Klei hưn hlăm klei kƀĭn Bruă Kƀĭn Ala đăo knăl 6 mlan akŏ thŭn anei, klei đĭ kyar GDP mơ̆ng Việt Nam krŭ wĭt jăk, đăo knăl mâo 5,8%. Phung bi ala lač, 6 mlan knhal jih thŭn, khădah ăt adôk klei dleh dlan, ƀiădah hmăng hmưi đĭ kyar GDP mơ̆ng thŭn 2024 mâo 6,5%, kyua dŭm mta đru msĕ si klei brei čan duh bi liê bruă knŭk kna, klei mnia mblei lŏ mâo klei krŭ wĭt ktang, boh nik jing dŭm hdră êlan đru, ruah mgaih klei dleh dlan kơ bruă duh mkra mâo knŭk kna gĭt gai hluê ngă ktang phĭt.

Čiăng mâo mta kñăm đĭ kyar bruă duh mkra 6,5% thŭn 2024, đa đa klei blŭ mguôp mơ̆ng phung bi ala Bruă Kƀĭn Ala lač, čiăng lŏ dơ̆ng mđing tal êlâo bruă ngăn prăk mơ̆ng dŭm hdră êlan ngăn prăk čiăng mtrŭt mđĭ klei ba yua, mđĭ hĭn klei brei čan duh bi liê bruă knŭk kna leh anăn rơ̆ng djŏ hdră kčah, boh nik jing dŭm hdră bruă mkŏ mkra yuôm bhăn. Pô bi ala Trần Hoàng Ngân, êpul bi ala ƀuôn prŏng Hồ Chí Minh lač:

 “Drei mâo klei gĭr bruă kđi čar jing lu sơnăk, đăo knăl thŭn anei drei srăng dưi mâo klei đĭ kyar 6,5%. Drei lŏ dơ̆ng hluê ngă dŭm hdră êlan  mơ̆ng akŏ thŭn jing 12 bruă klam, hdră êlan, hlăm anăn mâo 3 hdră êlan kdlưn hĭn. Tal 1 jing klei kdlưn hĭn kơ hdră êlan djŏ hdră jing drei srăng mtrŭt mđĭ bruă mbha klei dưi kơ dŭm alŭ wăl čiăng bi lar klei čŏng pô, klei mbruă mơ̆ng dŭm alŭ wăl. Tal dua jing klei kdlưn hĭn kơ bruă mkŏ mkra, drei ngă leh dŭm hdră êlan ngăn prăk đru kơ bruă krŭ wĭt leh anăn mđĭ kyar bruă duh mkra, mđĭ klei duh bi liê kơ bruă mkŏ mkra, boh nik jing êlan klông”.

Knŭk kna ba mdah dŭm hdră êlan, bruă klam kñăm, hlăm anăn bruă klam ba anăp jing bi kluôm hdră kiă kriê, klei bhiăn lăn čar, hdră êlan čiăng ruh mgaih mtam dŭm klei dleh dlan, kpăk gun kơ knơ̆ng bruă, bi lar ai dưi mtrŭt mđĭ klei đĭ kyar bruă duh mkra ala ƀuôn. Pô bi ala Nguyễn Chu Hồi, Êpul ƀuôn prŏng Hải Phòng lač, hnơ̆ng đĭ kyar GDP mâo tur knơ̆ng dưi ngă:

 “Tal 1 jing ăt srăng rơ̆ng klei hơĭt bruă duh mkra hnơ̆ng prŏng. Tal 2 jing boh sĭt mơ̆ng dua wưng 3 mlan tal êlâo, khădah drei ăt dleh dlan ƀiădah hŏng klei gĭt gai ktang phĭt, hlăm wưng ară anei ăt yuôm bhăn hĭn, klei bi tŭ ư mơ̆ng gưl dlông truh kơ alŭ wăl hrăm mbĭt leh anăn ngă bruă, srăng dưi bi klă hŏng dŭm mta bruă klă nik ti dŭm alŭ wăl, êjai anăn drei srăng mâo sa boh tŭ dưn mbĭt kơ lăn čar hŏng hdră jăk hĭn.

Ăt hlăm hruê kăm êgao, Bruă Kƀĭn Ala mđing hmư̆ leh anăn bi trông kơ Hră hưn mdah knŭk kna kơ klei mkra mlih prăk mlan mơ̆ng 1 êklăk 800 êbâo prăk sa mlan jing 2 êklăk 340 êbâo prăk hlăm sa mlan mơ̆ng hruê 1/7/2024, mkra mlih prăk mlan leh jih thŭn mă bruă, prăk đru ênua yang ƀuôn, đru kơ phung mâo bruă tŭ dưn leh anăn đru ba ala ƀuôn. Phung bi ala tŭ ư hŏng knŭk kna kơ bruă mkra mlih prăk mlan mơ̆ng 1 êklăk 800 êbâo prăk sa mlan jing 2 êklăk 340 êbâo prăk hlăm sa mlan, lač anei jing hnơ̆ng đĭ năng čih yap hlăm bruă mkra mlih prăk mlan, đru bi hơĭt, mđĭ hnơ̆ng klei hdĭp mnuih mă bruă, mkŏ mjing boh kdrŭt mđĭ hnơ̆ng leh anăn boh tŭ dưn klei mă bruă. Pô bi ala Trần Văn Lâm, êpul bi ala mơ̆ng Bắc Giang lač:

"Hnơ̆ng mđĭ prăk mlan mĭn tĭng ênoh ngă hdră mlih mrâo prăk mlan hluê hdră êlan mkŏ mjing hlăm brô 900.000 êklai prăk. Mă prăk anăn čiăng mđĭ ênoh prăk mlam hđăp, grăp čô mâo klei đĭ sơăi, srăng mkŏ mjing ai êwa hơ̆k mơak”.

Đa đa klei akâo mñă kơ knŭk kna uêñ mĭn ngă dŭm hdră êlan rơ̆ng kơ ai dưi ngă hdră wưng sui leh anăn mâo boh tŭ dưn. Mđĭ hĭn dŭm hdră êlan ksiêm dlăng, kriê dlăng ênoh leh anăn dŭm hdră êlan mkhư̆ klei prăk luč ênoh êjai mđĭ prăk mlan. Pô bi ala Lê Minh Nam, Êpul mơ̆ng Hậu Giang ăt mñă:

"Drei čiăng mâo dŭm hdră êlan dưi mkhư̆ dŭm klei hmăi amâo mâo jăk, boh nik bi hrŏ jih hnơ̆ng boh klei mđĭ prăk mlan nao mbĭt hŏng mđĭ ênohm ênưih bi luč boh tŭ dưn mơ̆ng bruă mđĭ prăk mlan. Hluê anăn knŭk kna ksiêm dlăng, bi klă dŭm klei hmăi msĕ si dŭm gưl mđĭ prăk mlan êlâo mâo klei hmăi amâo mâo jăk, hmăi kơ ênoh ênil leh anăn klei prăk luč ênoh ăt čiăng uêñ mĭn. Êjai mđĭ prăk mlan ăt mđĭ prăk bi liê bruă knŭk kna, djŏ tuôm hŏng klei prăk luč ênoh ăt čiăng ksiêm dlăng klei hmăi kơ ênoh ênil dŭm mta mnơ̆ng dhơ̆ng phŭn”./.