Êpul mă bruă nao čuă, hơêč hmưi Têt lehanăn mđup brei mnơ̆ng kơ phung knuă druh, lĭng kahan Kđông kahan răng mgang knông lăn Tuy Đức (Knơ̆ng gĭt gai lĭng kahan răng mgang knông lăn čar”, Đại đội Bộ binh 3 (Knơ̆ng gĭt gai lĭng kahan kdriêk Tuy Đức). Ƀri gưl anei, Êpul mă bruă mơ̆ng Gưl dlông jao leh 50 hnư mnơ̆ng truh kơ gŏ sang mâo klei hdĭp dleh dlan lehanăn 20 hnư mnơ̆ng truh kơ phung hđeh hriăm hră jing anak rông kđông kahan răng mgang knông lăn.

Ti să krĭng 3 Đăk Ngo, nao čuă, hơêč hmưi Têt phung knuă druh, lĭng kahan lehanăn mnuih ƀuôn sang ti să, Kơiăng khua Anôk bruă kƀĭn ala bi mni kơ bruă sang čư̆ êa alŭ wăl gĭr ktưn hluê ngă jăk hdră mđing dlăng Têt kơ mnuih ƀuôn ang. Sŭk suôr čuă êmuh, hơêč hmưi Têt phung khua mduôn, mnuih mâo kơhưm jing mnuih djuê ana ƀiă. Kơiăng khua anôk bruă kƀĭn ala ăt mñă bruă klam mơ̆ng phung khua mduôn, mnuih mâo kơhưm. Anei jing êpul phŭn, đru ba hdră êlan mtrŭn mơ̆ng Đảng, hdră bhiăn mơ̆ng Knŭk kna truh hŏng mnih ƀuôn sang, mbĭt anăn nao hgŭm sĭt êmĭt hlăm hdră mkŏ mkra klei bi hgŭm mguôp jih jang djuê ana. Ƀri yan mnga Ất Tỵ 2025, Kơiăng khua anôk bruă kƀĭn ala Trần Quang Phương mđup brei lẹh 90 hnư mnơ̆ng truh gŏ sang ƀun, phung hđeh ƀun hriăm thâo lehanăn phung khua mduôn, mnuih mâo kơhưm ti să Đăk Ngo.

Leh kơnăn, K’iăng khua Anôk bruă kƀĭn ala, Thượng tướng Trần Quang Phương nao čuă, mđup brei leh mnơ̆ng kơ phung knuă druh, lĭng kahan Kahan ksiêm čar Dak Lak. Kơiăng khua Anôk bruă kƀĭn ala hmư̆ leh phung khua Anôk bruă kahan ksiêm čar hưn mthâo kơ hdră mă bruă hlăm thŭn 2024, dŭm boh tŭ êdah êdi hlăm hdră rơ̆ng klei êđăp ênang, gang mkhư̆ phung ngă soh lehanăn pŏk ngă hdră đru kơ yang ƀuôn; hdră êlan – bruă klam hlăm thŭn 2025; mđing mđĭ hdră răng mgang klei êđăp ênang ala ƀuôn, răng mgang dŭm hdră bruă prŏng mkăp kơ hdră mđĭ kyar bruă duh mkra – ala ƀuôn ti alŭ wăl.

Kơiăng khua Anôk bruă kƀĭn ala, Thượng tướng Trần Quang Phương bi mni kơ dŭm klei gĭr lehanăn boh tŭ mơ̆ng Êpul kahan ksiêm čar Dak Lak dưi mâo hlăm thŭn êgao. Boh nik, hdră “Jih jang mnuih ƀuôn sang răng mgang klei êđăp ênang Ala čar”, Hdră rŭ mdơ̆ng 1.200 boh sang khăp čiăng đru kơ gŏ sang dleh dlan kơ sang dôk, gŏ sang knŭk kna dlăng ba, mnuih djuê ana ƀiă ti alŭ wăl čar dưi ngă leh êlâo 3 mlan mkă hŏng hdră kčah mâo Knŭk kna bi mni, hdră mkra mlih bruă ngă hră mơar mơ̆ng anôk bruă mâo lu klei bi mlih jăk…

Mñă klă klei yuôm bhăn hlăm bruă rơ̆ng hdră êđăp ênang ala ƀuôn ti alŭ wăl, Kơiăng khua Anôk bruă kƀĭn ala mtă: Kahan ksiêm čar Dak Lak brei mâo hdră ngă bruă pral hĭn, thâo klă klơ̆ng klei dôk mâo mơ̆ng nah gŭ.

 “Hluê ngă hdră êlan: Thâo klă klei mâo, kah mbha klei hưn, bi mklă čiăng đru kčĕ djŏ, pral msir mghaih amâo lui kdjăt kƀla”.

          Êpul mă bruă nao čuă, mđup brei mnơ̆ng kơ phung knuă druh, lĭng kahan Kđông kahan răng mgang knông lăn Ia R’Vê, Êpul duh mkra Lĭng kahan răng mgang knông lăn 737, knuă druh, khua mduôn lehanăn gŏ sang knŭk kna dlăng ba, phung hđeh dleh dlan ti alŭ wăl knông lăn Êa Sup. Ti dŭm anôk nao čuă, mđup brei mnơ̆ng, Kơiăng khua Anôk bruă kƀĭn ala Trần Quang Phương mơĭt leh asăp hơêč hmưi jăk siam truh hŏng knuă druh, lĭng kahan, bruă sang čư̆ êa dŭm gưl lehanăn mnuih ƀuôn sang knông lăn Êa Sup. Ñu mtă kơ Êpul kahan răng mgang knông lăn čar Dak Lak lŏ hyuă kjăp hĭn klei khăp lĭng kahan hŏng mnuih ƀuôn sang, lŏ dơ̆ng hluê ngă jăk gru hmô msĕ si đảng viên mjĕ mjuk hŏng bruă đảng krĭng knông lăn, Yan mnga hơuh mđao ai tiê mnuih ƀuôn sang, Anak rông kahan răng mgang knông lăn, Đru kơ adei nao sang hră…

Ăt ti Dak Lak, bi ala phung khua kiă kriê Đảng, Knŭk kna, Kơiăng khua Anôk bruă kƀĭn ala Trần Quang Phương nao čuă êmuh, mđĭ leh ai phung knuă druh công đoàn, đoàn viên, mnuih mă bruă, boh nik phung đoàn viên, mnuih mă bruă dleh dlan, mâo klei truh êjai mă bruă, mâo klei ruă ktrŏ, mnuih êdu awăt hlăm ala ƀuôn. Kơiăng khua anôk bruă kƀĭn ala mbĭt hŏng êpul mă bruă jao leh 300 hnư mnơ̆ng kơ phung đoàn viên, mnuih mă bruă mâo klei hdĭp dleh dlan./.