Phung bi ala bi trông leh hlăm Êpul kơ klei čih mkra hdră mtrŭn lông bi hmô dŭm klei bhiăn pioh hjăn kơ ƀuôn prŏng Ƀuôn Ama Thuôt, čar Daklak. Jih jang klei blŭ bi tŭ ư, năng bi mâo hdră mtrŭn kơ klei lông bi hmô dŭm klei bhiăn, hdră êlan pioh hjăn kơ klei mđĭ kyar ƀuôn prŏng Ƀuôn Ama Thuôt, kyuadah anei jing ƀuôn prŏng knơ̆ng kơ krĭng Lăn Dap Kngư, mkŏ hŏng dŭm anôk phŭn hlăm klei mđĭ kyar ti Dhŭng kwar krah, Ngŏ kwar Dhŭng, lehanăn krĭng 3 kiêng mđĭ kyar Lao; Campuchia; Việt Nam, mâo ai lar bra kơ klei duh mkra, dhar kreh lehanăn dŭm anôk yuôm bhăn kơ klei duh mkra ala ƀuôn, bruă lĭng kahan, bruă răng mgang klei êđăp ênang krĭng Lăn Dap Kngư lehanăn kluôm ala. Trần Văn Tiến pô bi ala hlăm êpul bruă kƀĭn ala čar Vĩnh Phúc lač: “Bruă mâo hdră mtrŭn mơ̆ng Bruă kƀĭn ala kjơ klei lông bi hmô đa đa klei bhiăn pioh hjăn kơ klei mđĭ kyar ƀuôn prŏng Ƀuôn Ama Thuôt jing năng mâo, kñăm mđĭ pral bruă rŭ mdơ̆ng Ƀuôn Ama Thuôt jing ƀuôn prŏng knơ̆ng kơ krĭng Lăn Dap Kngư lehanăn jing boh kdrŭt mđĭ kyar bruă duh mkra ala ƀuôn krĭng Lăn Dap Kngư, lehanăn jing krĭng mâo anôk yuôm bhăn kơ bruă răng mgang klei êđăp ênang lăn čar, lehanăn jing krĭng mâo lu mnuih djuê ƀiă hdĭp mda, ƀiădah klei duh mkra adôk êmưt đĭ kyar snăn jing yuôm bi mâo sa hdră êlan pioh hjăn kơ klei mđĭ kyar duh mkra ala ƀuôn krĭng anei”.

Lê Ngọc Hải, pô bi ala mơ̆ng êpul bruă kƀĭn ala čar Daklak lač, ară anei Ƀuôn Ama Thuôt ăt dôk kƀah djăp mta kơ bruă nah gŭ, kyuanăn yơh hlăm klei čih mkra hdră mtrŭn anei năng bi mâo hdră êlan pŏk phai hĭn pioh hjăn kơ klei mđĭ kyar čiăng mâo iêo jak klei duh bi liê kơ alŭ wăl anei: “Bruă tal êlâo jing kơ phung duh mkra, kyuadah čiăng mâo mkŏ êlan klông ăt dôk hlăm klei dleh dlan, snăn phung duh mkra dôk mă bruă hlăm krĭng lăn dap kngư lehanăn hlăm ƀuôn prŏng Ƀuôn Ama Thuôt jing knŏng ƀiă, snăn kâo mĭn hŏng hdră êlan prăk jia hdjul mơh kñăm iêo jak phung duh mkra hriê hŏng phung ƀuôn sang djuê ƀiă ti Lăn Dap Kngư pioh mđĭ kyar bruă duh mkra ala ƀuôn bi jăk. Ăt bi mâo klei kiă kriê kjăp hlăm klei čuăl mkă, lehanăn pŏk êlan kơ phung truăn kơ bruă, phung kreh knhâo čiăng kơ jih jang klei mbruă mâo kluh hriê rŭ mdơ̆ng ƀuôn prŏng Ƀuôn Ama Thuôt anei bi jăk”.

Jih jang klei blŭ bi lač, djăp mta bruă djŏ tuôm hŏng hdră êlan kơ ngăn prăk, kơ klei duh bi liê bi mâo hdră êlan tĭng mkă hŏng klei ƀhĭ klĭ, kyuadah mâo đa đa bruă adôk ka găl ôh hŏng hdră êlan kluôm. Msĕ hŏng jia hdjul, ară anei dôk mđing êdi leh kơ klei bi hrŏ jia kơ jih jang phung duh mkra, lehanăn phung dôk găn hlăm klei dleh dlan, ƀiădah leh ba yua hdră êlan tui si klei čih mkra snăn leh mâo klei bi ksiêm dlăng hlăm čar Daklak jing duh mĭn lu hĭn kơ dŭm anôk năng mđĭ kyar hĭn, dŭm alŭ wăl mkăn amâo mâo ôh. Kyuanăn yơh lŏ bi mâo klei ksiêm dlăng hĕ bi nik ƀhĭ klĭ, čiăng bi djŏ, mđrăm mbĭt dưi mđĭ kyar djŏ hŏng klei bhiăn mâo bruă kƀĭn ala mtrŭn leh. Lŏ mñă čiăng bi mâo klei dưi iêo jak klă mngač lehanăn kjăp kơ Ƀuôn Ama Thuôt, Đỗ Tiến Sỹ, mơ̆ng êpul bi ala bruă kƀĭn ala čar Hưng Yên lač: “Hdră mtrŭn anei dưi hlue ngă hlăm 5 thŭn, tui si kâo mĭn dưi ba yua truh kơ 7 – 10 thŭn. Kyuanei jing alŭ wăl yuôm bhăn msĕ hŏng klei bi klă mrô 67 mơ̆ng Phŭn bruă kđi čar. Lehanăn lĕ, jing anôk jăk kơ phung kreh knhâo mâo klei thâo knhăk ngă bruă, êjai hlăm wưng dôk djă yua hdră mtrŭn anei amâo mâo ktrŏ ôh kơ jia asei hlăm wang 5 thŭn. Kâo ƀuh anei jing klei jăk mjing klei iêo jak truh kơ10 thŭn tŭ mơh kñăm mjing hdră êlan iêo jak duh bi liê”.

Lŏ mñă, hŏng 4 êpul hdră êlan mâo ba bi êdah hlăm klei čih mkra hdră mtrŭn kơ klei bhiăn pioh hjăn kơ Ƀuôn Ama Thuôt Nguyễn Tuấn Anh pô bi ala mơ̆ng Êpul Long An lač, tơdah hdră mtrŭn anei mâo Bruă kƀĭn ala bi mklă leh kơ sa ƀuôn prŏng jing êpul êya bruă ti gưl kdriêk, snăn pô bi ala čang hmăng klei phung bi ala akâo srăng dưi lŏ ksiêm duah, thiăm mbŏ čiăng mkŏ mjing dŭm bruă bi hmô kơ klei mđĭ kyar kơ dŭm alŭ wăl mkăn msĕ smơh. Êngao kơ 4 êpul klei bhiăn mâo ba hlăm hdră mtrŭn, pô bi ala Nguyễn Tuấn Anh akâo kơ Êpul čih mkra hdră êlan lŏ tĭng mkă hĕ bi klă klei pô bi ala ƀuôn prŏng akâo. Msĕ si, jao kơ Êpul Gơ̆ng bruă ƀuôn sang ƀuôn prŏng mâo klei dưi bi mklă mka tĭng kơ ênoh ngăn prăk ƀuôn prŏng pioh bi kna kơ dŭm phung knuă druh, mnuih ngă bruă hlăm alŭ wăl knŭl kna kiă kriê, êpul bruă kđi čar, yang ƀuôn lehanăn anôk bruă knŭk kna mâo ƀuôn prŏng kiă kriê, tui si boh tŭ dưn mơ̆ng bruă knuă dưi tĭng tla prăk ƀơk bi djŏ hŏng mta mtrŭn mơ̆ng hdră bhiăn knŭk kna ară anei, hlue si klei bhiăn čŏng bi tĭng tla mă pô hlăm dŭm anôk bruă hră mơar, anôk bruă knŭk kna. Klei bhiăn anei ăt msĕ mơh mâo Bruă kƀĭn ala brei klei dưi hlue ngă leh ti hdră mtrŭn mrô 54 hlăk thŭn 2014, kơ klei lông bi hmô kơ hdră êlan mđĭ kyar ƀuôn prŏng Hồ Chí Minh.

Sa ai hŏng 4 hdră êlan pioh hjăn kơ ƀuôn prŏng Ƀuôn Ama Thuôt, pô bi ala Lê Tấn Tới, êpul mơ̆ng Long An, Khua kiă kriê bruă răng mgang klei êđăp ênang ăt mâo mơh klei akâo lŏ bi mbŏ kơ hdră êlan răng mgang klei êđăp ênang kơ ƀuôn prŏng Ƀuôn Ama Thuôt kyuadah dôk ti krĭng Lăn Dap kngư, kyuadah mơ̆ng krĭng Lăn Dap kngư anei jing anôk phŭn kơ bruă răng mgang klei êđăp ênang, wăt hlăm tĭng nah Ngŏ lehanăn wăt nah Yŭ lăn čar, snăn hŏng hdră êlan pioh hjăn kñăm mđĭ kyar klei duh mkra ala ƀuôn Ƀuôn prŏng Ƀuôn Ama Thuôt jing yuôm bhăn, năng bi mâo klei bi mguôp kjăp hlăm bruă răng mgang klei êđăp ênang, mâo klei êdăp ênang kơh, dưi mđĭ kyar klei duh mkra. Mơ̆ng anăn mơh, pô bi ala Tấn Tới lŏ mñă năng bi mâo hdră êlan yuôm bhăn kơ êpul kahan ksiêm, kahan lĭng, kahan răng mgang knông lăn hlăm alŭ wăl anei./.