Blŭ hrăm ksiêk kjăp klei mĭn mlih mrâo hlăm bruă čih mkra hdră bhiăn mguôp hŏng bruă hluê ngă hdră bhiăn, Khua Anôk bruă kƀĭn ala Trần Thanh Mẫn bi mni kơ dŭm anôk bruă mơ̆ng Knŭk kna, mơ̆ng Anôk bruă kƀĭn ala lehanăn dŭm anôk bruă djŏ tuôm mjêč mprăp, đru kơ Knŭk kna bi hgŭm hŏng Dhar bruă gĭt gai Anôk bruă kƀĭn ala pral mkŏ mjing Klei bi kƀĭn ksiêk kjăp, pŏk hluê ngă dŭm klei bhiăn, hdră mtrŭn mâo Anôk bruă kƀĭn ala bi mklă ti Klei bi kƀĭn tal 8, Anôk bruă kƀĭn ala gưl 15 čiăng hnưm ba dŭm hdră bhiăn, hdră mtrŭn mâo Anôk bruă kƀĭn ala bi mklă mŭt hlăm klei hdĭp. Khua Anôk bruă kƀĭn ala Trần Thanh Mẫn mñă:

"Dhar bruă gĭt gai Anôk bruă kƀĭn ala bi mni kơ Khua knŭk kna pral mâo Klei bi mklă ba mdah dŭm mta lehanăn kah mbha anôk bruă čih mkra hră mơar kčah mtrŭn klă klơ̆ng dŭm klei bhiăn, hdră mtrŭn mâo Anôk bruă kƀĭn ala bi mklă ti Klei bi kƀĭn tal 8. Kyua ênoh bruă ngă, dŭm mta hră mơar čiăng kčah mtrŭn klă klơ̆ng lu, snăn hŏng 18 hdră bhiăn, Knŭk kna, dŭm Phŭn bruă brei ba mdah 127 mta hră mơar, dŭm hdră bhiăn, hdră mtrŭn mâo boh tŭ ba yua mơ̆ng akŏ thŭn 2025 mtam, mtă kơ grăp Phŭn, dhar bruă mâo jao bruă čih mkra bi hluê ngă klei kčah mtrŭn mơ̆ng Khua knŭk kna, mđing kơ bruă čih mkra, ba mdah hră mơar djŏ wưng, rơ̆ng hnơ̆ng tŭ jăk”.

Klei bi kƀĭn tal 8, Anôk bruă kƀĭn ala gưl XV bi mklă leh lu hdră bhiăn, hdră mtrŭn, mâo 18 hdră bhiăn, 4 hdră mtrŭn klă klơ̆ng lehanăn 17 hdră mtrŭn kriê dlăng hdră duh mkra, ala ƀuôn hŏng klei sa ai lu hlăm phung bi ala anôk bruă kƀĭn ala. Hlăm anăn, lu hdră bhiăn, hdră mtrŭn djŏ tuôm kơ dŭm bruă yuôm bhăn hlăm klei hdĭp ala ƀuôn, msĕ si: Duh bi liê, ngăn prăk, Jia, hdră đru kơ yang ƀuôn, lĭng kahan, răng mgang klei êđăp ênang. Hluê si Khua knŭk kna Phạm Minh Chính, boh tŭ anei bi êdah leh klei gĭr ktưn, mâo boh phŭn mơ̆ng Anôk bruă kƀĭn ala, Knŭk kna, dŭm anôk bruă, êpul bruă djŏ tuôm hlăm hdră mkŏ mkra, bi leh klei bhiăn, klei nao hgŭm mơ̆ng mnuih ƀuôn sang, anôk bruă duh mkra; lŏ dơ̆ng mñă klei bi hgŭm ƀrư̆ hruê ƀrư̆ hơĭt kjăp, tŭ dưn plah wah Anôk bruă kƀĭn ala, Knŭk kna.

"Boh sĭt bi mklă leh êgao, dŭm hdră mtrŭn ƀrư̆ ƀrư̆ mŭt hlăm klei hdĭp lehanăn dưi mđĭ lar boh tŭ dưn jing sa klei lông dlăng prŏng. Leh mjưh ruê̆ klei bi kƀĭn, hmei ba mdah leh hdră kčah mtam lehanăn mrâo êgao ăt gĭt gai anôk bruă mkăp kơ klei bi kƀĭn ti anăp. Hlăm wưng ti anăp, mâo lu bruă ba mdah kơ Anôk bruă kƀĭn ala, hmei mprăp jih leh, msĕ si: Hdră bhiăn mkŏ mjing Knŭk kna, Hdră bhiăn mkŏ mjing anôk bruă sang čư̆ êa alŭ wăl, Hdră bhiăn ba mdah dŭm mta klei kčah mtrŭn, anei jing dŭm klei bhiăn phŭn čiăng kơ drei pŏk ngă bruă hlăm wưng kơ anăp”.

Khua knŭk kna Phạm Minh Chính brei thâo, bruă ngă hlăm wưng ti anăp lu snăk, Knŭk kna, Khua knŭk kna, dŭm anôk bruă mâo bruă klam ba mdah 130 mta hră mơar truh kơ 569 mta klei kčah mtrŭn klă klơ̆ng. Bruă pŏk ngă dŭm klei bhiăn, hdră mtrŭn mâo Anôk bruă kƀĭn ala bi mklă ti Klei bi kƀĭn tal 8 dôk čiăng klei mđing dlăng, gĭr ktưn hlăm dŭm phŭn, dhar bruă, alŭ wăl.

Kơ bruă mđĭ boh tŭ dưn hdră bi hgŭm hlăm bruă mkŏ mjing, hluê ngă hdră bhiăn, Khua knŭk kna mtă: Dŭm anôk bruă mơ̆ng Anôk bruă kƀĭn ala, phung bi ala Anôk bruă kƀĭn ala brei bi hgŭm kjăp hŏng Knŭk kna, Phŭn, dhar bruă mơ̆ng wưng tal êlâo mtam hlăm hdră čih mkra klei bhiăn, rơ̆ng klei klă mngač hlăm bruă čih mkra dŭm klei bhiăn, hdră mtrŭn, mjing klei găl kơ bruă hluê ngă leh dưi bi mklă. Khua knŭk kna Phạm Minh Chính mñă klă:

 “Đảng gĭt gai, Knŭk kna tŭ ư, Anôk bruă kƀĭn ala sa ai, mnuih ƀuôn sang ư ai, Ala čar čang guôn, drei hrăm mbĭt hnưm ba dŭm klei bhiăn, hdră mtrŭn hlăm klei hdĭp, mkăp djŏ hŏng klei čiăng mơ̆ng mnuih ƀuôn sang, đru mkŏ mjing knŭk kna yang ƀuôn ngă phŭn kjăp ktang, ba lăn čar mŭt hlăm Wưng – ênuk gưl đĭ kyar sah mdrŏng, kreh dhar mơ̆ng djuê ana drei./.