Hlăm klei kƀĭn tal 7, Êpul gơ̆ng bruă ƀuôn sang čar Lâm Đồng gưl 10 kñăm bi trông, bi klă hŏng 32 klei hưn mdah leh anăn 21 hdră mtrŭn, hlăm anăn lu hdră mtrŭn mâo knhuah hdră êlan, wưng sui msĕ si Hdră mtrŭn kơ hdră êlan ngăn prăk 5 thŭn 2026 - 2030, Hdră mtrŭn kơ bruă klam mđĭ kyar bruă duh mkra ala ƀuôn 5 thŭn 2026 - 2030, hdră êlan mđĭ kyar bruă duh mkra ala ƀuôn thŭn 2026, mbĭt hŏng anăn jing lu hdră mtrŭn djŏ tuôm kơ bruă rơ̆ng hơĭt klei hdĭp yang ƀuôn leh anăn klei hdĭp mnuih ƀuôn sang.

 Găn lu klei dleh dlan, klei lông dlăng thŭn 2025, bruă duh mkra čar Lâm Đồng lŏ dơ̆ng rơ̆ng kơ klei đĭ kyar hŏng 16/19 ênoh čuăn mâo leh anăn êgao hdră kčah, hnư Knŭk kna hrui wĭt ti alŭ wăl đăo tĭng êbeh 31.200 êklai prăk đĭ 17% mkă hŏng hdră kčah gưl dlông jao. Bruă lŏ hma lŏ dơ̆ng bi klă bruă klam kmeh gơ̆ng bruă duh mkra čar, dŭm bruă pui kmlă doh, mă bosit alumin lŏ dơ̆ng đru mguôp hlăm klei đĭ kyar mbĭt mơ̆ng čar…Tiêu Hồng Phúc, k’iăng khua Êpul gơ̆ng bruă ƀuôn sang čar Lâm Đồng brei thâo, čar dôk gĭr ruh mgaih dŭm klei dleh dlan čiăng anăp truh klei kdlưn hĭng hlăm mđĭ kyar bruă duh mkra ala ƀuôn:

“Leh bi mŭt mbĭt bruă Knŭk kna alŭ wăl 2 gưl hlăm klei ngă bruă mphŭn kčưm dưi mâo lu boh tŭ dưn yuôm bhăn. Ƀiădah ăt adôk mâo lu klei kpăk čiăng lŏ dơ̆ng bi trông leh anăn mâo dŭm hdră êlan čiăng ruh mgaih. Kyuanăn hlăm klei kƀĭn anei Êpul gơ̆ng bruă ƀuôn sang čar amâo mâo ngă klei ksiêm êmuh”.

Hlăm klei kƀĭn mơ̆ng Êpul gơ̆ng bruă ƀuôn sang čar Gia Lai, phung bi ala ƀuôn hgŭm Tuy Phước hưn mdah hlăm gưl angĭn êbŭ, êa lip mrâo êgao, Gia Lai mâo 5 čô djiê, 11 čô êka, êbeh 32.000 boh sang êa lip, êa đung. Pô bi ala mñă kơ dhar bruă lŏ hma leh anăn wăl hdĭp mda bi klă mâo hĕ amâodah hơăi klei pŏk êa mơ̆ng dŭm knơ̆ng êa ngă truh klei êa lêč, bi klă klei dưi kdrăp mđoh êa khăt ară anei, bruă klam kriê dlăng leh anăn tă hră bi mdrơ̆ng sui…

Wĭt lač klei êmuh, Cao Thanh Thương – Khua knơ̆ng bruă lŏ hma leh anăn wăl hdĭp mda Gia Lai mñă klă amâo mâo ôh klei pŏk mđuĕ êa ti krông hà Thành. Ti krông anei amâo mâo êa kdơ̆ng êa. Dua ênao prŏng nah ngŏ mơ̆ng čar jing Núi Một leh anăn Định Bình hlăm gưl êa lip mrâo êgao ăt dôk bŏ êa, leh anăn klei bi kna ênao êa tŭ klei hmăi mơ̆ng krông Côn. Cao Thanh Thương  ăt ktrâo klă klei dleh kpăk hlăm klei mđoh êa lip  msĕ si klei ksĭng mmiă lăn hang krông, pla ana akasi hlăm krĭng êa đuĕ leh anăn bi điêt êlan êa đuĕ, sa kdrêč guê êa Hà Thanh mčah dŭm pluh met mkă hŏng hnơ̆ng êa. Bi kơ wưng sui, dŭm alŭ wăl srăng ksiêm dlăng mbĕ đuĕ mnuih ƀuôn sang hluê si hnơ̆ng klei truh yan adiê. Cao Thanh Thương brei thâo, ară anei dhar bruă lŏ hma dôk kčĕ 3 hdră êlan:

“Čiăng rơ̆ng kơ klei mđuĕ êa, knơ̆ng bruă kčĕ leh hŏng Bruă sang čư̆ êa čar mâo hdră êlan kơ krĭng mđuĕ êa krông Hà Thanh, ƀiădah ênoh duh bi liê prŏng, čiăng mâo mmông. Ti anăo, knơ̆ng bruă kcĕ hŏng Bruă sang čư̆ êa čar kơ bruă ƀuôr mnuôr êa mđoh êa khăt. Tal dua jing guê mgang dŭm krĭng ƀuôn sang. Tal 3 jing srăng ksiêm dlăng, mgaih msir klei ksĭng mmăt kdrăp mđuĕ êa. Anei jing 3 boh klei phŭn čiăng ngă mtam”.

Hlăm klei kƀĭn knhal jih thŭn, Êpul gơ̆ng bruă ƀuôn sang čar Quảng Ngãi bi klă, čar bi leh 24/24 ênoh čuăn mđĭ kyar thŭn 2025, mbĭt anăn thâo kral 3 anôk kpăk čiăng ruh mgaih čiăng mkŏ mjing tur knơ̆ng kdlưn hĭn hlăm wưng thŭn 2026 - 2030. Anăn jing, gru hmô mđĭ kyar hơĭt kjăp êjai hnư hrui wĭt jưh jang kơ đa đa ai dưi phŭn, klei ba čhĭ hrŏ, bruă lŏ hma mkŏ awăt, bruă hiu čhưn ênguê ka găl hŏng klei găl. Bruă mkŏ mkra kmeh gơ̆ng msĕ si êlan klông, logistics, kdrŭn ksĭ, leh anăn dŭm kmeh gơ̆ng mkŏ krĭng adôk kƀah hrăm mbĭt, klei ruh mgaih anôk ala, duh bi liê kơ bruă Knŭk kna êmưt, lu anôk  bruă dhar kreh - sang hră mơar - bruă mdrao mgŭn jhat rai…

Mŭt hlăm wưng đĭ kyar mrâo, čar Quảng Ngãi mdưm mta kñăm bi mlih ktang hĭn. Nguyễn Hoàng Giang, khua Bruă sang čư̆ êa čar Quảng Ngãi brei thâo:

“Hŏng ai tiê jing ngă bruă pral hĭn - ktang hĭn - gĭr hĭn; mgaih msir ngă bruă truh hnơ̆ng, lač hlŏng ngă, Bruă sang čư̆ êa Quảng Ngãi srăng kñăm grăp ai dưi, bi lar klei găl, boh tŭ dưi mâo, mbĭt hŏng bruă mgaih msir dŭm klei dôk mâo, klei êdi kƀah, bi hluh anôk kpăk, gỉ mâo mta kñăm mđĭ kyar bruă duh mkra ala ƀuôn thŭn 2026, mkŏ mjing tur knơ̆ng kjăp kơ wưng thŭn 2026 - 2030.