Bruă Đảng kdriêk knông lăn Sa Thầy, čar Kon Tum mâo 53 êpul bruă đảng hŏng giăm 2.100 čô đảng viên. Leh mâo Bruă Đảng čar Kon Tum ruah mkŏ mjing klei bi kƀĭn bruă Đảng gưl kdriêk, hruê 04/7/2024 Anôk dlăng bruă Đảng kdriêk Sa Thầy mâo leh Hdră kčah mrô 208 kơ klei mprăp leh anăn mkŏ mjing klei bi kƀĭn bruă đảng dŭm gưl wưng 2025-2030. Y Sâm, K’iăng Khua dlăng bruă Đảng kdriêk Sa Thầy brei thâo, kdriêk mkŏ mjing leh bruă ksiêm dlăng mprăp kơ klei bi kƀĭn truh hŏng jih jang phung knuă druh phŭn, mbĭt anăn mkŏ mjing Êpul mă bruă, Êpul hră mơar leh anăn Êpul mkŏ mjing đru kơ klei bi kƀĭn:

 “Čiăng mprăp jăk kơ klei bi kƀĭn, Anôk dlăng bruă Đảng kdriêk gĭt gai dŭm anôk bruă boh nik jing Anôk bruă mnuih mă bruă mprăp jăk kơ bruă mnuih mă bruă djŏ hlue si hdră kčah, hlue si Asăp  mtrŭn mrô 35 leh anăn dŭm hră mơar mtô lač mơ̆ng Anôk bruă mkŏ mjing gưl dlông kơ bruă mnuih mă bruă. Hŏng hră mơar ară anei gĭt gai Knơ̆ng bruă sang čư̆ êa kdriêk leh anăn dŭm anôk bruă ktuê dlăng hnơ̆ng kčah Hdră mtrŭn Klei bi kƀĭn bruă Đảng wưng 2020-2025 leh anăn dŭm bruă klam kđi čar ti alŭ wăl.”

Hŏng bruă mprăp kơ klei bi kƀĭn bruă Đảng kdriêk, bruă Đảng kdriêk Sa Thầy gĭt gai dŭm êpul bruă Đảng mkŏ mjing hdră kčah klei bi kƀĭn mơ̆ng bruă đảng hlue si klei mtă, boh phŭn Asăp mtrŭn mrô 35 mơ̆ng Phŭn bruă kđi čar. Hlue anăn, dŭm anôk bruă Đảng hlăm Bruă Đảng nah gŭ srăng bi leh klei bi kƀĭn êlâo hruê 30/11/2024. Bruă Đảng să Ia Xiêr mâo Bruă Đảng kdriêk Sa Thầy ruah mkŏ mjing klei bi kƀĭn gưl nah gŭ mĭn tĭng mkŏ mjing klei bi kƀĭn hlăm hruê 06/1/2025. Phan Chí Thiện, Khua dlăng bruă Đảng să Ia Xiêr, brei thâo, ară anei jih jang 13 êpul bruă đảng hlăm să dôk mjêč bi leh bruă mprăp kơ klei bi kƀĭn:

 “Jih jang dŭm êpul bruă dưi hmư̆ klei mtô hnưm snăk kơ hdră êlan mkŏ mjing klei bi kƀĭn mơ̆ng să. Dŭm êpul bruă pral mkŏ mjing hră mơar truh wưng ară anei snăn jih jang dŭm êpul bruă dôk mkŏ mjing hră mơar, dôk mă klei blŭ mguôp mơ̆ng dŭm anôk bruă djŏ tuôm čiăng mâo klei hưn mdah kđi čar, hưn mdah bi leh klei ksiêm dlăng leh anăn djŏ hŏng klei găl boh sĭt. Akŏ mlan 10 jih jang anôk bruă đảng srăng hưn mdah hdră msir kơ mnuih mă bruă hŏng Anôk dlăng bruă Đảng să ksiêm dlăng leh anăn brei klei blŭ mguôp”

 Mbĭt hŏng pral mprăp jăk kơ klei bi kƀĭn hlăm wưng mrâo, dŭm êpul bruă đảng ti kdriêk Sa Thầy, čar Kon Tum ăt dôk mđĭ ktang hdră bi lông ktưn kkuh drông klei bi kƀĭn bruă đảng dŭm gưl. Ktuê dlăng, mjêč gĭr bi leh tŭ dưn hnơ̆ng lčah bruă klam klei bi kƀĭn êlâo kčah leh. Mbĭt anăn mơ̆ng klei mtă boh sĭt mâo hdră kñăm klă klơ̆ng kơ wưng mrâo. Ayŏng A Tớ, Khua dlăng bruă Đảng hlŏng ngă Khua ƀuôn Plei O, să Ia Xiêr, brei thâo:

 Leh mjưh ruĕ wưng păn bruă 2022-2025, hlue si klei gĭt gai mơ̆ng bruă Đảng să Ia Xiêr, lŏ dơ̆ng mprăp kơ klei bi kƀĭn wưng mrâo 2025-2027, bruă đảng ăt bi kƀĭn čiăng ngă bruă mnuih mă bruă, hưn mdah ksiêm dlăng, truh wưng klă klơ̆ng bi leh, hlue si hdră mĭn tĭng hlăm hruê 16/10/2024 bruă Đảng Plei O srăng mkŏ mjing klei bi kƀĭn”.

Truh ară anei kdriêk Sa Thầy, čar Kon Tum bi leh 54/71 hnơ̆ng kčah Hdră mtrŭn Klei bi kƀĭn  bruă Đảng kdriêk tal XVII, wưng 2020-2025 kčah. Êdah êdi jing bruă mkŏ mjing Đảng, kah knar grăp thŭn kdriêk bi mŭt 100 čô đảng viên mrâo, êbeh 10% hnơ̆ng kčah. Jih jang 64 alŭ ƀuôn mâo Khua dlăng bruă Đảng hlŏng ngă Khua ƀuôn amâodah Khua anôk bruă mặt trận, êbeh 30% mkă hŏng Hdră mtrŭn.

Ară anei Anôk dlăng bruă Đảng kdriêk Sa Thầy dôk lŏ dơ̆ng gĭt gai 53 êpul bruă Đảng rơ̆ng ngă jăk dŭm hdră, djŏ hdră kčah leh anăn bi leh bruă mkŏ mjing klei bi kƀĭn êlâo hruê 10/2/2025. Mbĭt anăn gĭt gai jih bruă kđi čar gĭr bi leh dŭm hdră kñăm wưng êlâo kčah leh mjing tur kơ wưng mrâo hŏng klei gĭr lŏ dơ̆ng mđĭ klei dưi gĭt gai, ai ktang bni kdơ̆ng, mkŏ mjing bruă Đảng leh anăn bruă kđi car mơ̆ng kdriêk ƀrư̆ doh mngač, kjăp ktang; kriê dlăng kơ klei hdĭp mnuih ƀuôn sang ƀrư̆ jăk mơak, trei mđao./.