ thŭn 2026. Bi prăk mơ̆ng čar jing êbeh 2 êbâo êklai prăk, čiăng kơ jih jang djăp alŭ wăl mâo sơăi bruă klam mđrăm mbĭt hŏng knŭk kna, lehanăn ti anăp bruă kƀĭn ala, ba yua prăk mkra êlan bi djŏ. Hŏng ênoh prăk duh bi liê hlăm brô 12 êbâo êklai prăk, jing truh 50% ênoh bi liê jih jang kơ bruă mkra êlan, snăn akâo kơ knŭk kna mâo klei sa hnơ̆ng ngă bruă hŏng phung duh bi liê, răng kơ klei bi mlih nanao hdră êlan mă bruă êjai dôk mkra êlan.

Hlak mblang ti anôk bi kƀĭn, Khua phŭn bruă êlan klông dŭ mdiăng Nguyễn Văn Thắng mñă, hlăm bruă mkra êlan, dŭm alŭ wăl bi mkă tĭng ênoh ngăn prăk, dăp mbha klei bi liê hŏng klei djŏ čiăng kơ jih jang bruă mkra êlan dưi bi leh hlăm knhal jih thŭn 2026:

"Boh nik bruă mkra êlan anei mâo klei gă\l prŏng kơ boh tâo lehanăn lăn pioh mkra mjing. Tui si klei čuăl mkă ti dua alŭ wăl mâo leh djăp ênŭm anôk kăp mă boh tâo, hŏng ênoh lu. Knŏng sa klei dleh ară anei jing akâo kơ anôk bruă kƀĭn ala mghaih msir bi pral kơ bruă ruh mgaih anôk ala, ruah pô ngă bruă, lehanăn mkŏ mkra ala ƀuôn mrâo kơ mnuih ƀuôn sang djŏ mơ̆ng anôk mkra êlan. Ti dŭm bruă anăn yơh kreh mâo klei dleh kpăk hlăm bruă mkra êlan. Bi anôk mă boh tâo mkra êlan mâo duah leh, năng ai jing djăp leh kơ jih jang bruă mkra êlan”.

Phung bi ala bruă kƀĭn ala, lehanăn mnuih ƀuôn sang mâo klei đăo knang, klei duh bi liê bruă mkra êlan dơ̆ng pral Gia Nghĩa (Dak Nông) - Chơn Thành (Bình Phước) ƀrư̆ ƀrư̆ srăng dưi bi leh jing êlan dơ̆ng êran pral, pŏk êlan kơ alŭ wăl Lăn Dap Kngư mđĭ kyarr hŏng klei pral./.