Hlăm klei kƀĭn tal 4, Bruă kƀĭn ala mkăp leh lu mmông čiăng bi trông kơ boh sĭt leh anăn boh tŭ hluê ngă hdră mđĭ kyar bruă duh mkra ala ƀuôn, ngăn prăk ala čar. Blŭ bi ruê̆ klei kƀĭn, Khua bruă kƀĭn ala Vương Đình Huệ hơ̆k mơak, yap yuôm bhăn dŭm toh tŭ dưn, klei kdlưn hĭn, dưi mâo ênŭm wăt kơ klei đĭ kyar bruă duh mkra ala ƀuôn, rơ̆ng bruă lĭng kahan, klei êđăp ênang, klei hdĭp yang ƀuôn, kriê dlăng phung mâo bruă tŭ dưn. Ktuê dlăng boh sĭt klei kƀĭn hlăm dŭm kdrăp hâo hưn, K’Tân, mnuih djuê ana K’Ho, ti să Dă Đơn, kdriêk Lâm Hà čar Lâm Đồng brei thâo:

“Mrâo anei, mnuih ƀuôn sang kdriêk Lâm Hà ktuê dlăng klei kƀĭn tal 4, bruă kƀĭn ala gưl 15. Mâo lu klei hmăng hmưi mơ̆ng mnuih ƀuôn sang mâo bruă kƀĭn ala bi trông, uêñ mĭn. Hluê anăn dưi đru kơ mnuih ƀuôn sang jing mnuih djuê ƀiă mđĭ kyar klei hdĭp mda, klei kiă kriê, hdră êlan ngăn prăk kơ knuă druh, phung mă bruă knŭk kna jing mnuih djuê ƀiă ăt jăk. Bruă Kƀĭn ala kƀĭn tal anei bi trông kơ lu mta phŭn djŏ hŏng ai tiê mnuih ƀuôn sang, mnuih ƀuôn sang mơak mñai leh anăn hmăng hmưi si srăng ngă čiăng uêñ mĭn đru kơ mnuih ƀuôn sang jing mnuih djuê lu hĭn hlăm bruă mtô mjuăt bi hriăm, pŏk adŭ mtô kơ bruă pla mjing kphê, kñŭl, makka, rông êmô kbao, ŭn mnŭ…

Bi ruê̆ klei kƀĭn kmhal jih thŭn 2022, Bruă Kƀĭn ala mñă kơ Dhar bruă gĭt gai bruă kƀĭn ala, knŭk kna, Khua knŭk kna, Êpul gơ̆ng bruă djuê ana, Dŭm dhar bruă mơ̆ng bruă kƀĭn ala, dŭm gưl, dhar bruă mjêč mkŏ mjing bruă hluê ngă dŭm hdră mtrŭn mâo leh bruă kƀĭn ala bi klă. Phung bi ala bruă kƀĭn ala hnưm bi tuôm hŏng mnuih ƀuôn sang čiăng hưn mdah boh tŭ klei kƀĭn, rơ̆ng klei bi mguôp kjăp, mđuing hmư̆, wĭt lač klă nik klei bi êdah leh anăn klei hmăng hmưi mơ̆ng mnuih ƀuôn sang. Dŭm gưl bruă, dhar bruă gĭr ktưn hluê ngă mâo boh tŭ dưn dŭm hdră êlan bi hơĭt klei hdĭp yang ƀuôn, kriê dlăng klei hdĭp, ai tiê mnuih ƀuôn sang. Mprăp dŭm klei găl đru kơ mnuih ƀuôn sang drông thŭn mrâo 2023 leh anăn Tết Nguyên đán Quý Mão. Hlăm klei bi tuôm hŏng phung bi ala leh klei kƀĭn tal 4, bruă kƀĭn ala gưl 15, Pang Ting Brăng, mnuih djuê ana K’Ho, ti alŭ 1, wăl krah Lạc Dương, kdriêk Lạc Dương, čar Lâm Đồng lač klă, Dŭm gưl kƀĭn mơ̆ng Bruă kƀĭn ala bi trông kơ lu hdră êlan, kyuanăn mnuih ƀuôn sang dưi tŭ kluôm ênŭm. Hlăm dŭm mmông bi tuôm hŏng phung bi ala, mnuih ƀuôn sang hưn mdah, mâo phung bi ala bruă kƀĭn ala ba bi trông. Dŭm hdră êlan anăn dôk nao hlăm klei hdĭp. Pang Ting Brăng brei thâo:

“Ară anei knŭk kna hrăm mbĭt nanao hŏng ƀĭng ngă lŏ hma, mâo hdră êlan đru kơ ƀĭng ngă lŏ hma. Klă klơ̆ng ti alŭ wăl pŏk leh lu adŭ mtô bi hriăm čiăng kơ ƀĭng ngă lŏ hma dưi thâo dưn yua dŭm klei kreh knhâo mrâo mrang hlăm bruă pla mjing, rông mnơ̆ng. Phung kriăng nao hriăm dŭm adŭ anăn leh anăn dưn yua dŭm klei hriăm hlăm klei mă bruă srăng mâo klei hrăm leh anăn hnơ̆ng boh mnga srăng đĭ hĭn. Ƀrư̆ hruê pô srăng ngă jăk hĭn, hnơ̆ng tŭ jăk mnơ̆ng dhơ̆ng srăng đĭ hĭn, ba čhĭ kơ anôk mnia mblei srăng ênưih hĭn mơh”.

Leh klei kƀĭn tal 4, Bruă kƀĭn ala gưl 15, ti knhal jih mlan 11 mrâo egao, Dhar bruă gĭt gai bruă kƀĭn ala mkŏ mjing leh klei kƀĭn tal 17, bi klă tŭ ư mkăp brei ênoh prăk duh bi liê mơ̆ng gưl dlông wưng thŭn 2021 – 2025 kơ 3 hdră ala čar kñăm. Hlăm anăn, hdră ala čar kñăm mđĭ kyar bruă duh mkra – ala ƀuôn krĭng mnuih djuê ƀiă leh anăn krĭng čư̆ čhiăng jing giăm 2.500 êklai prăk. Hdră ala čar kñăm bi hrŏ ƀun hŏng klei kjăp jing 2.000 êklai prăk, Hdră ala čar kñăm mkŏ mkra krĭng ƀuôn sang mrâo jing 3.000 êklai prăk. Anei jing hdră êlan mâp lu phung bi ala ti krĭng Lăn Dăp Kngư uêñ mĭn. K’Khét Atô – k’iăng khua kiă kriê Dhar bruă djuê ana čar Dak Nông bi klă:

“Bi kơ hdră ala čar kñăm tal 3 anei jing sa hdră prŏng. Ară anei ti čar Dak Nông dôk hluê ngă djŏ hdră êlan mơ̆ng Bruă kƀĭng ala leh anăn knŭk kna ba mdah leh, hmei ăt hluê ngă ktang phĭt. Anei jing sa hdră mâo mnuih ƀuôn sang hmăng hmưi, kyuanăn jing hdră êlan djŏ hŏng ai tiê mnuih ƀuôn sang. Ară anei mâo leh 10 hdră mâo Khua knŭk kna bi klă. Sitôhmô knơ̆ng bruă dhar kreh, mjuăt ktang asei mlei leh anăn hiu čhưn ênguê mâo leh sa hdră mtô bi hriă kơ mnuih ƀuôn sang hlăm dŭm ƀuôn mđĭ kyar bruă hiu čhưn ênguê yang ƀuôn, đru kriê pioh knhuah dhar kreh djuê ana pô”.

Čiăng dưi ngă 3 hdră anei, čar Dak Nông mĭn tĭng mkăp brei êbeh 1.000 êklai prăk čiăng hluê ngă dŭm mta phŭn: mkŏ mkra krĭng ƀuôn sang mrâo, mđĭ kyar bruă duh mkra ala ƀuôn krĭng mnuih djuê ƀiă leh anăn krĭng čư̆ čhiăng, bi hrŏ ƀun hŏng klei kjăp.

Hŏng dŭm hdră êlan klă nik mơ̆ng Bruă kƀĭn ala, knŭk kna, Dŭm čar krĭng Lăn Dăp Kngư hmăng hmưi thŭn 2023 leh anăn dŭm thŭn kơ anăp srăng mâo ai đĭ kyar ktang, čiăng čiăng krĭng Lăn Dăp Kngư kpưn đĭ hrăm mbĭt hŏng ala čar./.