Nguyễn Văn Bang, Khua knơ̆ng bruă duh mkra mnia mblei Nhất Bang, ƀuôn prŏng Pleiku brei thâo, klei kdlưn hĭn mơ̆ng hdră mtrŭn bi tă hdră bi hơĭt wăl mnia mblei hŏng klei klă mngač, bi hơĭt leh anăn jăk hŏng knơ̆ng bruă. Klă klơ̆ng, klei bi ênoh gưl ksiêm dlăng knơ̆ng bruă amâo mâo êgao 1 blư̆ hlăm sa thŭn, mtrŭt mđĭ klei mlih mrô, bi hrŏ klei ksiêm dlăng klă anăp leh anăn ƀuah mkra klei duah sun ngăn jing dŭm mta mâo êpul êya knơ̆ng bruă bi mni êdi.

Bruă bi mlih mơ̆ng ksiêm dlăng klă anăp jing ksiêm dlăng êdei, lăm lui klei kpăk hlăm anôk mnia mblei pŏk wăl anôk đĭ kyar klă klơ̆ng hĭn kơ knơ̆ng bruă. Boih nik jing klei đru prăk mnga kơ dŭm hdră mtah, amâo mâo mă prăk jia kơ knơ̆ng bruă čô̆ kơ bruă hŏng klei mbruă leh anăn mjưh mdei klei brei prăk jia sa blư̆, prăk tăk mơ̆ng thŭn 2026. Nguyễn Văn Bang bi klă hdră bhiăn ƀuah mkra hluê êlan mđing kơ hdră êlan bruă knŭk kna, hrô kơ klei kčŭt hưn klei ngă soh, răng mgang năn drăp djŏ hŏng hdră bhiăn mơ̆ng knơ̆ng bruă mâo hdră mtrŭn mrô 198 lač klă leh.

 “Hŏng hdră êlan ară anei, kâo đăo knang ênoh prăk kơ dŭm knơ̆ng bruă điêt leh anăn man dưn, boh nik phung êdam êra čô̆ kơ bruă, srăng dưi bi hơĭt. Kâo đăo knang bruă duh mkra êngao knŭk kna srăng đĭ kyar ktang kyua mâo Đảng, knŭk kna uêñ mĭn, leh anăn dŭm êpul bruă ngăn prăk, knơ̆ng prăk srăng mkŏ mjing klei găl čiăng kơ knơ̆ng prăk lĭng čan hŏng klei pral leh anăn găl hĭn.”

Hdră mtrŭn mrô 198 bi êdah klă klei uêñ mĭn mơ̆ng Đảng, knŭk kna hŏng bruă duh mkra êngao knŭk kna, dlăng anăn jing boh kdrŭt đĭ kyar yuôm bhăn mơ̆ng lăn čar hlăm ênuk mrâo. Phan Thanh Thiên,  khua kiă kriê êpul hgŭm phung mnia mblei mda asei čar Gia Lai bi klaw; anei jing sa klei găl prŏng čiăng kơ anôk bruă duh mkra êngao knŭk kna pai mă. Hdră mtrŭn mrô 198 dôk mâo êpul êya knơ̆ng bruă Gia Lai tŭ drông hŏng lu klei hmăng hmưi. Diñu ƀuh anăn jing klei ƀuăn kđĭ čar ktang phĭt, sa hdră tă đĭ kyar wưng sui, hĭn kơ năn jing sa klei găl čiăng bi hluh dŭm anôk kpăk mâo leh hlăm wưng sui. Ƀiădah, Phan Thanh Thiên,  lač, čiăng bruă bruă klam bi klă mơ̆ng bruă sang čư̆ êa dŭm gưl hlăm klei ngă bruă, čiăng ba hdră mtrŭn klă jing jing boh kdrŭt đĭ kyar hơĭt kjăp mơ̆ng anôk bruă duh mkra êngao knŭk kna.

 “Kâo čiăng khua gĭt gai čar uêñ mĭn lu hĭn kơ anôk bruă duh mkra êngao knŭk kna, ăt msĕ mơh phung mnia mblei mda asei Gia Lai. Êlâo hĭn, dŭm hdră êlan đru čiăng klă mngač, đru kơ knơ̆ng bruă hmao tiŏ pral dŭm hdră bruă, hră mơar. Mbĭt anăn, čiăng mkŏ mjing klei găl čiăng kơ knơ̆ng bruă dưi lĭng čan, đru kơ phung mda asei hlăm klei čô̆ kơ bruă leh anăn mđĭ kyar kmơ̆ng bruă. Mbĭt hŏng anăn jing hdră mtrŭt mđĭ klei mnia mblei, mkŏ mjing dŭm gưl bi hriăm kơ klei kiă kriê, mlih mrô, mđĭ ai dưi bi ktưn kơ knơ̆ng bruă alŭ wăl.”

Hdră mtrŭn mrô 198 mâo mâo Bruă Kƀĭn Ala bi klă amâo djŏ knŏng pŏk sa wưng mrâo kơ bruă duh mkra êngao knŭk kna Việt Nam, ƀiădah lŏ kuč mngač klei đăo knang leh anăn hmăng hmưi kpưn đĭ kơ êpul êya knơ̆ng bruă, boh nik hŏng dŭm alŭ wăl mâo klei găl msĕ si Gia Lai. Êjai dŭm hdră êlan kdlưn hĭn dưi bi klă hŏng bruă ngă leh anăn hrăm mbĭt mơ̆ng bruă sang čư̆ êa dŭm gưl, wăl mnia mblei srăng jing klă mngač, tŭ dưn hĭn, mkŏ mjing tur kơ̆ng čiăng kơ bruă duh mkra êngao knŭk kna jing boh kdrŭt yuôm bhăn hlăm klei mđĭ kyar lăn čar. Hŏng ai tiê mprăp kơ klei mlih mrâo, êpul êya knơ̆ng bruă Gia Lai dôk hrăm mbĭt, sa ai čiăng mjing klei hmăng hmưi jing klei sĭt, đru mguôp hlăm klei đĭ kyar hơĭt kjăp mơ̆ng alŭ wăl leh anăn lăn čar.