Gru hmô rông mnŭ phưi hlăm war sang gŏ sang A Lăng Trí ti alŭ Đắc Ốc, să La Dê, kdriêk Nam Giang, čar Quảng Nam mâo knuă druh lĭng kahan hlăm kđông răng mgang knông lăn ƀăng jang knông lăn Nam Giang ktrâo lač rông mơ̆ng thŭn 2018 truh ară anei. Kyua dưi ktrâo lač dŭm hdră mnêč kriê dlăng leh grăp gưl, Trí hrui wĭt hlăm brô 3 êklăk prăk leh anăn jing prăk hrui wĭt hơĭt kjăp kơ gŏ sang:

Gŏ sang ƀrư̆ hruê ƀrư̆ hơĭt kjăp hĭn, tinei lĭng kahan hŏng Knơ̆ng bruă sang čư̆ êa hrăm mbĭt bi hgŭm hâo hưn kơ klei mkŏ mjing gru hmô đang pla mjing rông mnơ̆ng hŏng mnuih ƀuôn sang, ƀrư̆ hruê dưi bi lar.

 Hlăm wưng êgao, kđông kahan răng mgang ƀăng kang knông lăn Nam Giang bi hgŭm hŏng bruă Đảng sang čư̆ êa să La Dê mđĭ ktang bruă hâo hưn mtô mblang, tă hdră kơ mnuih ƀuôn sang mđĭ kyar bruă duh mkra. Truh ară anei, gru hmô pla mtei ti 2 alŭ Kông Tơ Rơn leh anăn Đắc Pênh iêô jak 30 gŏ êsei hgŭm mbĭt. Hlue si đại úy Nguyễn Minh Vương, pô ngă bruă kđi čar, K’iăng kđông răng mgang knông lăn ƀang jang knông kăn Nam Giang:

“Hlăm wưng êgao snăn knuă druh lĭng kahan răng mgang knông lăn mkŏ mjing dŭm gru hmô đru kơ mnuih ƀuôn sang leh anăn nao đru mnuih ƀuôn sang ngă dŭm gru hmô msĕ si mđĭ kyar bruă duh mkra krĭng knông lăn, iêô jak phung mâo ai tiê kmah, đru hdră duh ƀơ̆ng kơ dŭm gŏ êsei mnuih ƀuôn sang, Êpul hgŭm ƀĭng ngă lŏ hma, Êpul hgŭm phung mniê, hlăm wưng êgao snăn klei mnuih ƀuôn sang ti krĭng knông lăn thâo săng lu hĭn hlăm bruă čŏng mđĭ kyar bruă duh mkra grăp gŏ sang.”

Phung blei yua nao hlăm knăm mơak “Ktưn hưn bruă lŏ hma Quảng Trị”

Hŏng klei gĭr đru mơ̆ng lĭng kahan răng mgang knông lăn, klei hdĭp mnuih ƀuôn sang ti knông lăn srăng ƀrư̆ êđăp ênang trei mđao hĭn leh anăn klei bi hgŭm lĭng kahan - ƀuôn sang ƀrư̆ hruê kjăp hĭn. Trung tá Đỗ Hoành Minh, Khua dlăng bruă kđi čar kđông kahan răng mgang knông lăn čar Quảng Nam brei thâo:

Kơ klei mđĭ kyar bruă duh mkra ala ƀuôn snăn ăt mâo dŭm gru hmô tŭ dưn, đru mkra mđĭ klei hdĭp mda, mkra mđĭ dŭm gru hmô rông sin mă boh amâodah pla ana đẳng sâm să Ga ri, să Trà Ơn ti kdriêk Nam Giang. Gru hmô rông êmô ana mđai ti să Chơ kdriêk Nam Giang leh anăn lu gru hmô mkăn kñăm kah mbha klei dleh dlan kơ mnuih ƀuôn sang, mơ̆ng dŭm bruă ngă klă klơ̆ng anăn hyuă kjăp thiăm klei bi hgŭm lĭng kahan mnuih ƀuôn sang, mjing ai ktang hlăm bruă răng mgang klei dưi lăn ala klei êđăp ênang knông lăn ala čar.

Čiăng mđĭ kyar bruă duh mkra kơ mnuih ƀuôn sang krĭng knông lăn, Anôk bruă mtrŭt mjhar lŏ hma Quảng Trị pŏk ngă leh gru hmô lŏ hma bi mguôp ti alŭ Cheeng, să Hướng Phùng, kdriêk Hướng Hoá hŏng ênhă 2,2 ha. Gru hmô pla mrâo pŏk ngă mơ̆ng mlan 8 thŭn 2021, mâo 3 gŏ êsei ƀĭng ngă lŏ hma hgŭm, tal êlâo mâo klei tŭ dưn.

 Hŏng gru hmô lŏ hma bi mguôp, dŭm mta mjeh dưi ba hlăm gru hmô jing ana lát hoa, boh ƀơr 034, ana durian, ana kneh Thái, đinh lăng. Čiăng ngă gru hmô, knuă druh hdră mnêč bi hriăm, ktrâo lač hdră mnêč mkra lăn kluôm ênŭm, pruê hbâo pruê, mguôp pruê lân leh anăn eh êmô bi lik čiăng pla ana kyâo hlue si klei kčah mtrŭn hdră mnêč. Hlue si Văn Ngọc Khánh, mnuih ƀuôn sang alŭ Cheeng, să Hướng Phùng, kdriêk Hướng Hóa, čar Quảng Trị:

Hlăm hdră pŏk ngă brei kơ kâo snăn kâo ƀuh đĭ kyar jăk, kâo ăt akâo kơ anôk bruă đru brei klei krih êa pruê hbâo, kriê dlăng phŭn agha si ngă. Đa đa sang mkăn snăn kâo ƀuh tŭ dưn hĭn.

 Leh 1 thŭn pŏk ngă gru hmô bi êdah leh klei dưi mdrơ̆ng jăk, ênoh hdĭp ăt msĕ mơh klei dưi đĭ kyar jăk. Dŭm mta ana boh ƀơr 034, kneh Thái, lát hoa đĭ kyar jăk, ênoh hdĭp mâo 95%, ana dôk hlăm wưng bi tlah dhan. Ară anei knuă druh hdră mnêč lŏ dơ̆ng gĭt gai dŭm gŏ êsei mnuih ƀuôn sang dŭm hdră mnêč kriê dlăng, gang mkhư̆ hluăt ƀơ̆ng mnơ̆ng ngă. Phan Ngọc Đồng, K’iăng Khua Anôk bruă mtrŭt mjhar lŏ hma Quảng Trị brei thâo:

“Mơ̆ng gru hmô čiăng mđĭ ênoh yuôm hlăm sa ênhă yua lăn, hlăm wưng kơ anăp, hmei srăng lŏ dơ̆ng pŏk ngă dŭm gru hmô snei ti dŭm să mkăn leh anăn mơ̆ng gru hmô srăng mâo sa kdrêč čiăng đru kơ mnuih ƀuôn sang truh kơ sa hdră msir pla mjing hơĭt kjăp leh anăn mđĭ ênoh yuôm yua lăn kơ mnuih ƀuôn sang ăt msĕ mơh rơ̆ng hơĭt klei hdĭp mnuih ƀuôn sang.”

 Bruă pŏk ngă gru hmô lŏ hma bi mguôp hŏng klei lu jơr kơ mnơ̆ng dhơ̆ng ba čhĭ brei hrui wĭt hlăm lu wưng mdê mdê srăng ba klei tŭ dưn leh anăn prăk hrui wĭt lu kơ ƀĭng ngă lŏ hma. Êngao anăn, tă hdră pla mjing hơĭt kjăp ti lăn čư̆ hŏng hdră lŏ hma dliê kmrơ̆ng bi mguôp jing yuôm bhăn snăk hŏng dŭm krĭng čư̆ čhiăng. Hlăm klei găl bi mlih yan adiê ƀrư̆ kjham msĕ si ară anei snăn bruă lŏ hma mguôp hŏng dliê kmrơ̆ng jing gru hmô mđĭ kyar hơĭt kjăp./.