Lač kơ klei đĭ kyar 6,5% GDP thŭn 2023 jing ƀiă hĭn hŏng ênoh 8,83% kơ 9 mlam hlăm thŭn anei. Siămdah, pô bi ala Trần Đức Thuận, êpul mơ̆ng Nghệ An mñă: Hnơ̆ng đĭ kyar thŭn 2022 jing năng mơak leh, ƀiădah đăm čang hmăng đei ôh kơ thŭn 2023 jing kdlưn hĭn. Kyuadah thŭn 2023, dưi đăo knăl tuôm hŏng lu klei dleh dlan hĭn, kyua klei bi blah mơ̆ng Ukraine hŏng Russia ară anei ka ƀuh klei êdu ôh, klei ênoh čhĭ êa săng, êa pui, mnơ̆ng ƀơ̆ng huă dôk yuôm nanao, klei prăp luič ênoh kăn mdei rei, lehanăn prăk mnga ăt đĭ nanao mơh:   “Ară anei kâo dôk mđing kơ klei êa săng êa pui ară anei dôk mâo lu klei ka dưi thâo tĭng knăl ôh, drei ăt dôk bi răng, kơ jih jang klei amâo mâo hơĭt hŏng êa săng êa pui msĕ mdih mbruê anăn. Kyuanăn yơh hŏng ti hnơ̆ng đĭ kyar mil 6,5% kâo mĭn jing năng mđĭ ai leh, lehanăn mă mil ênoh anei jing djŏ hĭn”.

Pô bi ala Vũ Tiến Lộc, êpul mơ̆ng Hà Nội lač, klei duh mkra ala čar drei mâo hnơ̆ng pŏk ƀăng prŏng, djŏ tuôm hŏng lu bruă duh bi liê, bi mnia mblei hŏng ala tač êngao lu. Hlăm ala čar, phung duh mkra tuôm hŏng lu klei dleh dlan, boh phŭn kơ klei đĭ kyar jing mnia mblei hŏng ala tač êngao, duh bi liê ti ala tač êngao: “Êjai dôk găn hŏng klei dleh dlan msĕ snei čiăng bi mâo ênoh čuăn kơ hnơ̆ng đĭ kyar jing mil 6,5% jing leh sa ênoh amâo mâo djŏ điêt ôh. Bi tơdah amâomâo ôh ya mta klei hmăi amâo mâo jăk mơ̆ng êngao, snăn drei dưi djăp ênoh čuăn anăn. Bi tơdah ti ala tač êngao lŏ găn lu klei amâo mâo jăk prŏng, lĕ hlăm klei dleh dlan hĭn, snăn dleh mơh drei dưi bi sĭt kơ ênoh čuăn 6,5% anei jing sa klei lông dlăng prŏng mơh”.

Čiăng mâo dŭm hdră êlan hlăm wưng kơ anăp, pô bi ala Vũ Hồng Thanh, êpul mơ̆ng Quảng Ninh lač, tơdah mghaih msir jăk djăp mta klei dleh awăt hlăm ala čar, snăn klei đĭ kyar amâo mâo djŏ knŏng hlăm thŭn anei, ƀiădah wăt kơ thŭn êdei srăng mâo boh tŭ dưn jăk mơh: “hmei mghaih msir yơh djăp mta klei awăt êdu hlăm ala čar, msĕ si hŏng bruă brei čan prăk. Tơdah hdră êlan brei čan prăk mâo klei jăk găl snăn klei mđĭ kyar thŭn 2022 anei srăng kdlưn hĭn kơ 8% mtam, ƀiădah kyua klei êmưt hlăm bruă brei čan prăk yơh klei duh bi liê kơ thŭn 2023 knŏng dôk čang guôn ti ngăn prăk knŭk kna. Ăt kyua hŏng klei anăn ênoh 347 êbâo êklai prăk mơ̆ng hdră mtrŭn mrô 43 kơ hdră êlan klei kơ ngăn prăk pioh kơ bruă kơrŭ wĭt klei duh mkra năng bi mâo mtam pioh bi kna, lehanăn mâo čan pral”.

Ăt hlăm hrue kăm êgao, tơdah bi trông kơ hdră kñăm kơrŭ wĭt bruă duh mkra, phung bi ala bruă kƀĭn ala mđing hĭn êdi kơ “đru êlan pui kmlă lehanăn kdrăp computer kơ adei nao sang hră”. Mta kñăm mơ̆ng hdră anei jing mkăp truh 1 êklăk boh computer kơ phung hđeh hriăm hră ƀun. Siămdah, ară anei adôk 400 êbâo boh computer ka mâo mkăp ôh. Mbĭt hŏng anăn, hdră ăt ka dưi rơ̆ng djăp mơh êlan pui kmlă, mâo computer truh hŏng jih jang gŏ sang phung hđeh. Phung bi ala mblang lehanăn mâo klei akâo hŏng hdră ti anăp. Pô bi ala Nguyễn Thị Sửu, êpul mơ̆ng Thừa Thiên Huế akâo duh bi liê kơ bruă nah gŭ jih jang kdrăp mrâo mrang. Čang hmăng phŭn bruă hâo hưn kčĕ bi hmâo hŏng knŭk kna pioh đru kơ dŭm ênoh phung năng dưi dưn klei anei: “Hrô kơ anăn jih jang bruă amâo mâo klah klap, ƀiădah bi duh mĭn bi leh sa mta bruă hlăm gưl să amâodah gưl kdriêk, lehanăn hŏng gưl êpul êya bruă anăn bi mâo hdră mă bruă kluôm ala. Kâo ƀuh jing jăk hĭn, lehanăn klei anei srăng đru lu hĭn klei dưi ba yua hdră mă bruă mrô, mâo ngă bruă anei pral hĭn jing kñăm hlăm anôk bruă sang hră mơar, êdei kơ klei duh mkra, lehanăn dhar kreh hlăm bruă mjuăt bi hriăm”.

Pô bi ala Nguyễn Lâm Thành, êpul mơ̆ng Thái Nguyên lač, adôk mâo lu krĭng kplŭt ti dŭm boh ƀuôn êlan anôk phung ƀuôn sang dôk amâo mâo êlan pui kmlă, amâdah adôk êdu boh nik ti dŭm krĭng čư̆ čhiăng, krĭng knông lăn, plao ksĭ. Êjai anăn, hdră “Êlan pui kmlă lehanăn computer kơ adei” êmưt mâo ngă: Boh phŭn jing kyua bruă păn kjăp boh klei mâo mơ̆ng yang ƀuôn dôk čiăng yua hlăm phung ƀuôn sang klei kơ êlan pui kmlă ka bi sa hnơ̆ng ôh. Hdră “Êlan pui kmlă lehanăn Computer kơ adei” êmưt, boh tŭ amâo mâo djŏ si klei čiăng. Wăt êlan pui kmlă lehanăn Computer. Kơ klei hâo hưn hlăm hdră ala čar kñăm jing êmưt ka mâo bi lar ôh hră mơar ktrâo atăt. Klei anei jing êmưt hlăm klei mă bruă”.

Wĭt lač ti anăp bruă kƀĭn ala, Khua phŭn buă hâo hưn mtô mblang Nguyễn Mạnh Hùng brei thâo: Ară anei 400 êbâo boh computer hlăk dôk ba truh kơ hdră mtô bi hriăm online êdei kơ Covid 19 mơ̆ng Phŭn bruă sang hră mơar. Leh hdră anei, srăng nao hlăm hdră “Êlan pui kmlă lehanăn computer kơ adei”./.